是次消費：每人平均約HK$ 170.00
年卅晚，食日本野實冇人同你爭，諗住唔駛訂檯，大安旨意，去到先知間野摺咗，唯有轉軚啦．
終於，我地去咗食放題，每位$188，適逢佢地一週年，有九折．
實在唔記得叫咗幾多野，好食既又猛叫，ｄ野都黎得幾快，尤其魚生，最快上場．
呢ｄ係小吃，螺肉，八爪魚仔，我冇食過，唔知咩味．
爸爸唔鍾意生冷野，所以佢一落場就叫拉麵，唉．．．食拉麵．．．
但意想不到既，呢隻叫"味蛋"既東東，竟然係溫泉蛋，咬開入面好似上海燻蛋咁，流心架！搞到我都好想叫碗黎食．原本賣相唔係咁差既，俾爸爸食咗兩啖，連塊紫菜都冇埋先黎影，係差ｄ架啦．
魚生唔錯，幾新鮮，我唔敢食甜蝦，但佢地話好正，所以唔知再叫咗多幾次．
原來足四位就有海膽送，你地都知我唔係一個稱職既攝記黎，所以往往食咗大半先識影相．．．
呢碟本來係滿晒既，但你地知啦，紫菜會腍架麻，大家梗要快手ｄ食件先啦．
燒鯖魚，爸爸食晒，我地又冇再叫，亦都唔知正唔正．至於秋刀咩，認真麻麻．
雞軟骨串係我既飛化黎，呢塊蟹肉忌廉薯餅未影得切就毀咗容．
一碗小拉麵邊夠飽架，爸爸又整多碗博多木耳拉麵．
我地大頭蝦，原來人地上碟果陣，係有花過心思架，如果唔係Ivan哥挾走件炸帶子，我都唔知佢地原本係做成青蛙咁款架．
金菰牛肉卷，唔得．
蕃茄牛柳串，我唔食牛架麻，但佢地話好好食．而雞翼呢，佢地話唔好，我就反而鍾意喎．
炸蟹卷唔知正唔正，只叫一件試下，其實呢度既食物都做得好細粒，唔會一下子食飽你．
叫咗唔知幾多碟蟹籽沙律，但原來野菜沙律仲正架．我地後尾再加多兩碟，仲叫埋煙肉炒菠菜，都唔錯喎，熱辣辣，早知叫多兩碟啦．
你睇下我地叫咗一粒八爪魚丸同一隻炸餃子，佢地整到好似晴天公仔咁可愛架．
芝麻雪糕好勁味架．
熱柚子蜜，熱度勁高，放低一輪，飲到底都咁熱．呢隻只係普通膠杯黎咋．
凍藍莓汁同凍柚子蜜反而似芬達味．
早知叫ｄ清酒黎試下啦．
除咗蟹柳同玉子，我地全部都食過，以三文魚，北寄貝，甜蝦同榮螺最好．
拉麵我真係有ｄ想叫架，但驚一下子食飽咗，所以爸爸食，我都冇食一啖．況且我平日下晝都食過啦，冇咩特別．
真係唔知點解臨尾先見到有炒菠菜既．．
辣麵豉魷魚鬚串好搞笑，係BB黎架．．
佢地叫得最多蟹籽壽司，契媽話飯細細，蟹籽多多，正．
驚手卷大件，所以只叫咗一件
麵豉湯麻麻，沙律一流．
天婦羅蝦，蕃薯都好食，驚熱氣，有好多都冇叫．
呢度樣樣都份量細細，咩都可以逐件叫，反而可以樣樣都食．
由落第一張單起計，可以食兩粒鐘，ｄ野黎得快，食第一粒鐘都大半飽啦．
我仲要去行花市，所以唔會食咁飽．
============================================
感謝 May姨Blog 提供以上資料
May姨Blog的網誌: http://maylibibi.blogspot.hk/
============================================
