年廿九，和Bibi的契媽一起吃團年飯．咁既日子，我地幾丁人，食中式訂位又麻煩，不如食日本料理啦．
Bibi要既豚肉醬汁烏冬加天婦羅壽司定食，份量真係唔講得笑，雖然我拎走晒ｄ天婦羅茄子，冬菰同南瓜俾爸爸，換咗天婦羅串燒同炸蝦俾佢，食得晒都算佢厲害呀！
呢set東東仲跟一客釜飯，熱辣辣上桌既，又係要胃納相當先食得晒架．
呢set呢，就係上面果套野再加烏冬窩既（湯係用個爐仔煲住上既，自己淥），仲有壽司同茶碗蒸添！
呢客就係天婦羅魚生定食，咁ｄ魚生就梗係我地食埋啦，爸爸將佢果兩串串燒帶子加魚柳，同兩隻炸蝦都奉獻咗出黎，我地當然好樂意換晒ｄ蔬菜炸物俾佢啦．
我果客就有燒鯖魚，魚生，茶碗蒸同蜆肉麵豉湯．
食到捧住個肚，去維園行下，其實我主要係去探下紙藝者既，事關我應承過佢會去探佢．
乾貨區，人多到基本上係行唔到去買野既．我錯過咗佢個檔，唔想去到現場都功虧一簣，返轉頭行多次先搵到，因為人多，無法仔細揀，只叫她幫我寫張學業進步俾Bibi算啦．
濕貨區冇咁迫，但都冇咩好睇．
今年天氣暖，大部份既桃花都開到謝啦，維園所見既貨色都比較差勁，而且由桃樹剪下來的散賣桃枝亦沒有看頭，令Bibi好不失望，著我再到屯門的花市走走，順便跟同學的檔打打氣．
屯門的花市，人流亦不少，但行得舒服，方便購物．年花呢，不單價錢平過維園好多，而且品質亦好，我地睇下睇下，終於見到散賣既桃枝有廿蚊一束的．我跟檔主說，我寧可多付一點錢，請她給我剪多枝靚的，終於以卅元買了一小束不錯的桃枝，Bibi亦開開心心回家去．
著住返工鞋，走了這許多路，其實回程在西鐵內已腳仔軟，又要企，到行完屯門花市，真的有點謝，爸爸仲話要行路返屋企．．．．好在佢見夜，揹咗我行一陣等我抖下唧．終於搞到兩點幾先訓，真係夠晒夜咯．
============================================
感謝 May姨Blog 提供以上資料
May姨Blog的網誌: http://maylibibi.blogspot.hk/
============================================
