23/04/2014，今日我一定要好好記住!
話說Bibi Whatsapp我，想話晚上出去，要七點半出門口。
咁即係趕唔切同我食飯啦，我都打定輸數，由得佢去玩下，自己求其食D野算啦。
佢問我: 你諗住今晚食咩架?
其實我都冇諗住煮咩架，但雪櫃有粟米仔、秋葵、素蝦仁、青瓜同雞柳，咁我就話: 粟米仔秋葵素蝦仁青瓜炒雞柳。
點知佢竟然話: 等我煮咪得咯!(我冇聽錯吖嘛?)
我既指示就係:
粟米仔同秋葵係雪櫃櫃桶，滾水加少少鹽灼十零秒就可以撈起，素蝦仁放係公仔麵果個櫃，青瓜仔用兩條就夠，雞柳係雪櫃下格，已調味(其實係雞扒黎)，切細就炒得。
![]()
先以蒜片炒雞柳，差不多熟就加素蝦仁同青瓜，加少少魚露調味，兜熱左就加埋啲粟米仔同秋葵，兜勻晒就掂啦。
加多句: 好簡單，如果你煮，我就負責洗碗啦。
差不多放工，我就執定晒D野，一夠鐘就九秒九衝去打卡，競步去排隊搭村巴，已經係最尾幾個上車啦。一開車就whatsapp佢，話坐緊村巴返去，等佢預時間。
入屋之後，我專登唔加意見，走去洗手、墊定檯、拎定碗筷等食。
我入屋第一眼望入廚房，佢已經灼完粟米仔同秋葵，泌走D水。
後尾我再入廚房，佢竟然加咗蓋去煮。
我忍唔住話: 唔駛加蓋啦，兜幾下得架啦。你調咗味未架?
Bibi: 未呀。
我: 咁你有冇落魚露吖?
Bibi: 有，落咗一圈。
我: 咁咪即係有味架咯，等我試下。(點咗少少汁，其實都有味啦。)夠味啦，唔駛加鹽都得啦，唔駛食咁咸既。
就係咁，佢就成功煮咗飯餸出黎啦。雖然D飯落多咗少少水，青瓜仔切成圓片同煮過咗火，已經相當唔錯。可能呢幾日見我煮得粟米仔同秋葵多，都知點整啦。
仲可以留個飯盒俾我，充滿愛心，十個讚!
呢一餐，相信係佢自前年暑假去美國做暑期工(當年要為幾個做House Keeping既同屋煮飯俾佢地帶飯)之後，第一次粉墨登場，獨力煮晒D飯餸出黎，縱使簡單，我已經心滿意足了。
仲有額外大獎: 佢飯後竟然走去洗埋D碗先出街呀!
真係超生性呀! I love you, Bibi!
============================================
感謝 May姨Blog 提供以上資料
May姨Blog的網誌: http://maylibibi.blogspot.hk/
============================================
