同拾爺坐低後，先遞上兩張團購券，再研究餐牌。餐牌上嘅食物樣樣都好貴……所以，最後我哋叫咗一個最平嘅set($198)同埋Penne Carbonara($108)。
叫完嘢食後，waitress們遲遲未送上水，我見隔離枱兩位小姐都冇水，以為呢間餐廳好似啲超高級餐廳咁，飲水要收錢啦，所以都費時叫佢俾水我。點知…… 到我同拾爺差唔多食完時，有另一pair人入嚟食嘢，佢哋坐底冇耐，waitress就送上兩杯水！嗰刻我先知道，呢到嘅水係唔駛錢架！不過，你唔問，佢 就唔俾！我真係唔明，香港地，除咗某啲飲水收錢嘅餐廳唔會一嚟就俾水你之外，仲會有咩地方係咁(快餐店冇得講啦！)﹖就算係一間茶餐廳，你一坐低，啲侍應 都會俾杯茶你啦。去茶餐廳食嘢要幾多錢啫﹖最多咪幾十蚊一位！人哋賺你少少，都會俾杯茶你啦，但呢到﹖一個set收人最平都過二百，一杯水都唔捨得斟俾人 飲﹖！駛唔駛咁孤寒﹖！如果佢哋個policy係飲水要收錢，我反而接受到，始終呢到係中環，但而家係free of charge架！咁點解唔俾﹖呢啲係乜嘢service﹖！可能個waitress見我眼超超咁，知我不滿自己冇水飲，所以俾完嗰枱，就即刻斟俾我哋， 但……我哋都就食完啦~~之後入嚟嘅客，就位位都有水飲……哼！
餐廳先上我哋團購嘅鵝肝，大家可以睇吓張相，係咪細到嚇死人﹖！仲細過隻普通匙羹！簿到風都吹得起！
因為之前上網啲人話個鵝肝唔夠熱，所以我哋趕住食，怕遲咗變冷盤。唉……蠢咗！食完先醒起張coupon有寫明個鵝肝重量，我係見到個weight ok先買架！但而家個weight好明顯唔ok啦！我即刻上網check番，發覺個weight應該係100G，佢張coupon係寫明「足100G法國 鵝肝」，但我哋食嗰兩塊加埋都冇100G呀！如果我早啲醒起，我一定唔會收貨！而家食咗落肚，冇得argue添……點解我會咁蠢架﹖！被搵咗笨已經係蠢， 仲要唔記得去反抗，真係蠢上加蠢呀我！
呢塊鵝肝佢仲話原價要$128，我真係想講粗口！鵝肝我唔係食得好多，但都去過唔同嘅餐廳食，俾佢高級甚至差唔多級數嘅都有，價錢相若，但份量就相差得遠！ 如果佢寫得原價係$128，就應該俾番$128嘅貨我！我以為佢收平一半，係為咗吸引團購客堂食時食其他嘢增強營業額，所以呢個starter唔會呃我 秤，點知原來係我太天真！(如果係成個set嘅團購，好多時都係標高價錢後再減俾你，做到好似好抵咁！又或者份量減少嚟賺你。)好，其實我都預咗會被搵少 少笨，我仲可以接受到佢將原本個鵝肝嘅size減半，但而家好明顯得三分一(其實都唔知有冇……)……如此貨不對辦，我同拾爺實在難以接受！
Set dinner嘅salad用個碗仔上，外觀唔討好，算！上soup of the day時，發覺個mushroom soup用嘅碗竟然同兜salad係一樣架！嘩，好求其呀！佢可唔可以尊重番啲食物同食客們呀﹖！最過份係，冇湯匙供應囉！飲湯嘅匙羹係圓型架嘛，餐廳完 全冇提供，要我哋用普通匙羹……Ok，如果呢間係茶餐廳，又或者係啲低級數嘅西餐廳，我都可以接受！但佢收我我呢個價錢(成$198)，我真係接受唔到 囉！我諗花園餐廳都識俾多隻匙羹啲客用啦！佢啲收費有冇咁貴呀﹖！貴到水又唔俾人，匙羹都唔可以用咁多，費時自己要洗得多，多咗用水量呀﹖！
Salad味道一般，醬汁撈得唔均勻，食到尾時有啲「乸」喉嚨……個湯都算有啲蘑菇味，好彩餐廳未衰到狂溝水溝淡佢。
拾爺一直疑惑點解呢間餐廳唔提供餐前麵包，原來跟湯嚟。即係，如果你唔叫set又或者冇叫湯，就唔會有包食……又一孤寒到死嘅行為。
兩個pasta同時上場，一個係散叫嘅Penne Carbonara，另一個係French Blue Mussels in White Sauce with Spaghetti。
先講前者，一上碟，見到終於有一樣嘢係大份量啲架喇，心諗額外俾錢果然係唔同啲。點知……拾爺提醒我望清楚，唔望由自可，一望就把幾火！喺碟Penne Carbonara上面嘅綠色物體，唔係乜嘢herbs，而係蔥！係蔥呀！而家食pasta呀，唔係食雲吞麵呀，落蔥花﹖！佢係咪有病呀﹖！收人$108嘅Carbonara竟然連herbs都慳！佢駛唔駛咁鬼孤寒呀﹖！落少少herbs要用佢幾多錢呀﹖！都已經唔係收得平架啦，$108我覺得已經係收埋中環嘅貴租價架喇！去過一啲高級商場或稍為坐得舒服嘅舖頭，都係收人幾十蚊架之嘛！我去過唔少價錢貴但份量細嘅餐廳開餐，都會呻吓佢哋份量俾得少，但起碼用料都有番咁上下，但今次呢間﹖竟然連料都慳，我真係接受唔到囉！真係好過份，好冇良心！
另一碟French Blue Mussels in White Sauce with Spaghetti因為跟set嘅，所以份量少少。啲青口冇特別，意粉又浸哂喺啲白酒入面，唔係我一向喜歡嘅作法……
餐飲拾爺要咗杯咖啡，飲完，我哋就快快埋單，離開呢個鬼地方。當張bill送到嚟時，個銀碼奇奇怪怪咁，佢先將鵝肝個原價加埋上去再扣，睇死人！我哋之前問 過其中一個waitress收唔收AE card，佢話收。點知拾爺遞上AEcard後，另一個收錢嘅waitress又話唔收，一時一樣……我因為之前計過條數，唔係張單所講嘅$370，所以 自己再計，發覺佢收鵝肝嘅加一係以$168計算，但張coupon明明寫住原價係$128！我同佢理論，佢竟然話一向都係$168，佢之前收其他人都係咁 多。呢個係乜嘢道理﹖！佢一向收開唔代表係正確架，咁係佢呃咗其他顧客啫！我已經同佢講張coupon明明寫住原價只係$128，但佢就要我自己同團購網 跟進……雖然$128同$168個加一只係相差$4，但我就係唔益佢！唔好講話$4，$1我都唔想俾多佢！仲有，如果嗰塊薄到風都吹得起嘅鵝肝要收人原 價$168嘅話，我希望佢哋快啲執笠，唔好再影響香港嘅飲食業。錢係要賺，但唔係去到咁盡，同做到咁冇良心囉！敢問一句﹕閣下個企業良心何在﹖
我唔想再花時間同佢哋理論，因為我知唔會有用，所以嗰$8就當買多個教訓。但我會去信個團購網，要求佢哋負責！當然最後未必成功，但我一定要表達我嘅不滿！
呢餐連埋團購價，最後食咗$510，好貴(相對於佢嘅質素嚟講！)！唔值！我一定要上Openrice唱衰佢！
其實餐廳都冇咩客，根本就唔駛咁多waiter呀waitress呀坐陣，不如佢哋cut咁啲人手，放番啲資源落食物用料到仲好過啦！
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
