咖啡弄

等‧一個人‧咖啡弄

今日難得放早，仲要係喺尖沙咀，把握機會去朝聖！早就想試試咖啡弄，曾經打算同埋爸爸媽媽去食，但餐廳不接受訂位，冇奶油要兩老陪我等餐死架！試過撩拾爺陪我去銅鑼灣嗰間，但每次去到都勁多人排隊，拾爺唔想排……今日，冇約人，自己去，等唔等，由我話事！

以為尖咀嗰間同銅鑼灣一樣要喺樓梯排隊，想一鼓作氣衝上去，點知……行到樓梯口，就被人叫住，問我係咪已經有位……我話冇，佢就叫我去出面排隊……行番出去，條街有三個人排緊隊，我見人唔多，於是就行埋去排。等等等，前面個男人啲朋友到埋，一共三個人，聽佢講頭先餐廳放咗一批人入去，所以突然排前咗好多。等多一陣，waitress走嚟問我哋幾多位，佢聽到我一位後，就表現驚訝，先俾飛我後面一對couple叫佢哋上去，再call上邊問有冇位俾到我，然後再俾飛我上去。其實……佢早啲問我呢個問題，我可能根本就唔駛喺到等位！

上樓梯，入到餐廳，又見一排凳俾人坐喺到等，當然，啲凳唔夠坐，我哋只能再等。不過，我只係企咗一陣，就有waitress問邊個一位，我應完佢後，佢就帶我行入餐廳，問我坐bar枱位o唔ok，一支公我當然ok啦，跟住佢就指指個位，叫我自己坐低，同時話我知呢到用餐時間限時為個半鐘。

一上樓梯，就見到餐廳招牌。

餐廳環境

我坐嘅bar枱位，望街景。

坐低後，睇menu，其實呢到啲嘢食唔太啱lunch時間，不過，一場嚟到，都想試試個waffle，見到抹茶，好想order，但又覺得冇奶油唔試吓呢到嘅果茶，於是就叫咗﹕

冰鮮果茶 ($58)﹕好大jar！得個半鐘去飲，對我嚟講真係唔太夠……味道酸酸哋，幾開胃！鮮果有蘋果、橙、檸檬、calamansi、plum等，食客可以邊飲果茶，邊食水果。我最最最開心係有calamansi同plum呢個組合，以呢兩樣嘢做飲品真係好好味！香港好少餐廳有呢類飲品，一路飲住杯嘢，一路覺得自己去咗Malaysia咁。

草莓冰淇淋鬆餅 ($58)﹕賣相討好，但味道唔好……Waffle熱辣辣上碟，但外表卻唔夠crispy……係有啲脆，但只停留喺最最最表層嘅薄薄一重……更多嘅係「淋」……Waffle唔夠crispy之餘，蛋糕味亦唔突出……不過，之前上網已經睇過有人表示呢到嘅waffle只屬一般，加上幾年前去台灣，試過另一間以waffle聞名嘅餐廳，但食到嘅waffle都係令人失望，所以我對呢到嘅waffle都係冇抱有任何希望，是以，食到呢個水準，亦屬我意料之內。鬆餅份量十足，士多啤梨數量亦唔少，不嗜甜嘅我，又再一次食唔哂……

埋單$128，性價比低！

評分時間﹕
食物：一般
服務：一般
環境：一般
衛生：一般
價錢：Overpriced (飲品合理，食物偏貴！)
總結﹕純飲嘢之選

餐廳資料：
咖啡弄
尖沙咀漢口道38號漢興大廈1樓
23685828

============================================

感謝 honeyhinbaby 提供以上資料

honeyhinbaby的網誌: http://honeyhinbaby.wordpress.com/

============================================