今日包車遊，約好司機九點半酒店門口上車，由於我同拾爺預計呢間酒店嘅早餐唔慌好食，所以較咗八點鬧鐘，八點半先落樓食早餐。梳洗緊時，司機大哥打嚟confirm時間，我唯有硬著頭皮，用我超爛嘅國語回應。
落樓食早餐，喺餐廳見到媽媽已經坐咗喺到食，同拾爺望望啲嘢食，果然係冇啖好食……
我同拾爺唔想行出去搵食咁煩，於是坐喺到食少少。食食吓，其他人都落樓，大家噚晚明明話唔會留喺到食早餐，但結果又費時行出去，個個都留低食少少。細妹話佢哋噚晚喺夜市食到又平又新鮮嘅海鮮，爸爸都食得好開心，但噚晚玩到咁夜，爸爸好明顯係過累喇，佢今朝瞓到八點九先起身，平時會半夜紮醒嘅佢，噚晚整晚冇醒過呢！
食到九點三，我同拾爺上番樓去個洗手間，我順便換番衫，本來今日著咗條連身裙，但見今日天色唔多好，有風又會落雨，所以都係換番條褲。
再落樓，大家齊集餐廳，獨欠哥哥一家，原來小王子頭先食食吓粥，貪心搶蛋食，點知一食就嘔……可憐哥哥今日特登同小王子嚟一套父子裝 (AC米蘭波衫)，相都未影，小王子已經將佢嘔污糟咗。佢哋講講吓，我都聞到陣陣嘔吐物味，頂唔順即刻行出街外。其他住客都利害，聞住陣味仲可以繼續食嘢，我自問做唔到……
司機大哥準時到酒店門口，但因為哥哥佢哋仲未落嚟，我哋先同司機大哥講聲先。等到哥哥佢哋落樓，我哋就分兩部車，先向野柳出發。哥哥一家同爸媽，仲有細妹一部車，我同拾爺就同大妹同埋妹夫，仲月肥仔一架車。由酒店到野柳，司機大哥話需要45分鐘，架車行行吓，個天就開始落雨，今日天氣認真唔好……車子往野柳途中，各人都瞓著咗……
到達野柳地質公園後，司機大哥約定我哋等候位置，著我哋一出嚟就call佢，到時佢再揸車嚟接我哋。
喺野柳地質公園門外，有一車車嘅旅遊巴，滿載國內同胞，呢班人仲好有霸氣，不論老幼，沿路不停推開所有阻礙佢哋通道嘅人們往前走，連司機大哥都話佢哋討厭！司機大哥好好，借咗幾把遮俾我哋，臨走前再三叮囑我哋打俾佢同等候嘅位置。
等緊大妹買入場券(每人NT$50)時，聞到陣陣尿味，個入口真係好臭！大妹買好飛後，大家就入場喇。沿路好多國內同胞，都係嗰句，好有霸氣！
野柳地質公園唔算好大，但因為呢到好多國內同胞，加上又大風兼落雨，寸步難移下，搞到我哋花咗唔少時間喺到吹風……行到咁上下，爸爸第一個投降話唔要再往前行，哥哥同嫂嫂因為之前嚟過，所以佢哋就帶埋小王子陪爸爸，我哋就陪媽媽繼續向前行。媽媽好利害，無懼風雨，見嘢就影……
一大班國內同胞排長龍要同呢個女皇頭作近距離嘅合照，我哋真係冇咁得閒，遠遠影張相，到此一遊就算。
寫到明不准攀爬，前面幾個國內大嬸竟然想騎上去，我哋人多，都唔需要個個開口，媽媽同大妹出聲，叫佢哋睇牌，我哋其他人怒睥，幾個大嬸唯有乖乖企定定影相。
行完公園，又被迫行條商店街先可以正式離開……
行緊商店街時，竟然同哥哥佢哋相遇……佢哋都唔知喺到stay咗幾耐……
雖然才剛食完早餐，但大家見到美食當前，又忍唔住狂掃……肥仔見到一盒盒海鮮，即刻買盒魷魚 (NT$100)試。爸爸買完海帶湯，索性坐低慢慢嘆，於是大家就陪爸爸坐低食嘢。
大家喺呢間小吃店到點咗一大堆食物，有魯肉飯、魚丸湯、炒蛤蜊、蚵仔煎等等。埋單唔知幾多錢，大妹負責。
行出商店街，先打俾司機大哥，再喺7仔門口等車。吹咗兩個幾鐘風，我開始感到唔舒服。心知應該中咗招，今晚要好好休息，如果聽日喉嚨都仲係唔舒服，我一定係感冒架喇。
離開野柳，司機大哥先車我哋去睇「陰陽海」。小王子呢個時候又瞓咗覺，搞到哥哥冇得同我哋一齊望海。
落車同大妹第一時間去流動洗手間，好彩個洗手間都算乾淨，係臭咗啲囉，但忍住道氣去咗佢，好過之後再忍唔知幾多個鐘。
司機大哥話山上嘅礦物質流到大海，令到海水染色。
呢到不論咩季節同天氣，都會呈現兩種顏色。
離開陰陽海，司機大哥車我哋到黃金瀑布。
就咁望個瀑布唔知點解叫「黃金瀑布」，但再往下望，就知其名嘅由來。小王子仍然瞓緊，哥哥要看住佢，呢到影嘅大合照冇咗哥哥……
下一站，係我哋冇要求，但司機順到帶我哋去嘅黃金博物館。
本來司機想我哋去睇吓嗰嚿重220公斤嘅黃金，佢話有誰可以一手拎起，就可以帶走。但因為我哋之後仲要去九份同十份，所以喺呢到只係入咗個四連樓，就匆匆走人。今次到嫂嫂要睇住小王子，冇入到去。
入呢到參觀，要排隊等一批批入，因為我哋要先睇片，再跟導遊參觀。
放片室
女中室
台所
茶之間
到達九份，司機大哥約定我哋兩個鐘後見，我哋先行去7仔買便利雨衣 (NT$39)，再一齊入去舊道口牛肉麵開餐。
牛肉麵 (大妹找數，唔知幾多錢……)
食完牛肉麵， 大家都約定四點三到喺7仔集合再行去落車處等司機。
其實我同拾爺對九份嘅興趣不大，呢到只不過係一條又一條嘅商店街，已經冇咗「悲情城市」嘅特色。唯一令我覺得悲嘅係，我嚟第三次，每次都落雨……條街又窄又多人，落雨去行，真係好悲！
冇太大嘅購物意欲，就算食小食都冇乜興趣……行行吓見到樣嘢未試過，於是就買份嚟試試。
簿簿嘅麵粉皮包住花生糖同雪糕，NT$40一份，唔好食……
店主其實都唔算好忙，但就著客人自己找續。
同拾爺一直往前行，行到某間茶館，入去參觀時，發現有洗手間，雖然係臭咗啲，但尚算乾淨，忍住道氣，快快去咗佢！
離開茶館向前行，撞到哥哥佢哋，原來哥哥、肥仔同細妹陪住爸爸一直行，爸爸仲買咗啲雪菓子，成NT$35一粒，唔平架！佢請我哋一人一粒，但當我想拎抹茶味時，佢卻唔俾，話係哥哥要咗……哥哥請我食咗啖，肥仔又請我食咗啖藍莓味嘅，爸爸就俾咗粒士多啤利味嘅我。我哋都覺得味道唔錯，但拾爺唔鍾意……
之後，爸爸佢哋先行折返，我同拾爺就繼續向前行，行到一間叫吾殼茶糧SIIDCHA嘅店舖，見佢裝修簡潔，感覺幾舒服，就入去睇吓，店員請我哋試飲咗杯白桃茶，味道好清新。我再要求試飲「抹茶奶綠」，味道唔錯！其實呢到啲茶價錢偏貴，但我太鍾意飲抹茶喇，所以任性地買咗包抹茶奶綠，100公克嘅包裝，盛惠NT$380。本來睇中嘅係罐裝份量，但店員知道我買嚟自己飲，就介紹我買呢個比較優惠嘅包裝。
行番集合點，同大家一齊等司機，當然，一早打咗俾司機叫佢嚟接我哋上車。
上車後，就向十份出發。肥仔幾年前同媽媽仲有細妹嚟過，佢話個十份瀑布非常弱雞，不看也罷！對於見識過Niagara fall嘅我嚟講，大部份瀑布都可以唔睇架喇，呢個仲要收錢，我亦都冇興趣……但係……當車子停低，司機大哥指示我哋行入去後，爸爸同媽媽去到收費處前，就話一場嚟到一齊入去……哥哥一向豪爽，一句幾千蚊機票酒店都咁俾，嗰NT$100不算什麼。於是，我哋就齊齊入去。老老實實，唔值嘅嘢，就算只係NT$100我都唔想俾！
入到去，見到個瀑布，果然不負眾望，弱雞到不得了！
真心呃錢之作！
入到去，爸爸只係停留喺高層，睇到個瀑布就話要走……我同拾爺聽到後都O咗嘴，NT$100入到去，睇一眼就算……哥哥陪爸爸先行離開，我哋其他人就陪媽媽落下邊，望真啲個弱雞瀑布。去到下一層，媽媽想同我哋嚟一張大合照，但係……當我哋排排企好等媽媽影時，駐場貓咪就會走埋嚟……我怕貓，隻貓一行近，我就嚇到即時走開，搞到影唔到相……為咗避開隻貓，我哋行過另一邊去影，點知……隻貓好似知我驚佢咁，喺我哋排好影相時，又專登走過嚟，仲故意走去我到……我本來仲想扮鎮定，捱到媽媽按下快門一刻，但係……隻貓越行越近，媽媽卻仲未準備好……最後，我都係嚇到走開咗……最後，大伙再往下落一層，先影到張大合照。
離開十份瀑布，天色已晚，我哋決定取消平溪之行，反正天氣唔好，都放唔到天燈，都係早啲去餐廳好過。本來大妹提議唔去餐廳食晚飯，直接去行夜市，但我同拾爺表明唔去夜市，爸爸想一家人一齊食嘢，所以就話先去餐廳，再到夜市。
由十份瀑布行番出去搭車，再經過頭先見到嘅火車路軌，竟然有火車行駛！
大妹頭先明明話唔會再有火車行駛，仲行上火車軌……好危險呀！
上車前，同司機講唔去平溪，叫佢直接車我哋去餐廳，因為司機大哥話車程超過一個鐘，所以上車後，大妹就打去餐廳改booking時間，本來book咗六點九，現改為七點三。司機大哥聽到後，就話我哋應該早啲俾佢知我哋book咗餐廳，咁樣佢可以幫我哋好好安排時間。
回程時，大家又不自覺瞓著。車子七點到已經到達餐廳門口。包兩架車，本來係NT$5800，但哥哥一早叫咗大妹俾夠NT$6000，司機大哥好好，本來講好只包九個鐘，但佢冇charge我哋超時嘅錢。
落車後，我同拾爺先到餐廳攞位，餐廳安排我哋坐樓上，一睇張點菜紙，可以確定係我同拾爺上次嚟時一吃愛上嘅餐廳啦！呢間餐廳搬咗舖，因為間餐廳個名好特別，根本打唔到出嚟，所以我本來以為食唔番架喇，但又被我無意中喺網上搵番佢出嚟，其實，我都唔係100% sure就係呢間架，但呢刻見到張點菜紙，我sure喇！
餐廳名，你話點打呀﹖！
坐低後，我同拾爺第一時間點「路邊野雞」，然後再問店員有咩介紹，仲拎份menu俾我哋，就話全版都係推介，於是我哋就跟住版推介嚟點。叫咗﹕
香酥皮皮挫 (NT$180)﹕好油好熱氣……
破卜子炒山蘇 (NT$160)﹕店員話呢個係台灣菜，味道嘛……好一般……
冠軍滷肉飯 (NT$40 x 3)﹕以前食覺得好正！而家再食，唔知係因為有咗expectation，定係佢真係退步咗，我覺得啲肉太肥，亦太油喇……
羊肉沒了 (NT$180)﹕好羶好熱氣！
三杯田雞 (NT$350)﹕好普通……
路邊野雞 (NT$160)﹕仍然係咁好食！外層脆，內裡唔嚡唔乾，醬汁酸味味，非常開胃！因為我同拾爺太鍾意食，所以多點咗一份。
蒜泥鮮蚵 (NT$180)﹕好普通！
麻油松阪豬 (NT$200)﹕最搵笨之作！普通到不得了，份量卻叫人食又嫌嘥quota，唔食又嘥錢……
蚵仔湯 (NT$60)﹕爸爸讚清甜，我就覺得好淡……
百花油條 (NT$170)﹕好好味！個個都讚好！店員話呢道最好賣！油炸鬼脆口，內裡釀入蝦膠，配埋個甜酸汁，好醒胃！有驚喜！
惹娘燒蛋 (NT$100)﹕又一驚喜之作！雖然味道唔及百花油條，但都好好味！
鍾意佢個蛋未完全熟透！
蛋黃瞎子 (NT$220)﹕味道唔錯，用鹹蛋炒蝦，夠香口！
食到咁上下，問媽媽拎咗幸福傷風素嚟食，希望食咗藥，加今晚夠休息，唔會真係病啦。
由於我想去寶茶買紅茶、綠茶糖，於是就同拾爺先行離開。本來係打算行去南京東路站，再搭一個站去忠孝復興站，點知俾我哋誤打誤撞地行咗去忠孝復興站，慳番啲車錢。只係……去到寶茶見佢閂咗門，先識睇番自己research嘅資料，發現原來星期日舖頭唔開……
買唔到紅茶、綠茶糖，改去Sogo行咗一圈，喺supermarket買咗盒蘋果牛奶同西瓜牛奶 (共NT$60)，就搭車番酒店。
是晚，其他人全部去士林夜市，我上床瞓時，先聽到媽媽同細妹番嚟。我喺到諗，究竟我係咪爸媽親生嘅呢﹖點解我啲兄弟妹同爸媽都咁鍾意行夜市，只有我唔喜歡﹖我真係覺得夜市又迫又冇得舒舒服服咁坐低食嘢，食嘅嘢又唔特別好味，仲要搞到咁夜，係活受罪！人家去台北係為去夜市，我只想去出色嘅餐廳享用美食。
後記﹕呢餐大家都以為只需二千幾台幣埋單，點知翌日細妹同我講要成四千幾，原來餐廳所有嘢同我哋嚟咗雙份，唔怪得份量咁大。細妹講起，我又記得我哋點滷肉飯時，佢有講過嚟雙份，但我哋以為只係滷肉飯嚟雙份，結果佢乜都嚟雙份……雖然，以佢食物質素同份量，收四千幾台幣都唔算貴，但我同兩個妹都覺得餐廳唔太老實。媽媽話係大家溝通有問題，人家以為我哋明白係所有嘢嚟雙份，但我覺得就算之前講咗嘅嘢嚟雙份，我後來多點嘅路邊野雞，佢都唔應該私自幫我加大份量。呢個位，令我同細妹都對間餐廳印象大減！細妹話雖然餐廳嘢食唔錯，但佢覺得餐廳唔老實，決唔會再幫襯！所以，上圖嘅嘢食份量係價錢嘅雙倍！
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
