泡菜炒飯

生活忙碌, 好容易將一個人意志打敗,平時頑強如鬥牛的我都不例外, 勁煩躁!響最忙既時候身邊總會出現小人, 好似烏蠅咁圍繞著, 迫我出手遂隻拍死, 勁煩!咁岩尋日好友打來, 講佢既婚姻不如意。係我呢個損友發揮作用既時候, 我同佢講唔准一個人, 有咩一定要講晒出黎!
大家傾左好耐,在我們這個年紀, 竟已經要開始講一D舊事! 做學生時, 兩條友都好似過度活躍症咁, 放左學仲可以去打波, 打完波仲可以躝街, 躝完街仲可以去唱K, 唱完K仲未捨得返屋企, 對於我地黎講, 當時既煩惱只有夠唔夠零用錢同埋溝唔溝到仔..haha..又講開有個舊同學做了某連鎖店的大老闆; 又話比我知我讀書時期的男朋友剛第二次離婚!(嘩!)相比起我地兩個,我唸我地都算幸運的一群, 起碼有自己的事業亦搵到一個愛錫自己既人, 亦無咩大風大浪發生,但所有野都仍然要花盡氣力去經營同維繫, 有時, 真係覺得好叉攰!而家先知道, 細個時的生活真係無憂無慮, 但而家已經係成年人, 又點可以變返舊屎咁既心態呢!有時真係好懷念細個既自己! 當世事再沒完美, 可遠在歲月如歌中找你。
可以令我心情轉好的第一位必然係dingding, 看到呢個專攪破壞又挑通眼眉 既肥野, 所有煩惱都可暫時放低!第二位係美食, 美食當前, 所有衰人衰事, 唔該死開一邊!都話臨訓唔好睇飲食雜誌, 發夢都食緊野, 一起身已經肚餓!臨訓睇到有間韓式餐廳, 見到D韓式美食流晒口水, 都話我好鬼中意食炒飯, 見到泡菜炒飯不得之了, 全日都圍繞響個腦中, 放工嗱嗱聲去買材料, 但睇唔清楚人地個炒飯有咩料, 因為比隻荷包蛋遮住左, 是鬼但, 反正都唔係死跟, 就用自己中意既材料, 但我一向煎荷包蛋都好樣衰, 完全破壞成個外觀, OK, 都係事鬼但, 因為我真係覺得好惹味呀!咁已經夠啦!^^

材料 :

1. 泡菜
2. 物資-素丸
3. 甘荀 - 1條
4. 青瓜 - 1條
5. 芝麻
6. 乾蔥
7. 白飯

做法 :
1. 泡菜切碎
2. 甘荀,青瓜刨絲,和素丸略炒盛起備用
3. 先爆香乾蔥, 倒入泡菜
4. 倒入白飯炒至一粒粒
5. 倒入甘荀,青瓜
6. 加入芝麻
7. 用素雞粉,糖調味, 丁點素蠔油吊味
8. 舖上荷包蛋攪惦!