終於去得成既美食博覽

由 May姨blog 於 2012-08-21 00:00:00 發表 | 累積瀏覽 389

分類：飲品美食

雖然今年一只騾仔去左美國，另一只騾仔又要開工。但我早就攞定假，約左細家姐齊齊濕平。
呢個颱風啟德咁玩野，來去匆匆。之前俾佢嚇餐飽，搞到我以為冇得去，要銷假。點知佢一個屈尾十，又偏移左去澳門，風平浪靜，我梗係一於取消銷假，照原定計劃去馬啦!

我地先上樓上三樓逛逛，通常啲人都係集中去一樓掃貨先既，買完都冇手再拎野，就會放棄上去睇野架啦。經上年既經驗，先上三樓，一來人少，行得輕鬆，二來又唔駛買咗太多野之後再去貢。

預先都有做功課，好剋制咁只買心水貨品，同家姐分好庄，再戰一樓，花咗好多錢，買得好爽。

事前我都預咗唔買罐頭同玻璃樽架啦，但係咁意都買少少啦。$50三罐大午餐肉，分一罐俾家姐，蝦醬都想買，但只買一樽細既，$15。

$20兩包菰菰，抵食，分咗包俾嬸嬸。

$120兩包頁丸，一人一包。

$18包位元堂阿膠琥珀核桃，唔知好唔好食呢?買包捧下場啦。

花生味及鍊奶味桃哈多，$10兩包

金梅片，$10兩包

每次有食品展必買既士多啤梨乾，$60六包。

呢D糖糖冇乜平，$11兩包，但我想食。又唔重，買!

呢啲土耳其杏脯，味道純正。$50九包，唔買對佢唔住。

$115五包張榮記蝦子麵，係放係公司看門口既好野黎。

好特別既酸梅子薑，都幾好食架。$20三包。另有糖薑同黑糖薑，都幾辣下。

冠軍蕃薯，$10包，俾咗家姐，但我達咗一條。

呢檔呢，我買咗二百幾蚊，因為品質確係好。左邊既杏脯，鮮嫰味美，右邊既雜莓純正天然。買黎大家食下就夠好啦。

Galler朱古力，都唔駛多介紹啦，85%，必買之選。$35。

呢D係我幾鍾意食既脆卷黎，$28。

$10三盒既小餅干，選了紅豆牛奶味及燕麥味。

台灣薌園既產品，亦都係品質保證。$60三盒，我諗住用黎寄去日本，貪佢夠輕。

士多啤梨清涼糖，真係幾好味架。$15一盒。

土耳奇開心果，$15。

呢包係贈品黎

麵豉湯，一PACK 12包，$10。

此行尚有重要任務，幫同事買月餅。美食節價，用匯豐卡，六折再九五折，我順手買張俾以前湊Bibi既嬸嬸。

原來買滿一百蚊可以試食一個dip dip冰皮月餅架。我買咗二千幾蚊，個店員先俾兩張試食券我地，實在太欺人啦! 當我去試食果陣，聽到佢地猛咁宣傳，滿一百就食一個。咁我咪開口問點解我買咗二千幾蚊野，你地只俾兩粒我? 後尾佢地叫收銀處理一下，佢好晦氣咁俾多兩張券我。其實佢呢D迷你月餅仔，有好多口味架，我見我地又唔食得咁多，亦都冇同佢地力爭。見身邊有個小朋友係度望下望下，我就請佢食，跟住拎兩個膠兜套住一個打包，留返俾四眼妹。

原來買每滿一百蚊，又可以加$3換購一盒四條庄既蛋卷。我地係咁意換咗五盒就算，驚拎唔到。原來都幾好食架!