下午茶@上海婆婆

星期三，唔駛返工，但心掛掛．知道老闆突然要飛（佢呢輪已經分身乏術架啦，家陣又要掉低晒ｄ野，真係倒瀉咗籮蟹呀），驚個替工搞唔掂，又要搖控一大輪，又要打好幾個電話去停呢樣，取消果樣，上埋網睇下公司ｄ in-coming emails有冇突發事件，又搞一輪．

點解我唔銷假？因為我下晝安排咗ｄ野係屯門做，要撲黎撲去我仲煩，都係搖控算啦．

下午三點幾，同爸爸去咗呢度食下午茶．入座之前侍應提醒我地三點九前要落晒單，因為佢地要截數．冇所謂啦，就咁揀幾樣野食唧，好快唧．

只限星期一至五既下午茶餐分＄２６，＄３０同＄３２三種，全部都送豆漿一杯，可惜係凍既，我聽到隔離檯問可唔可以叮返熱呀？但侍應話呢度冇微波爐，幫佢唔到；其實天寒地凍，你估人人都飲得凍野既咩？一係佢就要人俾錢加熱啦．

雖然迷你涼菜只係十蚊，但唔多抵食．

呢碟油炆小竹筍，我地食晒所有野，佢催我地埋晒單，都未上到，唔係一早就整定既咩？係咪有ｄ離奇呢？味道？普通啦．

＄３２既冬菰雞肉拉麵，冬菰雞肉係事先炒咗放埋一邊既涼野，等ｄ麵灼咗，加係上面再加湯既，所以好明顯咁見到ｄ湯係鴛鴦色既．味道不過不失啦，又未至於唔夠熱既．

湯麵係跟點心既，爸爸必食既素菜包．平日單叫，三粒要＄２６．家陣兩粒加埋碗麵只係＄３２，又唔駛加一，又有豆漿送．

我地揀咗婆婆粗炒，同午膳時間食既咁上下大，只係隻碟唔同形狀唧，所以平日去食下午茶，相對黎講算係平架啦．

咁埋單只係＄７２，下午茶時段係唔駛加一既．

============================================

感謝 May姨Blog 提供以上資料

May姨Blog的網誌: http://maylibibi.blogspot.hk/

============================================