我知道A-Maths叔叔星期六牛一，想話同佢慶祝下（其實係搵藉口帶爸爸去探下牛B唧），但又驚佢地自有節目安排，好似好打搞人咁．
行完花展，坐巴士途中，打去佢太太手機，冇人聽；打去佢屋企，又冇人應；唔通已經去咗街？咁直接打埋俾主角啦！咦，竟然聽我電話喎．
原先我只係諗住晚上拎個蛋糕去佢度切既唧，但當我拎咗個蛋糕，經過街市，又點會唔順便買ｄ餸呢？又咁啱俾我係樓下公園見到佢同牛B係度玩喎，問佢今晚食乜餸？原來佢地未預備架，有冇諗住出街食呀？湊住牛B點出街食呢！咁一於等我黎煮啦，我有餸架啦，你到咁上下煮定煲飯，等我拎ｄ餸過黎啦！
因為爸爸都去既，所以都會煮ｄ素菜，佢地又冇乜野唔食既，好易話為唧．我煮咗茶樹菰翠肉瓜炒小棠菜，旁邊果兩粒南瓜，係我專登蒸黎俾牛B既，如果佢係我地食飯果陣lur食，都有野佢歎麻．
冬菰蒸肉餅
素翅青瓜炒蛋
既然係叔叔生日咯喎，冇少少喜氣洋洋既食物又唔係咁好既，就整返半斤大家樂叉燒啦，果然靚過美心果ｄ呀嗄．
素翅南瓜湯，食完飯，飲埋個湯，真係好夠飽架啦！
抖返一粒鐘，咁就食埋呢個魔鬼蛋糕啦．我地五個人，只可以消滅到一半咋！
24/3係佢地既結婚週年紀念，等我又出返枝豉油俾佢啦．呢盒首版朱古力等佢用黎送俾太太，氹下佢開心就啱晒啦．
============================================
感謝 May姨Blog 提供以上資料
May姨Blog的網誌: http://maylibibi.blogspot.hk/
============================================
