媽媽堅持今年嘅團年飯，一定要食「屏山盆菜」，縱使我哋反對，佢都一意孤行，仲自行打電話訂咗一盆中size嘅添，佢更口出狂言，憑一己之力，足以奉盆嘢番屋企……爸爸唔放心，上個禮拜自行探路，打算今日同媽媽一齊去拎，我當然大加反對！反正我同拾爺今日開始放假，我一早預咗去做苦力。之前同姑仔及奶奶提起呢件事，姑仔提議我call van，我問過價，都係百六蚊到，好相宜！噚日向媽媽提議call van，佢唔肯……言談間，佢誤會我阻止佢去拎嘢，仲省咗我一大餐，嬲到我即時whatsapp各兄弟姊妹大吐苦水！嫂嫂知道後，就叫哥哥打俾媽媽傾吓。結果，哥哥打嚟叫我call van。哼！媽媽就係咁架喇，唔駛講我都估到哥哥一定狂話佢，令到佢屈服，媽媽只會兇我……可惜嘅係，噚晚太夜得到媽媽首肯，電召中心收咗工……到今朝再打去，人家話好多司機都收爐，著我要車前一個鐘頭先再打上去……本來拾爺病咗，call到車我就自己同媽媽去拎盆菜，等拾爺可以在家多休息，但而家call唔到車，隨時要自己拎，想唔打搞拾爺都唔得……
今日本來仲約咗國泰佢哋食lunch，但我正打算換衫外出時，又肚痾……為免一陣食完嘢唔舒服，陪唔到媽媽去拎盆菜，我缺席聚會。
同拾爺兩點幾出發，三點半到天水圍站會合媽媽，再一齊行去屏山盆菜。叫咗媽媽喺A出口等我哋，佢卻去咗B出口，仲話嗰邊先有輕鐵搭……一定係因為爸爸上次嚟搭輕鐵，所以佢就以為我哋都要搭。其實由A出口行去，15分鐘到就到架喇。
一行出站，媽媽即刻質疑我哋，又話冇路又話冇人行……我同佢講拾爺帶病上陣，叫佢唔好再咁多挑剔。點知媽媽竟然怪我帶埋拾爺嚟，話我同佢兩個已經ok……佢真係以為盆盆菜好輕……
行到去屏山盆菜，但見門口枱上一盆盆嘅盆菜就咁放哂喺到……又唔係雪住，又唔係熱住，感覺好唔衛生……媽媽講低姓氏，店方就包起屬於我哋嗰盆，媽媽俾錢後，我同拾爺就拎貨。嘩！重到呢！媽媽話佢打嚟訂盆菜時問對方自己一個拎唔拎到，對方答佢可以，但今日我哋嚟到，一個店員叫我哋輪流拎話好重，另一個直情叫我同拾爺一人拎一邊。雖然我一早預咗佢重，但對於舖頭嘅人亂咁噏當秘笈，真係好不滿！
我同拾爺一人拎一邊，將盆菜捧至天水圍站，先放低，由我去customer service到問吓有冇巴士搭番娘家，之後再將盆菜捧至D出口，過對面先搵到車站。問路時為四點，喺車站等咗一陣就有車，架車開得好順，我哋落車後，本想轉的士番屋企，但截唔到，於是再搭小巴，番到屋企都只不過係5點鐘。
我同拾爺捧盆盆菜捧到又攰又肚餓，先落樓食杯越南粉，再番屋企等各人番嚟食團年飯。
是夜，各人圍住盆盆菜食飯，其實盆嘢味道一般，絕對唔值得我哋捧得咁辛苦，甚至係山長水遠去食囉！
同場加映鬼馬小王子！
小王子被媽媽訓練到一聽到「ET phone home」，就會伸出小手指同人接觸，一講驚驚，就會拍吓心口，好鬼得意呀！食完飯，媽媽俾咗半條蕉佢食，我故意走去叫佢俾我食，佢唔肯，我就不停R佢，真係出聲兼狂R佢個body，R到佢煩時，索性扭轉臉，收埋條蕉唔俾我食。
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
