起身仍然感到不適，睇嚟我又要感冒了……想過對面醫院睇醫生，因為我氣管唔好，試過遲咗一日去睇醫生，搞到自己氣管炎……所以，之後一有感冒，我通常都會即刻睇醫生。但今日係哥哥佢哋留台嘅最後一日，之後剩番我同拾爺，仲有爸媽，如果我唔跟大隊去玩，我怕到時唔知點樣接番爸媽……
落樓食早餐時，與細妹同lift，佢提議我先食佢帶嚟嘅藥，我見佢有我以前食開收鼻水嘅藥，於是就決定先食住呢啲藥頂住先。細妹仲同我講噚晚餐飯食咗四千幾蚊台幣，原來餐廳將所有嘢打雙份咁送上嚟，所以收雙份嘅錢……細妹講起，我又記得我哋點滷肉飯時，佢有講過嚟雙份，但我哋以為只係滷肉飯嚟雙份，結果佢乜都嚟雙份……雖然，以佢食物質素同份量，收四千幾台幣都 唔算貴，但我同兩個妹都覺得餐廳唔太老實。媽媽話係大家溝通有問題，人家以為我哋明白係所有嘢嚟雙份，但我覺得就算之前講咗嘅嘢嚟雙份，我後來多點嘅路邊 野雞，佢都唔應該私自幫我加大份量。呢個位，令我同細妹都對間餐廳印象大減！細妹話雖然餐廳嘢食唔錯，但佢覺得餐廳唔老實，決唔會再幫襯！
今日酒店嘅早餐仲衰過噚日，噚日都有肉鬆俾人送粥，今日就連肉鬆都冇埋，叫住客食白粥。
食完早餐，番上房去洗手間時，大妹先同妹夫落嚟，我隱約聽到佢話漏咗條牛仔褲喺春天溫泉會館，要番去拎。再落樓時，大妹真係唔見咗，嫂嫂話佢要番去拎牛仔褲。
人齊後，我哋就向水引水產出發。今朝問酒店counter有冇公車直達，對方叫我哋打的……因為我哋今日冇特別節目，哥哥佢哋臨行在即，今日主要都係去買嘢，時間充裕，加上大妹去咗北投，想等埋佢，所以我哋決定先搭捷運去「行天宮」站，去到再轉公車。
行去雙連站時，我先知原來媽媽唔知大妹因為漏咗牛仔褲而番去春天溫泉會館，大家唔敢話佢知，怕佢到時「友善提醒」大妹，以大妹性格，一定同佢開火都似。但我覺得與其大妹番嚟俾佢知，不如早啲同媽媽講，順便叮囑媽媽千祈唔好「友善提醒」大妹。
到達行天宮站後，哥哥問完捷運職員點去水引水產後，就帶我哋出正確嘅出口，出到去一時間搵到個公車站……因為我哋人 多，而且有老有嫩，幾個壯丁就負責去探路，我哋啲老弱婦孺就只負責等。
肥仔同拾爺等過馬路拉公車嘅一幕，我同媽媽都覺得好得意，即刻拎部相機出嚟影低佢！
等緊班壯丁探路回來時，見到幾個香港人行過，心想佢哋可能又係去上引水產，於是我跟住佢哋行咗條街，最後因為見到前方道路應該唔會有公車站，所以就折返。才剛回頭行咗幾步，拾爺就追咗上嚟，一嚟就通知我哥哥搵到車站，二嚟就教訓我私自走咗去。拾爺到而家都唔會我身處外地時自己一個人走開，佢成日都驚我會被人拐去……我諗塵世間只有佢一個對我有興趣架咋，其他人先唔得閒理我呀，哈哈。
行去搭公車時，收到大妹電話，佢已經喺春天溫泉會館拎番條牛仔褲，我教佢點搭車，相約上引水產見。
搭上642號公車 (轉乘優惠 NT$8)，於台北市第二果菜批發市場落車，本來哥哥想自己一個人去水引水產嘅立食區到攞飛先，我哋就慢慢行吓個果菜批發市場，但唔知點解，今日個果菜批發市場唔開……
冇得行果菜批發市場，我哋全部人就一齊去水引水產。
行去入口時途經可以訂座嘅燒烤同火鍋區。
入去前，先要被門口個保安噴一下消毒劑喺手。
一入上引水產，就見到一個一個大水箱，入面有各種各樣嘅水產。雖然係賣水產嘅地方，但四處都好乾淨。
離開水產區，向上行，就到超級市場部份，呢到除咗有壽司、刺身賣，仲有各種蔬菜、肉類同調味料。
咪睇小王子攬住盒車厘茄就以為佢好鍾意食，實情係噚日大妹請佢食，一呢頭放入口，嗰頭就吐番哂出嚟。
刺身立食區
我哋周圍行緊睇嘢時，原來哥哥已經拎咗飛，仲一直喺到等緊位。哥哥真好！差唔多到我哋時，大妹同妹夫到達！原來佢哋去到捷運站後，轉搭的士過嚟，所以咁快。佢哋仲幫媽媽拎番個飯盒添呀！
因為我哋人多，哥哥要五個五個咁去拎飛，我哋張飛係7同8號，刺身立食區方面知我哋係一家人，所以就安排咗一整行俾我哋十個一齊企，雖然會迫少少，但一齊食開心啲！由於餐廳要安排一個咁大嘅area俾我哋，所以佢哋就先安排9號飛嘅客人入位企。
呢到係壽司立食區，哥哥都有拎飛，但因為兩邊number叫得好貼，所以我哋決定放棄壽司呢邊。
終於可以埋位企！等緊嘅時候，我哋已經點咗兩個海鮮拼盤，本來仲想要海膽，但已賣光……其時都未夠12點……
餐枱下有供食客放置隨身物嘅地方。
最先送上嘅，係哥哥點俾小王子嘅魚湯。
隨海鮮拼盤附上嘅沙律，啲魚生唔多新鮮……
海鮮拼盤，賣相唔錯，但當中嘅海鮮一啲都唔新鮮……要排咁耐去食，仲要企喺到食，唔值！Frankly，就算有得坐同唔駛排，我都唔會專登搭車嚟食，因為真係一啲都唔鮮甜，價錢又唔係特別平……
小王子開完餐後，我哋個海鮮拼盤先上。大家忙住食嘢，冷落咗小王子。因為拾爺唔食生嘢，所以佢就喺呢個時候不停影相，捕捉到小王子寂寞嘅一剎。
哥哥嫌唔夠食，就再點多個親子丼，成百蚊港紙一個飯，我同大妹都覺得唔抵……
喺立食區食完兩個海鮮拼盤，大家意猶未盡，於是就決定喺超市內掃嘢食，一輪狂風掃落葉後，大家集合喺超市外嘅外帶立食區到再開餐！
一啲都唔好食！
爸爸覺得好食，但我覺得一啲都唔鮮甜……
愛吃魚嘅妹夫同爸爸都買咗鯖魚。
一啲都唔好食嘅海鰻……
大妹真豪爽，NT$60一塊嘅可樂餅，一口氣買成三塊！我覺得好貴！而且又唔特別好食……
食緊嘢時，大妹同我哋講話妹夫串媽媽，一問之下先知，原來大妹發現漏咗牛仔褲喺春天溫泉會館後，第一時間係怪妹夫冇檢查清楚個衣櫃……情形就好似媽媽發現自己冇拎陳村粉後，係怪細妹冇check清楚個雪櫃……明明自己做錯嘢，卻第一時間將個責任推落同房人到……難怪妹夫會反擊大妹﹕「妳果然係妳亞媽個女。」我都唔幫大妹，話妹夫講得好！妹夫對有人支持自己，表示高興。
離開水引水產，向西門町出發。先搭番公車去行天宮站，車費每人NT$15，再轉捷運去西門町站 (轉乘優惠NT$8)。
一出西門町，大家見到賣嘢飲嘅地方，又一窩蜂去買奶茶……
佢哋買奶茶時，我就同爸媽去老天祿買鴨舌。
我哋買嗰時都算多人，但未至於長龍，買完之後就變成咁……
我買咗半斤鴨舌 (NT$550)，店員又係冇問我要辣定唔辣……今次好似係俾咗唔辣嘅我……我記得以前買時，會有盒裝住，但今次冇……於是我用我超爛嘅國語去問佢，佢話因為啲鴨舌仲熱，所以唔放得入盒住，但就俾咗個盒我，今晚先放入去。但其實，啲鴨舌一啲都唔熱囉。
爸媽都有買嘢，媽媽除咗買鴨舌之外，仲買咗其他滷味，佢呢頭買完，嗰頭就坐喺人家舖頭出面嘅凳到開餐……我哋買完嘢，班奶茶癡先番嚟，佢哋又排隊買。我見大家仲要買一輪嘢，於是就同拾爺行去佢哋買奶茶嘅舖頭，買咗杯大size嘅抹茶奶綠 (NT$45) share嚟飲。
行番去老天祿，驚見媽媽攞住條青瓜嚟食……青瓜唔係喺老天祿買嘅，係佢今朝喺酒店出面買架！
時候唔早，哥哥提議大家喺到分手，佢哋今日番香港嘅，會喺西門町行多半個鐘到，然後分兩批人，男丁就番酒店拎行李，女丁連小王子就直接去台北車站，大家再喺嗰到集合，搭機場巴士去機場。我同拾爺就帶爸媽去嘆番個tea先！
先帶爸媽行去Lighthouse，餐廳裝修雅緻，可惜飲品選擇唔多……嘢食又只係冇咩特別嘅意菜……於是，我哋決定改去另一間café。帶爸媽離開Lighthouse所在嘅商場時，見到商場外有好多凳俾人坐低休息，然後，原來一行出嚟，就見到老天祿，媽媽話早知行多幾步有咁舒服嘅凳坐，頭先就唔坐老天祿外面。
行去捷運站時，我話唔知會唔會撞到哥哥佢哋，點知就真係行行吓撞到細妹，佢哋分開咗行街，細妹去咗買袋，仲話要再買嘢，先去集合呢。
帶住爸媽搭捷運去忠孝敦化站，再將之前print好嘅google map交俾拾爺去搵路，終於到達杏桃鬆餅屋！
一入去就有位，lucky！
餐廳環境
餐廳都算大，除咗出面之外，內裡都仲有sofa位。
坐低後，我哋即時拎menu睇，心知爸媽對甜食興趣唔算大，當時時間又尷尬，食得太飽，夜晚就冇戰鬥力去試其他餐廳，於是就決定四個人點三個餐，再加一杯嘢飲。
焦糖覆盆子鬆餅 (NT$290)﹕味道唔錯，個鬆餅真係幾鬆軟。
抹茶拿鐵﹕拾爺嘅嘢飲，單點NT$180，跟餐就要補NT$20。
Waitress送上拾爺嘅嘢飲後，先俾時間我哋影相，之後就走嚟示範點樣開抹茶。
抹茶打發後，可以就咁飲，又或者加cream或黑糖，逐樣上，就可以試到三種唔同嘅味道。
為咗影大合照，我哋遲遲唔開始食嘢，叫咗個waitress幫我哋影相，佢卻一直叫我哋等等……等佢慢慢執枱，再搞吓呢樣搞吓嗰樣……等到我好唔耐煩……想叫其他人幫手揸機，明明見到有人得閒，對方明知我哋需要幫忙，卻故意唔show我哋，慢慢執枱……或許台灣嘅文化就係咁樣，但我真係接受唔到當冇其他客等住要坐嗰張枱時，個waitress都寧願慢慢執完張枱，然後，再搞其他嘢，見我哋不停望住佢，佢先無奈地走嚟幫我哋hea影咗張最後都唔要得嘅合照囉！我唔係話入嚟俾錢食嘢大哂，但舖頭當時真係唔忙，點解唔可以友善地幫人影張相呢﹖！對佢嚟講，可能我嘅要求無聊，咁嘅地方都要影相，但同爸媽嘅合照，對我嚟講係好珍貴架！
洋甘菊﹕爸爸嘅嘢飲，單點NT$160，跟餐唔駛補錢。
玄米茶 (抹茶風味)﹕媽媽嘅嘢飲，單點NT$180，跟餐就要補NT$20。
抹茶漂浮﹕我嘅嘢飲，單點NT$180，跟餐就要補NT$20。嚟呢到就係為咗佢！上網見有人飲過，覺得好得意。如果揀熱飲，餐廳就會俾奶我去溝抹茶，但揀凍飲就好特別，會有兩球雲呢嗱雪糕。其實味道方面，唔會因為嗰兩球雪糕而飲到好濃嘅雲呢嗱味，因為抹茶個 味太強，但呢種配搭好有趣，所以我好想試！
蘇芙蕃厚鬆餅 (NT$250)﹕呢個係W size，如果揀 S size，只得一層，價錢亦只相差NT$30，所以拾爺要夠兩層。但其實……爸爸食得唔多，我哋三個人去完成佢，都有難度……個鬆餅邊位幾脆，但成個鬆餅就略嫌太乾身……
HONOLULU 熔岩鬆餅 (NT$290)﹕見佢係台灣限定，於是點嚟試試。其實佢只係多咗奶油嘅蘇芙蕃厚鬆餅，不過因為係奶油，所以食時就唔會好似食蘇芙蕃厚鬆餅時咁，覺得咁乾，而且邊位仍然予人脆口之感，所以呢個甜品都幾唔錯。
喺杏桃鬆餅屋到hea咗一個鐘就埋單走人，盛惠NT$1150。店員附上一張意見書，因為我嬲呢到頭先要我等咁耐先嚟幫我hea影一張最後都唔要得嘅相，於是就喺意見書上寫上我嘅不滿。仲圈咗唔會再嚟幫襯嘅option，埋單時將意見書放俾cashier。離開餐廳，喺出面影相張後，正打算走人，點知個cashier追出嚟問我頭先封意見書係咪我寫，我直意不諱，對方就向我道歉，話會多加注意。呢個店員態度誠懇，幫間舖頭加番分，不過，我都係唔會再番轉頭幫襯。一嚟，台北我已經嚟第5次，有時間，我會想去其他國家再唔係都會揀中部同東部嚟玩，二嚟，呢到啲嘢又唔係特別好食，就算真係再去台北，我都會去試吓其他餐廳啦。
嚟得忠孝敦化一帶，當然要再去寶茶買我嘅紅茶同綠茶糖啦！確定爸媽都唔攰，體力許可嘅情況下，我哋一齊行過去忠孝復興站。終於再到寶茶，今日有開門呀！一入去，就呢到睇吓嘢，嗰到睇吓嘢。唔見有紅茶同綠茶糖，於是又硬住頭皮用超爛國語問店員，點知……原來台灣上個禮拜天氣好熱，所以佢哋賣完手上嘅貨，就唔再整……店員話好多人都從外地嚟買，所以上個禮拜已經賣哂手上嘅貨，要秋天先再出……好傷心！我可是滿心期待再食紅茶同綠茶糖，仲打算買多啲番香港做手信架！
搭車去東門，先去信遠齋訂燻雞同醬肘子，聽日下晝再嚟攞。
時間尚早，就沿住永康街行吓。爸媽對所有嘢都冇興趣，有時我同拾爺想入店行吓，佢哋就話喺出面等我哋……搞到我都唔太想行街……
行到呢間店，見佢有好多遮賣，因為拾爺把遮又吹爛咗，所以我哋就各自買咗把遮 (每把NT$200)。
行出店舖，但見媽媽又拎條青瓜出嚟食……真係被佢激死，一陣都要食飯，佢仲食其他嘢……
一直向前行，為嘅係睇吓「大隱酒食」有冇開。雖然網上顯示佢逢星期一休息，但我哋前日打去樂利店訂噚日嘅位時，對方竟然話星期日唔開。既然佢同網上資料有出入，今日我就要去搏佢一搏。結果……行到「小隱私廚」時見到有開門，不過店子好細，得幾張枱，而且已經坐滿……行多幾步，見到「大隱酒食」都有開，而且有枱，唔肚餓都即刻入去坐低。
店員送上點菜紙一張，但內裡卻搵唔到我想點嘅菜……一問之下先知，原來今日樓上有人包場，所以店舖先會開，但菜式就有所限定……想食嘅涼拌苦瓜、 胭脂蝦、紫菜蝦卷、午魚一夜干同剝皮辣椒雞都冇得試……就連另一塊板上寫嘅「天天有魚」嘅魚類都冇得供應……只有干貝肉燥飯同蔥香豬油拌飯……
問店員有咩介紹，佢指勻成張點菜紙咁滯……因為大家都唔太肚餓，所以只係點咗好少嘢食，但就等咗好耐店員先送上……
我哋冇點過嘅「涼拌龍鬚菜」……
店員拎番走碟菜之後，又要呆等一輪，先送上第一道菜。等緊嘢食時，我嘅病情開始嚴重，啲藥開始控制唔到我啲鼻水，帶嚟嘅紙巾差唔多用哂咁滯……
虱目魚粥 (NT$120)﹕點俾爸爸食嘅，佢話覺得啲粥都尚算清甜，但啲魚就好嚡……雖然我都有食少少，但我真係食唔出清甜，不過，我太唔舒服，所以都冇認真去味嚐，好難去品評呢道菜。
扁魚滷白菜 (NT$195)﹕唔覺得有咩咁特別，反而我嫌佢太油。
蔥香豬油拌飯 (NT$25)﹕因為太唔舒服，只係食咗一小啖，冇試真，但拾爺就話唔覺得佢有咩咁特別。
干貝肉燥飯 (NT$45)﹕好好食！雖然我病到味覺遲頓，但都覺得呢個飯好食！我鍾意佢用嘅米，粒粒分明又有咬口，剩係佢，已經值得我再番嚟食多次！
埋單NT$385，食完飯，我已經攰到死，好想即刻番酒店休息，又或者衝去酒店對面間醫院睇醫生，只係……哥哥臨行前，千叮萬囑我一定要帶爸爸行萬西街夜市……我知道如果我話好唔舒服，爸爸唔會免強我帶佢去行夜市，但為免令爸爸抱憒，所以我點都撐住，要帶佢去行夜市。
搭捷運去龍山寺站，再行去華西街。爸爸話華西街其實就係艋舺，佢一提艋舺，我就知佢講邊，我有睇過呢套戲。
行到去華西街，突然見到好多衣著性感嘅辣妹企喺車上，一班龍友拎出相機不停影！
之後，音樂響起，班辣妹就聞歌起舞。
今日唔知係咩日子，呢到好熱鬧，除咗有辣妹跳舞，仲有人舞龍舞獅，兼有人著哂大龍鳳咁遊街。仲放咗幾次煙花添呀！
今日應該係啲特別節日，大批信眾一見呢枱嘢，都紛紛趴低。
媽媽叫我唔好亂影相，但我舉機影相時，有人擺埋pose俾我影喎。
放咗幾次煙花！
兩老買糉
爸爸行完一圈，心滿意足，御准番歸。最開心係我，可以抖吓。同埋我真係好唔鍾意呢個夜市，感覺好雜！幾年前都去過夜市，感覺上冇呢個咁雜，行唔夠兩步，就會有電單車突然殺出，害我一步一驚心……又要避車，又要睇實兩老，仲病緊……企喺馬路邊睇緊巡遊時，以為好安全，點知pat pat突然感到有嘢撞埋嚟，原來有電單車倒緊車，個司機完全無視我嘅存存，如果唔係旁邊個女人幫我喝停個司機，我應該會被撞……媽媽當時企我隔離，得知我被撞後，即時嬲到拍打電單車，用廣東話鬧個司機撞到人，哈哈，當時環境咁嘈，司機應該聽唔到，不過，就算聽到，都聽唔明啦！虧爸爸仲行得咁定，話啲司機會識避過行人，我覺得凡事都係小心啲好！
送咗兩老番酒店後，我就同拾爺過對面醫院想睇急症，但醫院有好多人，都唔知要等幾耐，我又好攰，於是就決定番酒店休息，聽日朝早先再過嚟。
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
