六點十起身，仍然未有電……好彩，七點鐘準時有番電。同拾爺梳洗過後，再做final check，lock好行李，就出發喇！
八點出發，去到月台要等7分鐘先有車……好彩去到東涌，即時有部S1，九點落車，收到大妹電話，問我位置，原來佢同我哋同車，不過，我哋喺一號停車場個站到落，佢同妹夫就搭多一個站，喺terminal one個站到落。但事實證明，早一個站落係快啲到check in counter架！
同拾爺推緊luggage去離境大堂時就收到哥哥來電，佢同嫂嫂仲有小王子已經到咗，講低咗邊行俾我哋知，我同拾爺就趕去會合佢哋。等到九點三、四個未，人齊，一齊去business class個counter到check in。好彩我哋係坐business class咋，一去到就可以check in，economy class個counter勁長龍！
因為肥仔之前confirm唔到假期，所以遲過我哋買機票，買唔到business class不特止，價錢仲貴過我哋……我哋check in時，嘗試以一家人為由，睇吓airline嗰邊可唔可以幫佢upgrade，但唔成功……地勤小姐過business class啲位仲full過economy，所以佢哋會upgrade我哋部份人坐first class，但餐點就照食business class嘅。幫唔到肥仔upgrade，但都成功叫到地勤小姐順便幫佢喺business class個counter到做check in，免得佢又要再排過隊。
入閘過安檢，出埋境，我同拾爺做先頭部隊搵lounge，確定位置後就打俾佢哋，佢哋好鬼慢……我同拾爺先入lounge搵位。可憐肥仔坐economy class，冇得入lounge，要自己一支公喺機場搵食。
不過，入唔入lounge都真係冇乜所謂，因為呢到冇咩好食……
喺個lounge到坐咗半個鐘到，就行去登機閘口等上機。喺lounge時，每人拎NT$3000放落大妹個Hello Kitty袋到，爸媽堅持要出一份，我哋就叫佢哋俾NT$1000，佢兩個以為我哋個個都係俾NT$1000。
平時不屑喺登機牌前影相嘅我，今次要求全家陪我一齊企喺牌前嚟張大合照！
Business class可以先登機，哥哥帶小王子睇飛機，爸爸要陪個孫，我哋就分批登機，未上機前，大家都冇時間去睇邊個被分到first class到坐，一入飛機，謎底揭盅，我、拾爺、爸媽同大妹坐first class，但大妹想同番妹夫一齊坐，所以就同細妹換。咁大個女都未坐過first class，真係開心到，做大鄉里都要影相呀！
爸爸本來換哥哥佢哋嚟坐first class，我即刻阻止，叫佢自己享受吓。等緊飛時，爸爸又問我可唔可打包個飛機餐，我笑爸爸飛到台北周街美食，點解要帶走飛機餐，原來爸爸怕肥仔經濟艙嘅飛機餐唔好食，想打包拎去economy class到俾佢。其實爸爸真係好鍚我哋架！
等緊take off時，空姐先派menu俾我哋睇，隔一陣就過嚟問我哋要邊個餐，同埋要唔要酒，我揀咗飲Japanese green tea。航班take off冇耐， 空姐就派餐喇！
我點嘅係﹕
咕咾肉佐中式時蔬及米飯
拾爺點嘅係﹕
洋蔥燉牛肉佐烤蔬菜及米麵
一向唔好飛機餐，我只係食哂啲咕咾肉同水果，fruit tart都只係食咗上面嘅水果就算。
一食飽，就攤喺到瞓。機身有啲搖，個人暈暈哋……
瞓低唔夠一陣，就聽到announcement話就嚟landing，於是就較番張chair，點知……等極都未land，早知瞓多陣！
落機等過關，大妹同妹夫一支箭飛去排隊，我哋人多，唔敢插隊，只叫爸媽去，哥哥佢哋有小王子在手，可以由家庭通道快快出境。出境後，大家拎好行李，大妹同嫂嫂就去出電話卡，我哋就探路睇吓邊到搭機場巴士出市區。
等緊大妹佢哋時，妹夫走嚟叫我過去出電話卡處，因為我同拾爺，仲有爸媽會留多一日，所以佢哋覺得張卡放我個電話到最好。揀咗五日通話連上網嘅電話卡，盛惠NT$300。出好卡，就齊齊去搭車。落到去時，哥哥已經買好巴士飛 (每人NT$125)，大家排隊等上車。
巴士可以去到台北車站，但我哋喺圓山站就落車喇，跟住搭捷運去新北投。大家先喺捷運站買悠遊卡，上到捷運，上網一check，發覺三點半有酒店shuttle bus，時間上應該趕得切，於是決定改喺北投落車。落車後，我同拾爺做先頭部隊搵車站，一出捷運站右邊就見到有酒店shuttle bus，不過唔係我哋嗰間酒店，但原來所有有提供shuttle bus service嘅溫泉酒店嘅車站都喺到。等咗一陣就有車喇，好彩春天嘅shuttle bus比之前見到嘅大，如果唔係，我哋一行十大一小，加埋其他住客，真係唔夠坐。
落車後，即時check in。爸媽、細妹同肥仔住四人房，喺雪村館，我哋其他人就住本館。酒店本來安排一間房有一大床，另外兩間係twin bed，喺我要求下，換成兩間有大床，另一間幫我哋合床。雖然大家同住本館，但搭嘅lift並唔一樣，哥哥同大妹佢哋同lift，我同拾爺住嘅要搭另一部。大家約定搭四點四嘅shuttle bus落北投站，先各自番房settle down。
房間景觀唔錯，望到泳池，裝修唔算雅緻，但總算舒服。房間洗手間可以浸到溫泉，今晚番嚟可以同拾爺嚟個室內湯。
四點四落到lobby，哥哥話酒店shuttle bus滿座，只能俾到八個位我哋……哥哥同肥仔兩個自行行去新北投站，大家再喺北投站會合。Shuttle bus落到北投站後，大妹佢哋已經餓到連「爭鮮」都唔放過！本來兩個妹仲想過馬路買花枝丸食，但哥哥佢哋到咗，我哋仲叫番佢哋番嚟，一陣入閘向淡水出發！
一到淡水老街，個個都好似餓鬼投胎咁四出獵食。生怕大家會走散，所以約定一旦走失，就七點鐘喺入口等。
大妹同肥仔一見繼光香香雞，即時自薦做代表去買雞。
除咗雞，仲有雞脾菇，兩樣都熱氣到死，我只試咗少少，後者有啲辣，但幾juicy，拾爺就乜都唔食……
大妹佢哋買緊雞時，哥哥就做代表去買紅豆餅，一買番嚟，各人一人一個咁搶食，我同拾爺又再表示冇興趣。
小王子食得幾滋味，哥哥想食，佢都唔show人。
講到食，爸爸都冇情講，小王子真係好為食！
大家各有各忙咁買嘢食，就連爸爸都一樣，一個箭步飛奔去買果汁，佢呢杯除咗有甘筍，仲有苦瓜成份。小王子見到人家個苦瓜，手多多去玩。
肥仔呢頭買完繼光香香雞，嗰頭又去篤花枝丸，好忙！
又係肥仔加大妹，兩個走去買嘢飲。
沿住淡水老街行，大家都好興奮咁買嘢食，只有我同拾爺完全冇興趣……拾爺一向唔鍾意掃街，而我都過咗鍾意掃街嘅年齡。我倆只係等大家掃緊後，一齊坐低食餐正正經經嘅。
一般小孩見到呢個公仔應該會被嚇喊，但我家小王子只會喺被搶走食物時先會識喊……
行到老街盡頭，見到小潘潘託我買嘅「黑金傳奇四合一薑母茶」，試飲咗杯二合一，少辣，感覺唔錯，細妹、嫂嫂同大妹都買，大家夾份，享買五送一優惠(共NT$1000)，俾錢前，拾爺睇中一樽蘭香子，買開嘢當然講價，NT$180成交。
Hello Kitty手信店
行行吓，爸爸突意表示前面有一食館以「蒜泥豬肉」作招徠，大妹不明所以，我解釋爸爸知道我鍾意食蒜泥白肉。其實之前出親去食飯，一有呢道菜，爸爸都會幫我點，我都唔知點解佢會知我鍾意食，但去到台北，走在街上，爸爸都仲記住呢樣嘢，真係令我覺得好窩心。
行行吓，見到許義魚酥，大家又一窩蜂走去買，我都買咗一包(NT$50)，買完先發現有分辣同唔辣，但對方冇問我要唔要辣，媽媽話咁佢應該會俾唔辣我……但好彩，原來我買咗包辣味架，哈哈。
見到嫂嫂特意停低影相，一問下原來係因為banner那句﹕再爛的皮膚都能選中國小姐
大妹喺呢間舖頭買魚丸，但因為太熱，唔小心倒瀉哂出嚟，店員幫佢執好魚丸後，就將成碗魚丸放番入店，完全冇意識俾番我大妹。大妹好嬲，覺得佢哋打算洗乾淨後再賣！其實，大妹自己整跌魚丸，我哋唔期望佢哋再舀過一碗俾我哋，但嗰堆跌咗出嚟嘅魚丸，大妹已經俾哂錢，係屬於大妹嘅，佢哋唔應該自己收番。我同拾爺奇怪點解大妹唔開心要求拎番……
大家終於行夠，喺呢間舖頭坐低食阿給。
樓上有海景位！
左為阿給，右為魚丸，兩樣都唔好食……(呢份只屬我同拾爺，其他人都有叫嘢食。)
埋單NT$420。食完嘢，都成七點，哥哥本來提議搭船去漁人碼頭，但去得碼頭嚟，再番酒店就好夜，我寧願早啲番酒店浸吓溫泉。最後，大家決定番酒店。回程時，兩個為食鬼見到有安格斯牛又去買嚟食……
遠睇每份都好似好多咁，但原來……
根本唔係骰子！
NT$100，感覺被騙！幫襯哥哥間公司好過！
離開淡水老街前，大妹食唔夠，決定去買杏仁豆腐，我知拾爺鍾意杏仁，頭先又唔係食得多，於是跟埋去睇吓有冇咩啱，一去到本來睇緊豆腐，卻發現有亞頭託我買但我已經完全唔記得咗嘅精力湯，哈哈！亞頭真好彩，如果唔係大妹，我買唔到俾佢！一見到精力湯，就唔記得要買豆腐……急急要咗一盒，賣嘢嘅姐姐話一盒NT$350，買三盒NT$1000，三盒太重，唔考慮，之後佢話兩盒NT$650，殺佢！因為亞頭之前係話要兩盒架，但買完我就後悔喇，因為兩盒真係好重……
搭捷運番北投時，哥哥、大妹、肥仔幾個夜鬼不甘咁早番去，講講吓決定齊齊去師大夜市，妹夫冇份講，但有份去！最後，我、拾爺、爸媽、細妹、嫂嫂同小王子先番酒店。去到北投個shuttle bus站，已見一條人龍，我哋上車後只剩兩個位，即係如果佢哋班夜鬼唔係去夜市嘅話，我哋會唔夠位坐……
番到酒店，第一時間reserve聽朝十一點嘅shuttle bus離開。爸媽同細妹就番去佢哋個雪村館，我同拾爺就幫嫂嫂拎埋架BB車上房先再番自己到。小王子一被放上床就醒咗，即時又扭眼瞓……但佢喊住都要kiss我呢個姑姐goodbye先呀，哈哈。
同拾爺番到房時，雖然唔算好夜，但已經好攰……快快沖涼後，就放水浸溫泉，其實我唔方便浸，但都想浸吓腳。可惜……溫泉水達55度高溫，我倆本想放水攤凍佢先浸，但最終係等到瞓著佢都未夠凍……我提議拾爺放啲凍水去溝，但拾爺唔肯……
結果，是晚冇溫泉浸，明早再戰！
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
