Pepperonis

番母校STAFF DEVELOPMENT，好興奮，因為真係好耐冇番去喇！！！

一早約咗亞頭、女俠、女副校同小肥食早餐，為咗呢個早餐，我六點起身，同拾爺一齊六點半出門口，搭車出去。當我仲整理緊衣裝時，拾爺已經催我話只剩三分鐘，我回佢一句叫佢自己出門口先，點知 佢又扭計話我明明應承同佢一齊搭車，搞到佢白開心。為咗安撫呢個近排成日扭計嘅大朋友，我趕頭趕命咁搞掂哂啲嘢，衝出去陪佢。

同拾爺一齊搭車番學好開心！平時上車後要瞓覺嘅拾爺，因為要陪我一齊坐，又只得下層有位，所以喺坐得唔多舒服下，改為陪我傾偈，我覺得好幸福呀，哈哈！

拾爺之前話我冇可能準時到達食早餐嘅 地點，點知今日班車開得快咗，所以我係準時到嘅！等緊過馬路時，已經見到亞頭行入去喇，所以我跟住佢尾，好快兩個人就搵到位一齊坐。亞頭好利害，喺屋企搵 到幾張剪好嘅coupon俾我哋用！本來我只係拎咗張買任何嘢都送火腿通粉嘅coupon出去，但亞頭就叫我俾埋張減兩蚊嘅去買，佢話收銀到時唔俾先算， 咁我買時就真係兩張俾哂佢，估唔到真係得喎！哈哈，廿一蚊食到大份早餐，好抵呀！

小肥因為唔願早起身，所以冇嚟到食早餐，我哋食完，佢先嚟join我哋一齊行去間學校。今日頭半截係坐喺hall到，聽完某班人唱歌，就聽耶穌。負責領詩嘅，詩歌唱完一次，又叫人唱多一次，好悶……牧師嘅講道，因為佢把聲冇起伏，又係個悶字……

完咗上半場，落去食嘢，其實都飽飽哋。未拎到嘢食，就見到以前個econ miss Miss Tsang！其實正確嚟講，係佢見到我先，然後走嚟我面前，見到佢真係好開心！其實頭先喺hall時，我已經不停望佢學校嗰排，但都搵唔到熟悉嘅臉孔……

同miss傾偈先知大家住同一區，佢 之前仲見過我添，不過嗰陣係番學時間，佢見我行色匆匆，佢自己又趕住打的，所以冇叫住我。傾咗一陣，攞咗個聯絡，我就埋番自己堆。點知……去拎飲品時，又 見到另一個中學同學。想當年，我同佢都係全班最早番學校嘅人，我哋番到去，會一齊開枱(真嗰隻！)，然後溫吓書、做吓功課，不過，好多時都忍唔住掛住吹 水！

下半場開始，大家分組聽talk，今次我揀咗「認識自己嘅儀容」！個speaker係某芭蕾舞學校嘅校長，呢個校長，一睇佢個款就覺得佢喺到扮elegant……佢講嘢時，叫我哋要注意自己個 posture，但坐得直時，不忘放鬆臉部表情。佢係咁叫我哋，但自己就全程皺哂眉咁講。個talk明明係認識自己個儀容，佢講講吓，就變成講佢自己點樣 識咗個老公一個月就嫁俾佢，然後仲離譜到教我哋點樣「釣金龜」！成個talk根本就係離題萬丈，冇內容可言。呢個呃飯食嘅校長，講唔到幾句就sell自己 間學校有咩課程，然後又show off自己點樣吸引個老公，我最憎嘅，係佢好明顯嚟之前冇prepare到， 見到個powerpoint彈咩字，就即場諗出嚟。所以成個talk個organization好差！妳要嚟sell嘢都算啦，但唔好連sell嘅準備都 唔做呀，好唔專業！可惜……在場大部份嘅人又聽到好enjoy，笑點仲奇低，我同同名人覺得完全唔好笑嘅嘢，啲人笑到癲哂……想點呀﹖為人師表，可唔可以 唔好咁膚淺，係咪教吓妳/你點識異性就好正呀﹖有冇咁飢渴呀﹖究竟我呢班同工知唔知佢講咗成個鐘嘅嘢都係離題架﹖！唔好搞到自己執正個外表只係純粹為咗吸 引異性咁cheap好唔好﹖！

完咗個無謂talk之後，就同班為食兵團一齊殺入西貢搵食喇！一行八人，由嗰到嘅地頭蟲亞石帶隊，去Pepperonis！叫咗以下幾樣嘢食﹕

Seafood salad: 議員太太話要食海鮮，又有人提議要食salad，於是就叫咗呢個。碟嘢一嚟到，就俾其中四個人一人夾走咗一隻蝦，傳到嚟我到時，已經冇得食喇……啲菜唔算好新鮮，個sauce都係普通，同其他dishes比，呢碟唔夠吸引！

Nachos: 好食！其實我不嬲都唔太好呢樣嘢，但呢個又真係整得唔錯！有好多牛油果俾你點嚟食，再唔係個sour cream都夠開胃，仲有pat肉可以送嚟食，正！

Potato skin: 正！一嚟係因為我好鍾意食薯皮，二嚟係因為佢有好多料釀咗喺入面，其中有我至愛嘅cheese！

Pizza: 要咗個half half，一半要招牌pizza，另一半要waitress recommend嘅New Orleans，前者真係好普通……啲料都唔係我鍾意食嘅，但後者就正到震！！！加咗sour cream，酸味味，好開胃！

Carbonara: 大家都只係食咗少少，因為叫得太多嘢，佢仲咁creamy，大家都食唔落。但其實，佢咁creamy，係好好食架！可惜，我哋個肚唔爭氣……嘥哂啲嘢添……

Linguine Vongolle: 好味！不嬲都鍾意食Linguine 嘅，加上食咗咁多濃味嘢，呢碟冇咁漏。

Dinosaur Ribs: 亞石果然冇介紹錯！呢度嘅ribs真係幾唔錯！平時食開嘅，唔係骨嘅比例高出肉嘅N倍，就係啲肉嚡到食甩人棚牙……今次呢個完全冇呢兩個問題，真係食到好多肉，啲肉又夠淋，yummy！

其實仲叫咗樣嘢，但我唔知個名，應該係雞類嘅嘢啦！嗰個都好好食架， 又係有sour cream喺面。嘢飲，我哋叫咗三杯chocolate milkshake、兩杯lemon tea同一杯薑味汽水。我飲chocolate milkshake，唔太鍾意，好liquid，我覺得milkshake唔應該咁「水」嘅！而且佢哋冇落vanilla雪糕去整，唔好飲亦唔抵飲……

埋單$1209，飽到夜晚食唔落飯。