大出血!?

星期六，放工約咗爸爸．真係唔想又走去食齋，於是就提議去恆生總行過少少既Cafe de Savoy啦，帶佢食下幾十蚊個既有機紅米飯素食餐啦．

冇訂檯，諗住walk-in，有位就食，冇位就係天意黎，咁我唯有乖乖陪佢食齋咯．點知有位喎，仲只係$38位添！

咁即刻開動啦！先飲個蘑菰忌廉湯先，唔太咸，又唔太杰，啱晒我，可惜唔知點解儲相果陣唔見咗張相，冇得睇．

跟住就拎熱食，我要咗兩件照燒雞扒（味道標準），一塊魚柳（外皮唔厚，好滿意），三條菜遠．

跟住先走去食佢ｄ鬼佬生菜沙律，ｄ菜都幾靚，我仲要咗少少青蘋果西芹沙律添．另一款疑似加咗罐頭雜果咁款既沙律我就冇食到啦，西瓜都係，我都冇掂過．

跟住食春卷同雞翼，雞翼都幾好．但墨魚丸就認真麻麻，一口粉咁．

爸爸見ｄ春卷裏面冇肉既，即刻出去拎，仲一次過拎四條添，佢冇野吖麻，食瓜佢呀！後尾要我幫口食返條先搞得掂．

食完野，要去大出血，邊度？咪Paper Art咯！

樓下果間捐血站呀！

爸爸呢個卑鄙無恥，曾經係Bibi細個既時候帶埋佢去捐血站，佢幻想Bibi見到人地用針拮佢爸爸，會喊住咁去阻止醫護人員既行動架，跟住佢就可以懶係溫馨咁攬住Bibi啦．

點知，真係想創佢個心呀！Bibi淨係掛住睇哈姆太郎（捐血站有電視架），眼尾都冇瞄過佢呀．

捐完血，我見人地個個都有個環保袋同鎖匙扣既，點解爸爸冇既？係咪年紀大去捐血就冇架？

爸爸話如果我想要，佢就問人攞喎．梗係要啦，我要影低佢俾大家睇架麻．

呢個匙扣，驟眼睇冇咩特別，但原來大力ｄ擠壓，會有野bit出黎架！找初時係反轉呢粒血仔黎睇既，做咩後面有個窿既？大力ｄ按又有野凸出黎喎，所以初初我地以為佢係會疴ng ng既．

再睇返正面，先知原來對眼會眼凸凸既．

我唔夠力水，等爸爸黎演譯一下啦，係咪好勁呢！

我地食黑沙，貼咗一隻眼，係咪好似海盜呢？

我就話貼晒仲型仔呀，佢令我諗起IQ博士既宇宙大王呀！

============================================

感謝 May姨Blog 提供以上資料

May姨Blog的網誌: http://maylibibi.blogspot.hk/

============================================