呢間屯門既分店，開咗睇怕起碼都有半年啦，我一次都未試過。
無他既，一來我冇乜飲茶癮，二來呢間野開到鬼咁晏，平日早上十一點，假日就十點。我好少咁晏食早餐既，佢仲要未開門就打蛇餅果下Click吖嘛。
不過，呢日有街坊排定隊攞位，叫我一陣自己去會合，咁我就沖個靚涼先去都未遲。
餐具都幾靚既
可惜洗杯用既盛水兜都幾污糟，我見到個底有乾咗既餸汁跡。之後我朗完D碗筷，見到有隻筷子仲有野粘住既，都幾恐怖喎。
雖然點心款式都幾多，價錢唔算平。
名點推介，我地要咗三樣，可以講係超級失望。
佢雞乸咁大隻字寫住係即叫即蒸嘛，我梗係預咗要熱辣辣架啦。
叉燒唧，搞乜鬼黑毛豬唧，搞到咁貴都唔知想點。
午市小菜亦都唔算街坊價
炒粉麵就合理價錢。
估唔到記度都有范曾既畫，我離遠都認得佢D字。
呢度裝修算唔錯
光猛企理
冇幾耐就上咗芋角同春卷，兩者既溫暖度近乎凍。
我D手指都算幼架啦，好似煙仔餅咁粗既春卷真係過份得離譜，你地估都估到個餡都應該冇乜料到架啦。
芋角咩? 唉，我係警犬黎架嘛，食得出D炸芋角既油好唔掂咯，有少少萬年油味。而且一D都唔鬆化，又唔熱先係死罪呀! 唔好忘記我地係早上茶市第一批客呀，冇理由D點心係唔熱既。
豬膶腸粉，好明顯就係一條開三，比起平日係普通酒樓食果D，砌埋應該係正常版既兩條，變相少咗一條。未放豉油，又係微微暖既，D豬膶好薄，有少少鞋同豬膶既腥味，唔見得好好食。所謂即拉腸粉，我都好懷疑，粉皮亦唔見得比大排檔優勝。
娥姐粉果就比較得，係熱辣辣既，點心一定要熱先好食架麻。
南乳豬手，都夠熱，得四件，碟底連墊高少少既花生都慳返。
魚湯鮮竹卷反而有D驚喜，比外面食到既清新爽口，亦係熱辣辣既，值得推介。
原本想叫大糯米雞既，剔錯咗呢個蟲草花蒸雞，五舊斬開咗既雞中翼，即係兩隻半，急凍貨色，除咗夠熱，一無可取。
$6茶錢，一D都唔貴，埋單兩人食咗上面既食物，唔算太飽，二百五十幾。但係條數點計既呢? 五個大點，兩個中點，加埋茶錢，點解會成二百五十幾既? 好似收多咗八十蚊喎，真係無從稽考? 可惜我唔係負責埋單果個，冇機會睇過張單，又蠢咗啦。
成百三蚊一位既早餐，以咁既食物水平，真係唔值。
============================================
感謝 May姨Blog 提供以上資料
May姨Blog的網誌: http://maylibibi.blogspot.hk/
============================================
新斗記 (屯門分店)
Italian Tomato Café (馬鞍山店)
嘉美軒精細潮州菜
彩晶軒 V Cuisine (荃灣分店)
Fish & Chick (西環店)
欣圖軒 Yan Toh Heen
恆河咖喱屋 Hin Ho Curry Restaurant
大戶屋 Ootoya (太古店)