飛機於法國早上七點九準時landing，八點幾我哋已經落機，今次喺Terminal 1降落，同上次唔一樣。我哋要搭機場內部嘅shuttle去番Terminal 3先有車出市中心。今次我好乖，一早喺網上搵哂資料，好清楚知道點樣搭車出番Paris市中心。出到Terminal 3後，拾爺就去排隊買RER嘅tickets去Port Royal，盛惠每人€9.5。
十點前已經上咗RER往酒店出發，坐緊RER時，有一男子突然走近並放下一張紙﹕
十一點四到達Port Royal﹕
我哋見時間尚早，加上我想慳吓錢，所以決定唔轉搭metro，而係自己行去酒店，需時大概半個鐘。不過，我哋行吓又影吓相，行吓又搵吓地方，可能用多過半個鐘……
點都好，十二點前我哋已經到達酒店，check in咗，但未有房……只能將行李store喺酒店到，輕鬆啲咁出去玩。今晚住嘅係二星酒店Avia Saphir Montparnasse，雖然係二星，但都索價€79架！見佢個lobby都唔錯，房間應該都舒服吧！
離開酒店，第一站係先去火車站，聽朝早車去Rennes，再轉coach去Mont Saint Michel (That’s why我唔想花太多錢喺今晚間酒店到。)，不能miss班火車，所以一定要掌握好火車站位置！行去火車站時，見到我之前book完酒店後先發現更正嘅Ibis，原來Ibis近好多呢，唉……
因為我哋唔識睇法文，waiter好好，逐樣用英文解釋俾我哋聽。不過，個餐牌都有少少誤導成份，我哋以為個set包starter、main course同dessert，點知原來weekend先係咁，weekdays就只可以starter同dessert二揀一……算啦，呢到啲嘢食份量咁大，兩碟都夠我哋食架喇。經waiter解釋一輪後，我同拾爺都揀咗starter加main course，starter方面，我要onion soup，拾爺要terrine，main course方面，我要他他牛，拾爺就食鴨。其實waiter唔建議我食他他牛架，佢覺得我未必接受到，但我想試吓食生牛肉喎，佢聽到我個order後，一再問我係咪confirm呢。
Soupe à l’oignon﹕呢個係我飲過最正嘅onion soup！因為我好鍾意食cheese，而呢個湯面層就有一塊厚厚嘅cheese，一啖芝士一啖湯，正到震！除咗芝士，仲有好多麵包喺湯入面，反而洋蔥就得好少。不過，唔緊要，我鍾意芝士同麵包多啲。呢個湯就連拾爺都讚正呢！
食飽飽，就行去Centre Georges Pompidou影吓相，之前到過Paris兩次都冇去過Centre Georges Pompidou，今次就順到睇吓啦，不過都只係喺門口影吓相，唔會入去。
龐比度門前，群鳥蜂擁而出！法國雖然雀鳥多，但我未試過中頭獎，總覺得呢到嘅雀鳥識得搵地方去洗手間，唔似得意大利嗰啲咁，周圍向途中派彩。
離開Centre Georges Pompidou，我哋亂行，行到去一個埋藏喺街道嘅商場﹕
之後，行咗去Galeries Lafayette，想去Longchamp幫兩個妹買袋，但因為我哋出發時，大喼重達24.3kg，超過遲啲由Nice飛去Munich嗰程廉航嘅個人行李重量(間airline唔俾兩個人合計重量……)，我哋喺法國唔可以買大型嘢之餘，仲要諗諗計幫個喼減磅呢！所以，兩個妹嘅Longchamp無望喇……其實我好想幫佢哋買到，等佢哋開心吓……雖然我冇買到，但都有入Longchamp睇吓啲袋嘅價錢，發覺其實都貼近佢哋個budget price，都唔係真係好抵啫。再到Chanel (蠢咗！喺一樓排咗好耐隊，然後上二樓時，根本就唔駛排隊都可以直入……)，今年啲accessories唔多靚，睇唔啱任何嘢，慳番！
離開Galeries Lafayette，向La Basilique du Sacré-Cœur de Montmartre進發！拾爺睇完地圖話可以行到過去，仲帶我由街上遠望間教堂，我見行去搭metro都要一段路，然後搭得一、兩個站，由metro出去，又要再行一段先到教堂，於是就應承拾爺行過去。行行行，越行越口渴，應該係頭先餐廳啲嘢太重口味……好彩經過超市，即時入去買番支1L嘅Evian(€0.59)，一出門口，我倆即時KO咗三分二支水！繼續行行行，行極都未到……原來拾爺行錯方向，我倆兜咗一截冤枉路……行到身水身汗，終於，到達La Basilique du Sacré-Cœur de Montmartre山腳，望住嗰條長長(乘10呀唔該！)嘅樓梯，真有種想死嘅感覺！但最後還是頂住行上去！
行呢條樓梯時，我根本冇諗過之後嘅旅程原來仲有好多條樓梯等緊自己……
本來想喺聖心教堂等天黑，但Paris好遲先日落，日落後又要一段時間先會天黑，聽朝早車，今晚不宜夜歸，聖心教堂嘅夜景多年前我已經睇過，拾爺又表示唔會因睇唔到夜景而失望，我哋就決定唔等夜景。不過，喺到欣賞巴黎市景時，又有show睇，而且呢個show非常精彩！精彩程度到係我歐遊三次，首次見到有人主動去俾錢，而唔係表演者演出完畢後主動向人家要。
離開La Basilique du Sacré-Cœur de Montmartre，我哋搭metro(€1.7 x 2) 番酒店。酒店對我哋真係唔話得，安排頂樓房間俾我哋，只係……呢間酒店啲lift全部唔係直達樓層，lift得三個buttons，1/2、3/4同5/6，即係住客一係要行上半層樓梯，一係要行落半層樓梯，但我哋被安排住7樓……即係要行上一層半樓梯……更慘的是，酒店嘅樓梯係浪漫型旋轉樓梯，極狹窄！想中途抖吓氣都唔得……我哋個大喼重達24.3kg，被Qatar airline命名為heavy，真係捧死我拾爺咯。
辛苦爬到入房，先發現……房間冇冷氣！係我錯！我應該喺book酒店時check清楚……其實，Paris夜晚嘅天氣清涼，冇冷氣本來係ok架，但間房極唔通風，就算開大個窗，啲風都吹唔到入房……成間房好似sauna室咁……今日行咗一整日路，汗流浹背，真係好想冇冷氣都有涼風吹吹……
二星酒店唔止冇冷氣，就連雪櫃同水煲都冇……冇水煲，即係我哋攰一攰都要想死番出去買水，如果唔係今晚唔止熱死，仲會渴死……
往火車站方向搵水搵食，好多舖頭都閂咗門……好彩，仲有一間類似便利店嘅舖頭未閂，入去睇吓水同嘢食嘅價錢都唔算離譜，望望關門時間，仲有得走盞，於是再向前行，睇埋前面間老佛爺收咗未。不幸地，老佛爺收咗舖……唯有番轉頭幫襯便利店，買咗一排yoghurt(€1.81)同兩支水(€0.64 x 2)。
是晚，房間太熱嘅關係，平日惜肉如金嘅拾爺決定嚟一次裸(露上身而)睡！而我，其實沖完涼後(講開沖涼，又係想死！酒店洗手間唔算好細，但個淋浴間超細，轉身都有難度……搭咗咁耐飛機，行咗一整日嘅路，想嘆番個舒服嘅熱水涼都唔得……)，感覺好多了，熱我唔怕，最怕係……買完水後，一番到房，就聽到隔離大廈啲人超嘈嘅交談聲！原以為夜啲佢哋會散band啦，點知……越夜越多人join呢個party，到我差唔多要上床就寢前一刻，佢哋仲開大個HiFi喺到rock……Oh my god，乜法國冇嘈音管制架咩﹖！
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
