噚晚不停發冷，今早起床，喉嚨開始火燒咁痛，真的病倒了……
同拾爺落樓食早餐，其實我唔想食，但拾爺迫我點都要食碗粥……快快食完嘢後，就過對面醫院。臨行前，再同爸爸confirm 11點check out，叫佢到時留喺酒店等我哋番嚟，至於媽媽，原來已一早食完早餐，又出咗去行街……
同拾爺過馬路到對面嘅馬偕紀念醫院，一入到去，就搵義工問點睇門診，對方俾張紙我填，再叫我哋沿線行去門診部。入到醫院，周圍都係人，去到門診部一帶，超多人！見到幾個顯示牌喺到叫緊籌號……拾爺叫我先填好資料，佢就去搵啲義工問應該點掛號。其中一個義工嬸嬸教佢幫我拎電腦飛排，但我哋拎到嘅籌號要等成七十幾個人，拾爺於是想再搵義工問。今次另一個義工一見我哋，就即時拎走拾爺手上嘅電腦飛，好型咁一嘢同我哋丟咗佢，我同拾爺兩個同一時間O嘴！之後，佢叫我同拾爺跟住佢，佢帶我哋去到一處叫「轉診」嘅部門，叫我哋喺到排隊，話會快好多。我見個名叫「轉診」，以為呢到係將病人轉去其他醫院嘅地方，好彩，到我時，對方問我咩病，拎咗我張紙，問我拎保健卡，我話自己唔係台灣人，佢就好快咁幫我出咗個file，再叫我上二樓睇醫生。
上到二樓，再問人點去診症室，然後去到四號房門口，等咗一陣，有姑娘出嚟，就將文件交俾佢，佢要我先填自己嘅身高、體重同埋血壓，原來診症室出面有哂工具自己搞掂，填好後，本想再喺門口等姑娘出嚟，點知有個本地人自己叩門後，就開門講嘢，於是我就企佢後面，等姑娘睇到我，向我收番份文件。
同拾爺喺出面等叫號數，我個籌號係6，當時顯示牌show到2號，以為要等好一陣子先到我，點知隔咗一陣，就聽到有人嗌我個名。因為對方講國語，我要人家叫第二次先確定係叫自己，之後就跟姑娘入去見醫生。記得幾年前同拾爺去菲律賓旅行，又因為感冒而要去醫院睇醫生，當時就要用英文同醫生講病情，但呢樣嘢對拾爺嚟講絕對冇問題，只係……今次要講國語……拾爺即時變啞巴……我就唯有以超爛國語應對。醫生好好，話聽得明我講明，仲話我哋講得唔差。
睇完醫生，就拎住張藥單先番去轉診部俾錢，去到轉診部，多咗好多人，排隊時，後面個大叔成日迫過嚟，掂到我個pat pat，我好唔鍾意！跟住，有義工走嚟問邊個俾現金，話俾現金可以跟佢行，會快啲。拾爺唔確定我哋呢啲外地人可唔可以跟埋去，於是問另一義工，對方叫我哋跟埋去。點知，去到先發現義工口中嘅快啲，係用machine嚟放錢，但前提係要有保健卡……於是，我同拾爺又要行番去轉診部。因為我冇保健卡，所有醫療開支都要自付，以為要俾好多錢，點知原來四日藥都只收NT$799，仲平過喺香港睇醫生呀！
俾完錢，職員教我哋行去藥房等攞藥。去到藥房，見個number有排都未到，於是就搵位坐低慢慢等。等等吓，見到啲number唔係逐個顯示，而係會skip，但最奇怪係counter條龍長期都咁多人，我突然覺得show出嚟嘅number唔係代表該籌號嘅人先拎得藥，係只要細過嗰個number都可以拎藥。為咗證實我嘅想法，我同拾爺就試吓排隊，差唔多到我哋時，前面個亞伯話佢個number未到，叫我哋先拎。唔怪得條龍長期咁長啦，原來有人未到籌都排住先。到我哋時，已經可以拎藥，我嘅想法冇錯，個number真係代表細過佢嘅籌號拎得藥咁解。
番酒店，十一點都未夠，先喺房食藥，再去爸媽間房睇吓佢哋ready to go未，點知…… 媽媽頭先行街行到過哂時間，夠哂鐘都仲執緊行李……我叫佢快手執好行李，15分鐘後再嚟過，拾爺心急，不停催我去催媽媽，媽媽又漏氣，15分鐘後，仲見到佢一床都係嘢……於是，就迫佢再執快啲。過咗十一點半，媽媽先執好嘢，落樓check out，再寄存行李後，我哋就慢慢行去中山站。媽媽今朝買咗好多水果，要帶番香港，因為酒店寄存行李嘅地方，其實就係lobby一角，我唔想佢就咁將水果放地下，爸爸提議媽媽將水果放入佢個背囊到，但媽媽唔想，佢走去叫酒店嘅人幫佢放櫃台。
行去中山站，係為咗到「肥前屋」食鰻魚飯！但媽媽一路行，一路食水果……我叫佢唔好再食，免得一陣食唔落飯，媽媽卻表示食水果唔會太飽……
以為爸媽都會食鰻魚飯，點知……佢兩個見到條街有其他嘢食，決定各自搵食……
最後媽媽揀咗米苔目，爸爸就求其入咗間有河粉食嘅舖頭到醫肚。
「肥前屋」前嘅人龍！
網上話要有心理準備等上45分鐘至一個鐘，但我哋今日好彩，等咗半個鐘到就有位！
餐廳環境，感覺好似日式大飯堂。
入座前已經點好嘢食，可惜是日烤鰻肝賣哂……
枱上有調味料，食客可自行為飯餸加料，若想飲荼，就得自己去斟。
隨鰻魚飯附送嘅麵豉湯
鰻魚飯 (大) (NT$480)﹕好普通嘅鰻魚飯！唔明點解咁多人為咗佢而大排長龍，唔明點解佢可以收呢個價……雖然餐廳標明所採用嘅係現殺鰻魚，而非冷凍鰻魚，但食佢個飯，真係食唔出有幾新鮮……
同拾爺喺「肥前屋」只係share咗個大鰻魚飯，唔夠喉，於是想帶爸媽去食「明月湯包」，可惜去到捷運站，大家又要去洗手間，計算過時間，俾我哋勉強兩點前到達，人家都要落場，唔會招呼……都係媽媽，如果佢今朝準時執好嘢，一定趕得切！
去唔到食「明月湯包」，改去誠品行吓。記錯咗以為喺台北101站，結果出站後，又要行去市政府站，仲要落雨……仲要爸媽都冇帶遮，我同拾爺夾埋只帶一把，結果係我呢個病人同爸爸share一把遮，拾爺同媽媽就冒雨行去。我真係冇諗過媽媽會唔帶遮！
去到誠品，以為爸爸會有興趣行，因為佢平時睇好多書，點知爸爸話唔行……反而媽媽有行。大家約定三點集合，再搭車去東門站嘅信遠齋拎訂咗嘅嘢食。
同拾爺行誠品，買咗小小米桶嘅「238個料理的為什麼?」，會合爸媽後，就去搭車。爸爸提議佢同媽媽唔出閘，喺捷運站等我同拾爺去拎嘢食，一來佢哋唔駛走嚟走去，二嚟可以慳番一程車嘅車錢。於是，到達東門站後，我哋安頓好爸媽，就兩個行去信遠齋。去到信遠齋，講低自己個名，店員就拎出預先幫我留定嘅醬肘子同燻雞，以為佢哋一早幫我切好同斬好，原來嚟到先斬雞同切肘子……結果，我哋等咗好耐先搞掂。除咗拎兩隻燻雞同兩嚿醬肘子(我同大妹各一)，仲幫媽媽買咗筍，我自己就買咗盒豆干，埋單NT$2449，豆干同筍每盒NT$50，其他就按重量收錢，我都唔知邊樣打邊樣係幾多錢，同大妹平分就算喇。
行番東門站，會合爸媽，就一齊番酒店。番到酒店，拎行李後，就行去捷運站。我哋去開嘅站口冇lift又冇電梯，拎住咁重嘅行李，真係搞唔掂……媽媽提議過對面入口，拾爺先去探路，見到有電梯，就番嚟同我哋一齊過對面。搭兩個站就到台北車站，根據嫂嫂喺whatsapp上嘅教路，我哋先行去Z3或Z5出口，上到去再右轉去搵國光客運嘅車站。台北車站好大，行去Z3或Z5出口好遠……眼見時間越嚟越趕，都有少少心急。而最慘嘅係，Z3或Z5出口冇lift又冇電梯，本來打算同拾爺兩個人一齊捧我哋個行李，因為我哋share一個喼，內裡有好多嘢包括我亞頭嘅精力湯，真係好重，唔係講笑。但拾爺一個人拎咗媽媽個行李上樓梯，著爸媽先行上去睇住行李，再自己一個捧我哋個喼，點都唔夠俾我幫……媽媽都話怕佢係咁拎重嘢會整親。
一出Z3，就有兩、三個男人問我係咪去機場同埋幾多人，話可以車我哋去，半個鐘只收NT$600，我見只貴大巴NT$100，心動！於是問拾爺意見，點知拾爺第一時間拒絕，佢話唔知對方係咩人，一陣唔知車咗我哋去邊就死。爸爸大表贊同！
拒絕對方後，我哋行去買國光客運嘅巴士飛 (每人NT$125)，四點十上車，等到五點先開車。上車後，攰極入睡，醒嚟嘅時候，架車差唔多到機場。車程40分鐘到，到機場後，就去搵華航嘅counter。拾爺剛瞓醒，睇錯counter number，害我哋行咗一段冤枉路，我知道後，忍唔住「哼」佢，媽媽貪玩，又跟我一齊「哼」佢。
行去華航check in，但要等……搞掂後，就入閘。過安檢時，媽媽個背囊被hold起，原來佢放咗把較剪喺入面，對方話一係要丟，一係就出番去做寄艙。都差唔多要上機，仲點寄艙，我叫媽媽丟咗佢，媽媽唔捨得，想出番去寄艙，我表示唔夠時間，於是媽媽忍痛話唔要把較剪。
陪媽媽行去會合爸爸同拾爺後，佢哋問發生咩事，媽媽先表示把較剪係1966年到而家嘅物品，係當年佢喺櫃桶到發現嘅嘢，應該係佢爺爺用過，留落嚟嘅。我見媽媽咁唔開心，表示把較剪若係咁有紀念價值就應該早講，等我陪佢出去寄艙，但媽媽話唔係有紀念價值，只係佢覺得好用。見到媽媽咁唔開心，我真係想衝番去幫佢喺垃圾桶到搵番出嚟，再出去做寄艙。
過關後，就同爸媽去lounge食嘢，雖然距離boarding時間好短，但我哋覺得食得幾耐得幾耐，去坐15分鐘都好，反正我哋可以俾boarding time遲少少到都得。
華航喺台灣嘅lounge食物選擇多過香港嗰間好多！我哋食到唔捨得走！
拾爺大讚個牛肉麵！
六點十係boarding time，但我哋七點先由lounge行去Gate 5，原來Gate 5都幾遠，拾爺開始急，一路行一路催我哋……催我唔緊要，但爸媽年紀大，要佢哋急行真係攞佢哋命……行到去Gate 5，見到一大班人喺到等緊，心想班機一定delay！噚晚肥仔班機都delay咗，陰公佢已經係夜晚十點幾機，班機一再delay，佢都唔知幾點先番到屋企，今朝仲要番七點……
安頓爸媽坐低後，就同拾爺去問吓幾時有得boarding，聽到有外國人問地勤嘢，地萼答佢會delay，我見人家答英文答得咁爽，於是就用英文問佢哋係咪會delay，佢哋話係，新嘅boarding時間會係八點。我奇怪點解冇announcement，佢哋話一陣會有。我見距離新嘅boarding time仲有接近一個鐘嘅時間，於是再confirm一次個新嘅boarding time，然後問佢可唔可番去lounge坐，佢話可以，叫我同lounge啲staff講低聲就得。於是，我哋四個又行番去lounge到，慢慢再嘆過。
一入lounge，我哋講低delay嘅情況後，拾爺就問佢哋會唔會有電視show到航班情況，等我哋唔駛再去撲個空，對方話呢到冇電視，但我哋可以問佢哋，佢哋可以上網幫我哋check到。有佢呢句就得喇，我哋番入去，開始第二輪飲飲食食。
既然拾爺讚呢到嘅牛肉麵，我當然都要試，但我覺得味道一般咋喎！
非常受拾爺同媽媽歡迎嘅烤地瓜，兩個人再三食完又食！
食到七點九到，我行出去問lounge嘅人航班情況，對方回答我個boarding time會再遲多5至10分鐘……我問佢係咪會有delay，佢話班機到咗，會遲boarding，take off時間可能會遲少少，但唔會遲好多。好彩問一問佢，原來班機嘅登機閘都轉埋，轉咗去近得多嘅Gate 7。
坐到八點，我哋就行去Gate 7。喺Gate 7等咗一陣，就可以上機喇。我哋本來排business class嗰邊登機，但對方見我哋張ticket後，就帶我哋行另一個登機口，俾我哋入去先，原來呢程機，我哋又坐first class！入去前，爸、媽同拾爺嘅機票都被改咗位，爸媽係相連嘅first class位呢！
呢程機，我學精咗，空姐未嚟催之前，都唔調正張凳，太病喇，瞓得幾耐得幾耐！
今次個飛機餐，我要咗洋蔥醬汁鴨佐黃金炒飯，媽媽讚個飯入味，但我冇胃口食……反而我buy個甜品 — 荔枝銀耳凍。
飛機最後9點先take off，番到香港都成11點……喺飛機上打算換番張sim卡先發現唔見咗……結果飛機一land，我係要打去one two free停咗張卡先。
過關時，見到有班大嬸瘋狂咁向前跑，以為佢哋黐咗線，但聽到有人話「都敏俊」嚟咗，唉，我病到劉德華嚟咗都冇mood去追呀！
送爸媽上巴士，因為拾爺聽錯巴士號數，排錯隊……然後，又因為媽媽記錯車站位置，行咗冤枉路……好彩，一去到車站，就有車。
送走爸媽後，本想打俾哥哥話佢知爸媽上咗車，但拾爺個電話顯示sim卡有問題……唔係呀﹖！我已經冇電話用，而家連拾爺張卡都出事﹖！我一度懷疑one two free嗰邊停錯咗拾爺張sim卡！由於家中冇電話，身上又冇散紙，我倆係樣衰到去到地鐵站個大型商場，問customer service嘅人借電話打。One two free嗰邊話拾爺個account冇問題，叫我哋拎張sim卡出嚟抹吓佢喎。唉，真係一番折騰……
是夜，番到屋企，個人好興，拾爺幫我探熱，發燒中……
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
