2013 法德之旅 Day 21

出事喇出事喇！一定係噚晚杯蘋果酒，搞到我七點開始唔舒服……想嘔又嘔唔出……拖到八點，勉強起身陪拾爺去食早餐。早餐如我所料，好‧豐‧富！可惜……我完全食唔落！就連見到都想嘔……拾爺話我蝕哂……最後，我只係食咗幾件西瓜。因為，我只想食生果，但生果只得呢樣……番 上房，即時瞓落床，完全起唔到身幫拾爺手執行李，更冇力量出去行……拖到十一點幾，被迫起身去check out。我哋將行李store喺酒店，拾爺問啲staff附近有冇clinic或hospital，因為我真係好唔舒服，要去睇醫生。Staff話佢哋唔 舒服，一般會去藥房講出自己嘅病徵，藥房嘅人就會幫佢哋揀藥，佢哋冇clinic，亦好少去醫院……呢到最近嘅醫院要過河先有……咁鬼遠，我邊捱到……

喺 酒店lobby坐咗陣，覺得就咁坐喺到好白痴……今晚十點機，冇理由由朝坐到晚架！撩拾爺出去行吓，反正酒店俾咗張卡我哋，可以全日任搭市內交通，去邊都 可以坐subway，我覺得自己應該應付到。點知……行落subway，聞到陣陣尿味，即時嘔！連嘔三嘢後，個人舒服哂！

拾爺陪我番酒店，去洗手間漱吓口，之後再出發喇。雖然，嘔完之後，個人係舒服咗好多，但全身仍然乏力……基本上我係搭一個站都要搵位坐，行一陣就要坐……有啲後悔頭先冇R酒店俾我哋遲啲check out。我覺得我瞓多一陣，抖夠成個人都會好起嚟。

同拾爺去咗Bornheim，本來係想嚟睇market，但搵唔到……唯有欣賞吓呢到嘅medieval houses。

行完Bornheim，個人仲係好攰，拾爺陪咗我番酒店。唔想坐喺lobby對reception啲人你眼望我眼，走落樓下冇乜人行經嘅sofa位，成個身瞓上去。

瞓咗半個鐘到，見到拾爺好悶咁坐喺到，好慘咁……於是就再撩拾爺出去。本來想幫妹妹喺德國買Longchamp，但呢到個價貴啲，扣稅後過咗妹妹個budget，所以就冇買喇。

番酒店再抖，今次冇得落下層，因為有staff行嚟行去，想瞓吓都唔得……坐lobby又無聊……於是又再出去，今次去Römerberg。

Römerberg

喺Römerberg行咗陣，其時已經係晏晝四點幾，我全日都冇嘢到肚，拾爺怕我餓怪，迫我揀餐廳坐低食嘢……但我真係乜都唔想食，除咗生果。只係……呢到完全搵唔到超市……拾爺軟硬兼施下，終於入咗間意式餐廳。點咗一個set、一個salad同一杯啤酒。

Erdinger (€3.6)﹕又係冇酒精啤酒，當然，又係拾爺飲架啦！

Kalte Minestrone﹕跟set嘅湯，原本係想飲番碗熱湯，點知……呢個係凍湯嚟架！

Salat Champign. Klein (€4.8)﹕呢碟嘢其實都頗大碟，但只係starter份量！本來呢碟嘢係拾爺點俾我食架，但最後我好辛苦先食到幾啖……都係嗰句，味道真係好好！但我真係冇胃口食……最後碟嘢都係拾爺清埋！佢又係讚不絕口！

Pasta mit Mangold und frischen Tomaten﹕跟set嘅pasta，我試咗一啖，其實係好好食架！但我真係冇胃口食……拾爺對呢個pasta讚不絕口，話非常正！我最欣賞餐廳送上滿 滿一碗芝士粉俾我哋任落，對於愛吃芝士嘅我嚟講，呢樣本來係好正嘅事，只可惜……成個set都係€8.9，性價比好高！

指定動作﹕餐廳評級為GOOD！(由於我病到冇乜點食，所以今次由拾爺上場！佢一人清哂兩人份量嘅嘢，食到爆肚咁滯呀！)

食 完嘢，反而俾我哋搵到超市，於是入去買咗兩個peach，不過番到酒店，個peach食咗一半到，我已經食唔落……喺酒店lobby抖到夠鐘，就出發去機 場。去旅行，從未試過好似今次咁，咁想早啲番到香港……想唔到首次嘅三星期之旅，竟然以生病作結……唔通我真係年紀大機器壞，唔可以再去咁耐旅行﹖！拾爺 話下次唔好再去21日，20日好喇喎！呢個提議都唔錯！