話說噚晚班法國人喺到開P，十二點先嚟開HiFi，佢哋也真high，嘈到我喺張床到典咗好耐先瞓到，然後……半夜三點半紮醒，佢哋仍然未散band，HiFi仍然開行……四點到再紮醒，都仲有人大大聲講嘢……到五點半，終於散band。我心諗一陣我六點起床，真想向佢哋怒嗌一聲bonjour嚟報復。但見天色唔多對路，之後開始雷電交加，六點仲開始落大雨……我怕落雨會拖慢我哋拉唿去火車站嘅速度，所以早咗起身。
七點到落樓check out，就拉唿去火車站，呢個時候雨勢開始減弱，我哋都算幸運。我哋搭八點零五分火車去Rennes，但早到咗差唔多成個鐘……喺火車站等車時，坐埋一、二邊食早餐。一早知今日早車，冇時間食早餐，所以出發前喺山崎買咗袋提子包，同拾爺就咁坐喺啲長凳到食。
開車前二十分鐘，顯示屏出platform number，我就同拾爺拉唿去搵月台，去到月台架車已ready。呢程車我哋有reserve到seats，所以要搵番自己嗰卡車上，但我哋唔識……問staff，佢太忙，係咁倚指一下方向，我同拾爺都唔明……好彩，再問其他乘客，有好心人教我哋點睇邊一卡。上到車，放好行李後，行埋位先發現……被安排坐倒頭車……唯有全程合上雙眼唔望風景啦……
去到Rennes，仍然落緊雨，仲越落越大……我哋有一個鐘頭時間等巴士到，但卻搵唔到巴士站……喺車站問staff，佢又唔太講到……見到時間越嚟越迫緊，於是膽粗粗走去等車嘅人群中問，佢哋唔太講到英文，但大概知我哋想搭coach去St Michel，於是當中有好心人冒雨行出去，指出等車building所在俾我哋睇，仲用手勢叫我哋向前行。之前上網，啲人話火車站出口右面，但其實係向右行至一灰色building內先買到飛。
冒雨拉唿入去買飛，買到11:35嘅車飛(€12.4 ´ 2)。呢程車嘅車飛其實係全日適用，所以就算miss咗呢班車，都可以搭下一班。
車程大概一個鐘頭十五分鐘，但並唔係直接入到St Michel，而係喺某個位置停下，再全車人轉搭shuttle bus。呢樣嘢之前上網都唔見人提……雖然好多人都係自己揸車去，但有唔少係好似我哋咁自己搭車去，奈何佢哋都只係話火車轉coach，冇講過coach之後仲要轉shuttle。我同拾爺見全世界都落車，就問司機，佢叫我哋轉搭shuttle，話唔駛錢。於是，我倆又急急拎喼去趕上架shuttle，可惜當時太多人，我哋上唔到……由於太多人上唔到，另一架shuttle隨即開出，我哋順利上車。
Shuttle原來都有幾個站，第一站可以去到supermarket，跟住就係同St Michel有一段距離嘅酒店集中地，我曾經都打算喺嗰帶到住，因為可以遠望St Michel，但歐陸Gary話酒店距離太遠，行唔到，叫我住番喺城入面，點知原來有shuttle嘅……
我哋喺總站落，但落車點同城入面仲有一段距離……唯有拉喼行入去，好彩當時停咗雨，只係……仍然好大風，吹到人頭都甩……
終於行到入城，進城後只得一條路，但係係斜路……啲路又係用小石鋪成，拉喼而上都幾辛苦，如果budget鬆動嘅旅客，建議入住首間四星酒店，又或者係較近城門嘅酒店，因為越入就越上鈄，都幾辛苦……
我哋今晚住嘅都係二星酒店，叫Mouton Blanc Hotel，喺Agoda到book，價錢都要千二蚊港紙，唔包早餐。其實through歐陸，加多一百可以坐到三星連埋早餐，但睇相後，我同拾爺都係鍾意呢間二星多啲，所以最後就算少粒星加冇早餐，都揀咗佢。
呢間酒店個位置都唔算幾好，行好耐先到……
去到見到同車四個港人都係住呢間，佢哋仲好心叫我哋唔好咁快捧喼入去check in，因為有機會要兜後路入去，到時又要捧番出嚟。初初我不明所以，後尾知道佢哋誤會咗人家意思，酒店十一點後會鎖前門，到時先要由後門入，而且，就算後門入，其實都要捧喼落樓梯呢。
拾爺派我做先頭部隊去check in，確定入酒店位置後，佢先捧喼。入到去，reception個女仔一輪嘴咁向我交待資訊，我英文唔好，listening更差，根本都接收唔切……只知佢安排咗一樓嘅房間俾我，可以由正門入，但十一點後正門會關，要由後門入，後門就要兜後面條路，跟住佢又俾咗張卡我，卡上寫有「2006」，唔知係乜……亦懶得深究，只想快快上房settle down，再趁個天未落雨，出去影吓個St Michel。
酒店個洗手間同浴室係分開嘅，都幾麻煩，每次去完洗手間，要入番浴室先可以洗到手……但我同拾爺幾鍾意房屋裝修，用咗好多木材。
個天光咗少少，多咗少少藍天，間唔中仲有陽光添，不過，整體予人感覺都仲係陰沉……
之後，我倆番入城搵食。一早上網check過，呢到出名食omelette，不過，大大個奄列一切開係白泡……最有名嘅係一間四星酒店嘅餐廳，我仲知道佢有茶餐添，tea time去食抵好多！其時兩點幾，我帶拾爺喺餐廳門口睇吓menu，搵極都唔見有茶餐嘅menu……已經過咗兩點半，又唔見餐廳有新menu放出……見到佢都有個€30嘅set，仲有個係€15添，於是決定唔等喇，就食佢兩個啦！
喺St Michel最出名食omelette嘅餐廳，位於四星酒店內。
入去坐低後，waiter就俾menu我哋，搵極都搵唔到出面嗰個€30嘅set……心諗唔通要單叫omelette嚟食﹖但單叫索價€39，好crazy！拾爺就想慳錢，話食個€15嘅就算喎。Waiter嚟落order時，我忍唔住問佢點解menu冇出面€30個set，佢話嗰個係茶餐嚟嘅，我再問茶餐幾點開始，佢話三點。問問拾爺，當時兩點五十分，就差10分鐘，10分鐘，足以慳到€9！我塊臉皮又即時加厚，問咗句﹕Can I wait for it? Waiter個樣好驚訝，聽完後就走去請示上司，我諗佢serve得有錢客多，冇見我呢種咁唔要臉嘅人呢。
餐廳menu
Waiter番嚟後，就收番原先個menu，俾咗兩份茶餐嘅我哋揀。拾爺個€15嘅set夢碎喇……不過好彩佢冇開口話食呢個，因為我哋見到一般omelette嘅價錢後，就懷疑€15嘅係兒童餐……雖然個茶餐都好貴，兩個人一人一個，就要€60埋單架喇，食tea食成六百蚊港紙，好奢侈哦！但……如果兩個人share一個，我驚會冇命出番去……所以就決定豪一豪佢啦。
茶餐得兩個選擇，一鹹一甜，我哋各要咗一個。
﹕見到omelette啲白泡嗎﹖係呢度嘅特色，所以其實就算個omelette睇落好多，食完都唔會好飽。呢個甜嘅omelette本來都ok嘅，但係……
waitress倒咗啲酒喺我塊omelette上面，之後就點火，畫面係幾唔錯，但之後塊omelette沾滿我討厭嘅酒味……
結果，我同拾爺交換咗個omelette嚟食。其實拾爺都唔鍾意食有酒味嘅omelette，但佢錫我，所以寧願自己啃。
Famous Mère Poulard’s chocolate sponge cake﹕外面脆卜卜，內裡軟綿綿，好味過個omelette呢。
食完飯後，我專登行出餐廳望一望個menu，果然有寫tea time時間，只係……好難睇到囉……
叫人點會留意到呢﹖
又係去到底先睇到係兒童餐……
食 飽飽，見天色仍然唔穩定，決定先番酒店拎環保袋，再去supermarket，搞掂今晚嗰餐先。番到酒店，執好行裝後，就問staff點樣去 supermarket，我哋係想行去嘅，但個staff話好遠，叫我哋搭番之前嚟時搭嘅shuttle bus，原來程shuttle bus係免費架！
離開酒店，向城門行去，本來仲有陽光嘅天空，突然變得陰沉，然後，行出城外後，就開始落毛毛雨，之後就越落越大……我哋 雖然有遮，但行出城後往shuttle bus站條路超大風，有遮都冇用……拾爺嘗試開佢把遮，一開就反了……想唔到旅程嘅第二日，拾爺把遮就報銷了……我件外套有帽，總算包住上半身，拾爺個頭 就硬食雨水……其實我哋算好架喇，起碼有件長袖外套擋擋雨，我見好多遊客乜都冇帶，小背心加短褲，走在路上，真係又凍又痛呢。一路行，一路諗起之前唱K唱 過黎瑞恩首「雨季不再來」(Oh，暴露咗我個年齡添……)，佢話「雨停留在我身 輕撫我的心」，呢句嘢呃人嘅，啲雨打在身上，不知幾痛呀！
好 辛苦先捱完去bus stop嘅一段路，上車後先叫暖啲，之後去到supermarket站就落車，喺supermarket買咗今晚嘅晚餐後，就再搭shuttle bus番去。落車後，又要經歷一輪風吹雨打先番到酒店……番到酒店，我倆即時洗頭沖涼，雨亦越落越大，原本打算今日下晝時間係上abbey嘅，而家天氣咁 唔穩定，我哋改為留喺酒店休息。
沖完涼後，個人一舒服，就開始眼瞓，本來話同拾爺一齊睇相，結果兩個都瞓咗覺……唔知係咪頭先淋雨嚟，我 身子一向差，淋一淋雨，個人就唔舒服……拾爺一再叫我起身食dinner，我都唔肯。但因為酒店冇雪櫃，我哋買咗嘅cheese同pâté唔keep得太 耐，所以磨到七點半，我終於不情不願咁起身，拾爺準備好哂啲嘢俾我食，我卻食到誓願咁……佢見到我咁嘅樣，就唔迫我食，俾我番上床瞓。
其實啲pâté幾好味，用嚟搽麵包食好正！可惜我唔舒服，享受唔到……
瞓到十點鬆啲，醒咗，出面停咗雨。之前幾個鐘不斷發夢自己錯失咗去睇潮漲，簡直係惡夢連連！抖擻精神，要求拾爺陪我出去睇潮漲。我一早做足功課，知道今晚十一點二十一分係水位最高之時，而家換衫，再行出去就差唔多喇。拾爺一向寵我，當然答應啦！
以為嚟到呢到，夜晚會冇咩人出動，但原來唔係，十點幾出酒店，走在街上，都仲有餐廳未閂，亦有遊客走動。行出城後，見到更多人，我估大家都係等緊睇潮漲。
晚上嘅St Michel真係好靚！都話再靚嘅景色，都要好天氣嘅配合架啦！停咗雨，個天清哂，加埋啲spot light，呢個夜景，真係一絕！
都已經過咗十一點，個天仍然未全黑，仲睇到晚霞呢。
睇住個天由藍轉黑，都係藍藍哋時影襯得St Michel靚啲。
晏晝我哋仲係經地下嘅石路出去，夜晚潮漲後，只能行橋。
晚 上有唔少人坐shuttle bus入嚟睇St Michel夜景，所以捱得夜嘅人，其實可以唔駛住喺城內，住出面一樣可以好方便咁近距離欣賞到呢個夜景。下次再有機會，我都會坐出面，可以遠影St Michel(潮漲效果更明顯！)之餘，又可以搭shuttle入嚟來個近照。
影相都影咗差唔多一個鐘！影完相，就行番酒店瞓喇。番到酒 店，正門閂咗，咁我哋就行後門喇，點知……後門鎖咗！要password先入到……正苦惱password係乜時，突然記起check in時receptionist俾我嘅嗰張紙，雖然冇帶喺身，但我記得係「2006」，於是就入呢四個number，BINGO！不過，拾爺都依然話鬼我 唔聽清楚人哋講嘢……
夜晚肚痾……可能係頭先十點幾仲食啲cheese，搞到個肚唔舒服……
番酒店途中見到呢條狹窄樓梯，有人嘗試穿過，我同拾爺覺得好得意，但太夜喇，聽朝先玩啦。
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
