大家都知我幾慳家架啦，無啦啦，我係唔會亂花我既擦膠儲備既，尤其存貨已經見底啦！
不過咁，都係果句啦，慳自己就唔好慳人地．
一日，有個教會朋友，拎咗張狗狗圖樣俾我睇，佢話想用黎做卡喎，仲話手上既擦膠冇咁大舊（佢講緊美心美勞果種），要縮印先做到．但呢個史提拔，唔知點解又將只狗狗縮到細過頭，唔通佢唔識用個影印機？不如等我幫你拎去縮啦．
等我睇過，冇理由唔夠大架？我唔係豪咗一塊好野俾佢既咩？點解唔夠大呀？原來佢一路都唔捨得用呀！佢話：我依家先係初學，唔想咁快就亂花咗舊擦膠呀！
返到屋企，我心諗：佢唔捨得用塊擦膠，用果ｄ粗野，以佢目前既技術，咪盞搞到雕完出黎一忽忽？不如咁啦，再豪多次俾佢，漏夜趕個印出黎等佢開心下．
就係咁，我就做咗呢個o係我印仔生涯中最大既一個印啦，佢仲爭ｄ要佔用晒全塊擦膠添！
刻好啦咩？好似係．
上埋色，咦？唔妥，唔妥呀！你地見唔見呀，只後腳呀，仲有多餘野未剷走架！又一次證明我做野，成日都有蝦碌出現既．
我冇野叻，至叻補鑊，好快就搞返掂．
印咗出黎，就係咁款架啦．呢隻狗，原本設計既線條係想營造用粗筆隨意亂描既效果既，但原庄個鼻我覺得唔多好，咪同佢改少少咯，最後變成呢個款，唔知呢位朋友最後做出黎ｄ卡係點既呢？
============================================
感謝 May姨Blog 提供以上資料
May姨Blog的網誌: http://maylibibi.blogspot.hk/
============================================
