八點半起身，望望窗外天氣，晴朗呀~~
九點三到出發去Abbey！今日天氣真係好好，一出酒店門口，已經見到好多人向Abbey進發。向上行，越接近Abbey心情越興奮，因為藍天下嘅一切都好靚！
跟隨人群向上行，經過一條長長嘅樓梯，終於到達Abbey嘅入口。
再往上行，就要俾錢。
因為我哋十一點前要番到酒店check out，唔夠時間入場參觀，加上我同拾爺對入場嘅興趣都不大，所以就喺附近行吓算。
唔入Abbey其實都唔係損失，圍住Abbey走，由高處望望周圍風景，美不勝收。
對於shopping，我興趣不大，但因為呢到有post office，我就買咗三張postcards，兩張寄俾兩個妹，一張寄俾拾爺。拾爺以為我寄番俾自己，仲叫我唔好買，我故意扭計，仲要佢揀咗佢鍾意嘅，其實係寄俾佢架！三張postcards夾埋都係€1.5，平過三張郵票(€2.83)……
寄完postcards，就行出城影吓相。
呢到就係噚晚潮漲後不能行嘅地方，今日冇哂水lu。
晴空下嘅St Michel，係咪靚好多呢﹖！
呢條路就係行去搭shuttle bus嘅道路，噚日行時橫風橫雨，今日風和日麗，感覺截然不同！
成張postcard咁款呀！
其實早上都有潮漲，但冇噚晚咁明顯……
早上嘅潮漲，只得呢到少少。
影完相，我哋就入番城食lunch。由於已經試咗出名嘅omelette，我哋呢餐決定食景，揀咗La Mère Poulard Café，貪佢有terrace，可以望住靚景食嘢。
同 拾爺坐低後，一人叫咗一個set。等食期間，風雲變色，開始有雨點落下……我怕雨會越落越大，就同waiter要求換位，佢雖然肯，但就話如果個個客都換 佢哋就玩完，我覺得佢好冇禮貌！佢話覺得啲雨會好快冇，點知……隔咗一陣，真係開始越落越大，其他坐出terrace嘅食客都自己換位，我哋見大伙兒動 身，就唔理咁多，極速霸番個室內四人枱。哼！個個客換枱就玩完﹖而家你game over啦！
拾爺嘅Soufflé Omelette Menu set (€15)，有湯、omelette同忌廉蘑菇薯蓉﹕
Soup of the day﹕話就話係魚湯，但魚味唔夠……好油添……
我就揀任選主菜兩款嘅set(€14)，要咗﹕
Egg, smoked salmon and cheese galette﹕叫做有少少特色嘅小食，但味道都只係一般……
食飽飽，我哋就番酒店拎行李，酒店其實就喺隔離，原來呢間café同我哋酒店嘅餐廳係share同一個廚房架！大家可能係同一集團呢。
順利拉喼出城，搭shuttle bus去到噚日換車嘅地方，因為我過於保守，早到咗成個鐘……
喺個bus stop到無所事事，但見唔少人自同一方向步至乘搭shuttle bus去St Michel，好奇心驅使下，同拾爺拉喼去睇吓附近有乜玩，結果，又俾我哋發現影靚相嘅好地方！
影 到差唔多夠鐘，就行番去bus stop搭巴士去Rennes，我哋要再搭火車由Rennes去Tours。巴士比預定時間早到站，但火車方面卻遲遲唔出plaform number……拾爺捉咗個staff嚟問，對方咕嚕咕嚕咁，講咗一大堆嘢，就係話火車會遲，然後會遲到Le Mans (我哋個轉車站)，令到原本有個半鐘頭時間轉車嘅我哋，得番三分鐘……拾爺怕趕唔切轉車，對方就話三分鐘都夠，仲話唔夠可以搵車站人員幫手，改搭下一 班……冇行李又係本地人嘅話，三分鐘梗係夠啦，但我哋有大件行李，加上唔熟嘛……改搭下一班，即係更遲到Tours，咪又係搵嚟搞……唉……
終 於，車站喺一點四十五分出platform number，我哋即時上月台，只係……等極都等唔到架車到……等緊嘅時候，有車站人員喺月台到推一鐵車嘅水樽經過，拾爺見狀，就叫我企埋一邊，正當我企 入去俾位人過，而又因為八卦隔離兩個婆婆問職員嘢而擰歪臉時，右邊臉突然遭到硬物襲擊！原來架鐵車車門冇扣好，職員推車經過我時度門突然打門，就咁樣一嘢 打中我塊臉……痛到呢，真係當場攬住拾爺喊嘅衝動！啲staff見狀都好緊張，即時問我有冇事，我心諗有事又點﹖佢哋可以做啲乜﹖送我去醫院咩﹖我趕火車 架！所以，就話冇事喇。而家諗番都有啲蝕，應該要求佢哋compensate番我！唔知我而家寫投訴信work唔work呢﹖哈哈。
等到 火車到後，我哋就上車喇。架車本應四點零三分開出，最後四點五先開動。開車後，有職員俾咗張卡我哋，我哋問佢係乜，佢講法文，之後就走咗去……好彩，坐隔 離嘅女仔好nice，用英文話俾我哋聽因為修路關係，原本火車只需兩個鐘就到Paris，但而家要四個鐘，法國火車如果令乘客延遲抵達目的地超過一小時， 就有全數退款嘅服務，張卡就係俾我哋填番啲資料，再拎去郵局寄番俾火車公司，當然，郵費全免。不過……張卡全部法文，鬼識睇咩……仲有，佢要我俾 account number佢，香港嘅銀行都唔知佢受唔受理啦。我哋又唔係番Paris，如果catch到一陣七點零三分班火車，其實都冇遲到嘅。
火 車七點到Le Mans，我哋一到站即跳車，再搵下班車嘅platform，然後盡全力跑去，終於趕上班車，只係……班車係就係準時開，但唔知點解開得好慢……慢到呢， 私家車都快過佢……然後……開開吓，突然停咗15分鐘，之後繼續以龜速行駛。架車開得咁慢，我哋當然遲咗先到Tours啦，最後九點一先到……
晚上嘅Tours火車站，我哋落車時個天仲光架，但之後出嚟買嘢食就開始黑喇。
今 晚間酒店真係如網友所講，超近車站，一出車站已經見到！今日開始再冇二星酒店，yes！間酒店叫La Grand Hotel Tours，雖然係三星，但價錢都比之前兩間二星平！酒店外表好殘，內裡裝潢都頗舊，但規模唔細，而且我哋嘅房間被upgrade至superior，房 間超大！仲有熱水壺，拾爺可以沖茶飲喇，yeah~~~
我哋是晚入住嘅酒店。
浴室超大，可以好好享受一個熱水浴！仲可以同拾爺一齊刷牙添呀！
喺酒店settle down後，就出去買嘢食。因為今日係星期日，超市唔開，早嚟遲嚟都冇得幫襯……雖然有唔少餐廳嘅選擇，但價錢都幾貴……我倆亦太攰，冇心情去enjoy，所以見到有間士多有嘢賣，價錢雖然貴咗少少，但都照殺喇。
晚上嘅Tours。
右上係前年喺荷蘭超市買嘢時，超市送我哋嘅甜品，上次食覺得好好食，今次再食，覺得好甜……
食飽飽，諗住沖番個熱水沖啦，點知……冇熱水！打去reception投訴先知是日有construction work，全個鎮都冇熱水……我身子好弱，一年365日都要沖熱水涼，凍水係完全唔ok架！所以，我冇洗到頭，主力沖下身，再快快淋吓上半身就算。
沖完涼，敷個eye mask等埋拾爺先瞓時，自己瞓著咗……醒番時，差唔多十二點，但拾爺表示有番少少熱水，於是我又去洗番個頭先瞓。
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
