雖然哥哥約大家九點食早餐，但我同拾爺都想爭取時間浸溫泉，所以七點就起身，打算八點去食早餐。
起床後發現噚晚放好嘅溫泉水竟然流走咗大半……不過，咁樣我哋反而可以再放溫泉水，有凍有熱，期望可以食早餐前浸一浸！只係……啲水真係太熱，雖有細半凍溫泉水中和，但啲水仍然係熱到我哋連腳都放唔入……我倆決定先落樓食早餐，番嚟再浸！
落到餐廳，其他人都未到，我倆就挑咗個室外位嚟坐。
食食吓，細妹同爸媽到咗，大伙就搬出草地嘅大枱食早餐。
出面有兩張大枱，等哥哥佢哋嚟埋，我哋一家人就雄霸兩張枱。
餐廳早餐選擇尚算可以，有中式、西式同和式嘅供應﹕
大家一邊食一邊傾偈，拾爺食飽，又去撩小王子玩。
早上嘅小王子神情呆滯……
拾爺主動相陪，氹佢開心！
小王子好鍾意拾爺隻錶，拾爺每次都會拎隻錶出嚟引佢。
拾爺同小王子玩「飛」(即舉高小王子)時，一放低小王子，小王子突然指向前方一背向我哋嘅男子嗌﹕爸爸，但其實嗰個男人唔係我哥哥，佢只係著咗件同我哥一樣顏色嘅衫……該子同我哥身型相近，所以小王子誤會咗……拾爺即時糾正小王子，話嗰個唔係爸爸，再指住哥哥同小王子講呢個先係爸爸，但小王子呆呆咁，仲望住該陌生男子……拾爺反應都好好笑，佢見小王子仲望錯人做爸爸，話好慘，笑死我。
同小王子玩緊時，佢唔小心將嘢食整跌落我到，拾爺即時叫我去抹吓條褲，但佢完全冇意欲去陪我做呢件事，原因係佢要繼續同小王子玩……我當時即時扭計要拾爺陪我啦，佢點可以錫小王子多過我架﹖！由於我扭計，拾爺無奈即時放低小王子陪我，但我哋番嚟時，小王子卻嬲咗我……佢以為我頭先鬧佢，所以拾爺都唔理佢，於是就唔show我……嗚嗚，我根本就冇怪到佢。哥哥佢哋迫小王子同我道歉，小王子卻係不情不願……不過，細路仔唔記仇，呢隻衰豬好快又同番我玩喇。
大家仲食緊早餐時，我同拾爺就番房浸溫泉。番到上去，啲水溫總算叫ok，我哋就浸喇。不過，我都只係浸腳。怕熱嘅拾爺，放隻腳落水都we嘩鬼叫，喺我一再強迫之下，佢先肯由浸腳同浸哂上身落去。
浸完房間嘅溫泉，我哋又趕緊換泳衣同泳褲到戶外風呂再浸。去到戶外風呂，大家一早到咗，原來呢到有供應浴帽，早知唔駛大妹幫我哋買啦！哥哥同嫂嫂聽完表哥意見，都有帶小王子嚟玩，揀咗啲水冇咁熱嘅池俾佢浸，但小王子呢個膽小鬼，驚死到不得了，個樣真係我見由憐呀！
唔知點解小王子帶起浴帽個樣好唔似香港嘅小朋友，我覺得佢有啲日籍feel呢！
難得有少少笑容
玩咗咁耐都係苦瓜乾look……
各人浸溫泉玩得好開心，只有媽媽唔浸……我見其他住客有影相，於是就番房拎相機，順便打去媽媽間房叫佢嚟睇吓個孫玩。拎咗相機，我就做隨團攝影師，周圍幫大家影相，反正我都浸唔到。
玩到十點幾，哥哥同嫂嫂先帶小王子番房，其他人都陸續離開，我同拾爺守尾門，玩到十點半先走。
離開前，著番件浴袍影張相留念。
約好大家十點九lobby集合。落到去，哥哥、嫂嫂同小王子已到，佢哋亦已交還房匙，我以為要集齊房匙先可以check out添，是但啦，哥哥還咗，我都去還，兼拎埋receipt。大家到齊後，就等shuttle bus到。點知大妹佢哋呢頭交鎖匙，嗰頭酒店嘅人就話佢哋漏低咗眼鏡……妹夫帶住副眼鏡，好明顯漏嘢嗰個係大妹！
今日嫂嫂應我同拾爺要求，幫小王子著咗件我哋買俾佢嘅橫條衫，等拾爺可以同小王子扮吓「偽父子」。
Shuttle bus到時，我哋準備上車，點知酒店個staff話冇我哋reserve位置嘅record，我一再強調有reserve到位，酒店嘅人竟然話我book嘅係十二點四嘅車，我即時否認，好肯定自己book嘅係十一點，呢到十一點退房，我book十二點幾嚟做乜﹖！好彩，shuttle bus仲有位，司機就叫個staff唔好同我argue，俾我哋上車。上車後，我記起噚晚個staff幫我mark低坐車時，明明就mark落張紙上方嘅timeslot，但頭先嗰位staff張紙嘅record，卻mark咗我哋去下面。大妹懷疑佢哋改動過個記錄。算啦，反正有位坐，冇嘅話我一定發癲！
離開春天溫泉會館，shuttle bus車到我哋去北投後，我哋就搭捷運去雙連站，一號出口右轉後向前走一小段路，就到我哋呢幾晚會住嘅酒店 — 新仕hotel。呢間酒店係細妹揀嘅，佢話要住得平……係就係好平，但唔係我同拾爺可以接受嘅住宿環境……
去到酒店，佢哋已經俾到房我哋，本來係打算用cash找尾數，但大妹提議錄卡，話自己啲cash要用嚟shopping……吓﹖我唱多咗錢嚟找酒店尾數架喎……
搞緊check in時，媽媽先發現自己帶嚟嘅陳村粉冇拎走，佢即刻怪細妹唔拎齊嘢。我哋覺得媽媽自己唔記得拎嘢，卻將責任推去細妹到唔啱，加上我哋一開始已經唔贊成佢由香港帶啲陳村粉嚟台北，搞到妹夫噚日拎咗全日，所以都幫細妹口。媽媽見我哋都唔幫佢，仍然死撐自己只係友善提醒細妹。我哋表示啲陳村粉不要也罷，媽媽卻原來緊張個飯盒……哥哥好忟，表示要坐的士幫佢去拎番番嚟，等佢唔好再講。媽媽仲唔知哥哥要發火，搞到我忍唔住要出聲叫媽媽唔好破壞大家去旅行嘅心情。
因為我同拾爺，仲有爸媽會多住一晚，所以我哋屬同一層房，不過頭兩晚係細妹同媽媽一間房，爸爸同肥仔，仲有哥哥、嫂嫂同小王子就住另一層。上房前，大家先約好集合時間。
一入到間房，又暗又細，同之前一晚嘅酒店房比相距甚遠……不過，兩者個價錢都相差好遠。
從住過會貼告示話自己呢到小盜猖獗嘅酒店！呢到真係得架喇！
冷氣機個制竟然係喺天花板……好白痴嘅設計！
放好行裝，就落樓集合，然後大伙就行去「老董牛肉細粉麵店」，因為嫂嫂要買麵包俾小王子食，其他人又行得奇慢，我同拾爺就做先頭部隊去攞位。
人齊坐好後，就點嘢食，叫咗﹕
牛肉捲餅 (NT$80)﹕芝麻好香，層皮好厚，略嫌硬咗啲，啲牛肉餡乾得滯，唔覺得好味。
牛肉餡餅 (NT$30 x 5)﹕唔特別好食，咬咗兩啖就俾拾爺包底。
燙青菜 (NT$40)﹕啲菜唔靚！
紅燒半筋半肉麵 (NT$190)﹕媽媽之選，冇食過，唔知好唔好味。
綜合拼盤 (牛筋、牛肚、牛肉) (NT$200)﹕大妹一食就讚話好入味，但我同拾爺只係覺得好鹹！><
蕃茄半筋半肉麵 (NT$205)﹕2012冠軍牛肉麵！蕃茄湯底幾開胃，麵質亦有咬口，牛肉唔韌，唔錯！
上品清燉牛肉麵 (NT$210)﹕2006冠軍牛肉麵！幼麵唔係我杯茶，湯底唔覺得鮮甜，牛肉係就係好淋，但完全冇牛肉味……
埋單NT$2320。各人都覺得呢到嘅食物水準好一般！
食飽就行去搭捷運，向動物園出發！
到達台北動物園，大妹負責去買飛，成人每位NT$60，爸爸有老人優惠，免入場費！
本來係想小王子嚟睇吓動物嘅，點知佢搭搭吓車就瞓著咗……
台北動物園都幾大，仲有好多唔同種類嘅動物睇。嚟呢到嘅人多數都係本地市民，好多家長帶同小朋友嚟睇動物，台北嘅小朋友都好活潑吓，不時聽到佢哋嘅尖叫同吵鬧聲……
本來係打算行一陣動物園就去內園站搭貓空纜車，但行吓行吓，時間唔早，行去內園站遠得嚟，又趕唔上尾班車，於是我哋決定唔搭纜車，行到呢到夠鐘閂門，就去台北101。小王子瞓咗兩個鐘，終於起身！
每次見到車車，小王子都會好興奮！
家有長頸鹿公仔嘅小王子，對鹿鹿特別有親切感。
大妹話斑馬見到佢兩個會以為係同類……拾爺話佢哋係橫條，斑馬係直條，大家唔一樣喎！
「偽父子」出場！
一心諗住嚟台北動物園同小王子一齊睇企鵝，可惜最後都係睇唔到……
離開動物園，行去捷運站時，大妹提議搭公車，嫂嫂睇到捷運站隔離有公車到台北101，於是我哋就改為搭公車，等咗一陣就有車，人人有位車，yeah~~架車亦好快到台北101，車費NT$15。
落車後，哥哥同嫂嫂帶小王子去換片，我要上洗手間，大妹同肥仔就先去鼎泰豐攞位。
去完洗手間，喺肥仔番嚟帶路下，同埋爸媽佢哋一齊去到鼎泰豐門口同大妹會合，大妹話餐廳方面話要等成個鐘先有位……本來想話四圍行吓，最後大家都係坐哂喺到就算。大妹話觀景台排長龍，我正打算同拾爺先去排隊買定飛時，大妹同妹夫原來早有此打算，仲做代表去咗買飛。
等等等，等咗45分鐘到，大妹剛買好觀景台嘅飛番嚟，我哋就有得入座喇。頭先等嘅時候已經點好嘢食，入座後就只需等食！
油燜筍 (NT$90)﹕味道一般。
炸醬麵 (NT$130)﹕水準普通。
小籠包 (NT$200)﹕從來都唔覺得呢到嘅小籠包特別好食，所以都係覺得好一般。
菜肉紅油抄手 (NT$140)﹕唔好食……
菜肉餛飩湯 (NT$140)﹕唔好食……啲菜肉感覺好散……
空心菜 (NT$170)﹕冇菜味……
肉絲蛋炒飯 (NT$160)﹕啲飯濕咗啲囉。
擔擔麵 (NT$100)﹕少辣，啲麵唔算好食，其實我哋仲點咗個麻醬麵俾爸爸，但唔記得影相。
蟹粉小籠包 (NT$340 x 2)﹕已經食過咁多次，再冇初時食到時嘅震撼了。但仍然覺得好食，嚟呢到都係為咗食佢。
A菜 (NT$170)﹕冇菜味……
紹興醉雞 (NT$280)﹕咁嘅質素收咁嘅價錢，我自己整好過！
酸辣湯 (NT$200)﹕辣！但食得辣嘅大妹佢哋就話一啲都唔辣……都幾足料，但唔會覺得特別好飲。
芋泥大包 (NT$80 / 2 pcs)﹕冇食到，一向唔鍾意芋泥，又甜又滯……
其實我哋仲叫咗豆沙粽子 (NT$70)同埋酒釀湯圓 (NT$100)，不過冇影到相……前者我只食咗一小啖，加上本人唔好紅豆，所以不予置評，後者冇食到，所以都係冇嘢好講。埋單NT$3311，性價比低！
食完都差唔多八點，同兩個妹即時衝去糖村買法式牛軋糖，每人買咗一盒 (NT$350)，因為我打算去寶茶買紅茶糖同綠茶糖，所以糖村嘅法式牛軋糖就唔買咁多喇。喺糖村買完嘢，大妹又衝到天人茗茶買茶葉。等大妹買好後，齊齊搭lift上五樓觀景台入口，去到見到大排長龍……但最慘係，我哋連排都未夠資格，因為未到我哋張飛嘅number……如果唔係爸爸想上去睇，唔駛錢我都唔上去，排咁耐……而家仲要我俾NT$500，真係想殺人！
等到我哋嘅number出現，我哋先可以開始去排隊……
排咗應該唔夠半個鐘，終於可以搭lift上去！最怕呢啲幾十秒就衝到咁高嘅lift，搭到個人浮吓浮吓咁……上到去，大家分開睇景，其時八點九到，約定九點三集合再上一層樓。
我同拾爺其實對呢到冇咩興趣，但俾咗錢上嚟，循例都要兜個圈，影吓相，但今日天色唔好……
九點到，我同拾爺就坐咗喺集合地方等大家，實在冇興趣再睇，加上我倆都已經好攰喇……
人齊後，就行上一層到室外睇風景，其實都係嗰個景……
之後係咁而行入去個室內展區望兩眼，完成！
小王子見到個咁colorful嘅board，突然好興奮，不停手舞足蹈！
離開觀景台，被迫先經過一大堆商店，然後發現，連離開都要大排長龍！
是晚，一班夜鬼又話要去夜市，當中包括埋爸爸！細妹今晚都加入呢！佢哋今晚去饒河街夜市。本來嫂嫂都想去，大妹仲提議佢將小王子交俾唔去夜市嘅媽媽或我同拾爺照顧，但後來嫂嫂都覺得攰，於是就同我哋一齊番酒店。
番到酒店都成十一點，我真係唔明點解我班兄弟姊妹咁有活力，仲可以去埋夜市。
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
