過埋今晚，就要離開Cocoa Island，我已經開始唔捨得喇……
今日依然陽光普照！不過我同拾爺噚晚睇完Batman，今朝有少少賴床……
換完衫，又係時間出去食早餐，依然揀番室內坐，有風扇涼啲嘛！
(味道嘛……我最後都係飲番橙汁囉，哈哈！拾爺話我接受能力低……但我覺得西瓜加薑好奇怪嘛！)
今日我哋又order新嘢，但個配搭好錯！呢件事教訓我哋，下次真係要好好plan吓先好order……
(Egg white and zucchini frittata with sauteed mushrooms, roast tomato & thyme: 偏鹹……)
(Buttermilk pancakes with poached pineapple, blueberries, pine-lime maple syrup: 嘩，甜到呢！加上個人又唔肚餓，食呢個真係好飽好滯……)
食咗咁多日嘅早餐，係今日食唔哂……師奶性格嘅我，覺得好浪費……
食 飽飽，休息一陣，就陪拾爺去snorkelling喇！其實噚日喺房突然發現張寫滿活動嘅紙(唔知點解之前唔見……好邪！)，其中有免費嘅guided snorkelling，拾爺想報名架！但佢哋話今日活動太full，安排唔到……佢叫我哋報聽日，聽日我哋就走喇，玩唔到lu……冇得跟人玩，唯有自己 玩啦！拾爺已經玩到喺自己房嘅露台落水都滿足唔到佢，所以我哋今日行去睇到日落嗰邊嘅碼頭snorkel！當然，我只有睇嘅份兒啦！由於碼頭嗰邊冇遮冇 掩，我就咁坐喺到睇拾爺snorkel，隨時中暑，所以我拎咗房間提供嘅大遮一把，一邊擔遮，一邊幫拾爺影相，一邊望吓海咁啦！我仲帶埋麥兜出嚟一齊曬太 陽添呀！只可惜……當我幫緊麥兜影沙龍時，佢一下唔小心跌咗落海……我即時叫拾爺幫我執番，幾驚拾爺鬧鬼我呀，好彩佢冇，幫我執完，仲幫麥兜沖涼呢！(不 過，事後佢狂笑我……番到屋企，佢對住其他公仔講話好彩冇跟我去馬代，如果唔係就會跌落海架喇，過份！)
(最貴嘅房，有私人露天平台睇日落，勁爛漫！好想住上一晚，但超貴囉！)
(啲雀好鍾意企喺道路兩旁，好似列隊歡迎人咁！)
(拾爺snorkel緊嘅時候，有另一家人又嚟snorkel，呢家人之前都見過佢哋架喇，佢哋全副武裝咁款，係玩開snorkelling嘅人嚟架！個女年紀少少，已經跟住父母潛出深海，利害！)
(麥兜不幸墮海，拾爺執番佢之後，幫佢沖身！)
拾爺好想同我分享水底世界嘅美，於是用部防水機影相同拍片俾我睇！佢之後一路播一路解釋俾我聽佢見到啲乜嘢，其實落唔到水都唔緊要啦，我最開心係拾爺玩得開心！見到佢每一日都笑得咁開心，我覺得冇嚟錯呢到！
(海底世界！)
拾爺snorkel後，我哋就番房食lunch。呢個時候，我哋嘅是日水果亦都送到！
(每日都有啲不知名嘅水果！)
(沖完涼嘅麥兜要曬太陽！)
食完lunch，休息一陣，我哋又出去影相！聽日就要走喇，點都要把握時間，影多啲靚相，留個美好回憶！
差唔多四點，就行去yoga pavilion到，等做yoga。拾爺唔玩yoga，自己行咗出去曬太陽。
仲以為得我一個上yoga，點知等吓等吓又多一對夫婦同一個女仔！好耐冇做yoga，唔記得哂啲動作喇……而且，我啲筋又比之前緊咗……我都擔心第時老咗身體會好差……
(嚟呢到做yoga，可能有啲人覺得好無聊，但一生人有幾次可以對住個海做yoga先﹖我覺得用一個鐘啫，可以試吓囉！)
做完yoga，導師俾咗我哋每人一杯ginger tea，同上次喺spa centre飲到嘅一樣！聽拾爺講，呢杯tea喺restaurant到，賣成US$6架！幾辣都要飲哂佢呀！哈哈！雖然我係唔食得辣，但原來唔係只有我同拾爺覺得杯ginger tea辣架！連一齊做yoga嘅嗰對夫婦都係咁講！
拾爺嚟接我時，同我講有人喺到結婚呀！唔怪得頭先做緊yoga時，見到有一大班人經過，仲見到我哋個接待人招呼緊一班人啦！
(喺 到結婚，成個環境係幾靚幾爛漫嘅！但個人鍾意結婚時有至親同老友在場見證同祝福，如果我發咗達都可以請埋佢哋嚟嘅，可惜我冇錢……所以都係留番喺香港結最 好！同埋，我覺得出埋機票錢俾工作人員嚟好溶，啲錢俾自己再去旅行好過喇，哈哈！But，個個人唔同想法嘅，人家可能就係要安靜結婚呢！)
把握最後一個日落美景，同拾爺影番啲爛漫相﹕
(希望我倆以後都係咁sweet sweet！請繼續包容我嘅任性，我知道你照顧得我好辛苦……但請唔好放開我！)
影完相，我哋行去reception到問佢聽日 check out安排。其實之前嚟問過一次，佢哋話要check前一日先知，所以今日再嚟。但今次個staff又話酒店會俾封信我哋同我哋講，佢問我哋個 flight time，之後話可能會係七點check out，咁筍﹖！
番到房門口，真係有信！Check out time係下午六點，yeah！不過，八點先有船送我哋出去，咁嗰兩個鐘做咩呢﹖聽日先算啦！信中仲附上我哋出海釣魚同嗰日食lunch order嘅嘢飲收費，主要係confirm個銀碼有冇問題。Well，個銀碼嘛，會再加囉，哈哈！因為……我哋要出發去豪食一餐喇！之前已經plan好 最後一晚會去餐廳食，只係……估唔到撞正佢哋個主題之夜 — Seafood Barbecue，索價US $135一位，未計加一同稅，我掙扎咗好耐，先決定去豪一豪佢架咋！
(我哋原先坐出面，因為太黑，所以waiter俾完menu我哋，就幫我哋夾支電燈仔，好得意！)
本來想坐出面，對住個pool，望住人哋煮嘢食，好似好氣氛啲。但係餐廳入面有得拎嘢食，坐出面唔太方便，所以都係入番去。餐廳開七點，我哋都係差唔多時間到，當時食客唔多，後尾先有啲人陸續出現吓。US $135一位嘅bbq buffet唔包嘢飲，所以waitress(當日陪我哋搭船入嚟嘅女仔！)問我哋要唔要嘢飲，我問佢有冇tap water，佢話﹕Sure. We have Cocoa water.
(仲以為可以慳到嘢飲錢，點知原來呢支水要收US $3……tap water都收錢，想點﹖！OKOK，高級餐廳嘛！)
Settle down後，我就出去拎嘢食喇！
(呢個前菜超好食！我同拾爺都好鍾意，我食咗3杯！係龍蝦肉沙律嚟嘅！)
(好 好味嘅oyster！拾爺不愛食生嘢，平時根本唔會有機會去啲專食oyster嘅地方食飯。要食oyster，都只能食一般buffet提供嘅劣質貨…… 食過最好食嘅，都只係The Market嘅細蠔。估唔到嚟到馬代，俾我食到咁好味嘅！重海水味，重蠔味，幸福！餐廳應該預先幫我哋片起咗塊蠔，所以我食時，只係輕輕用叉片一片，成塊 就起哂，食得好方便呢！可恨我只係食咗四隻……其實我腸胃一向唔好，平時出去食buffet，我只會食兩隻，今次已經係好大膽地食多咗。本來拾爺都放寬俾 我食夠半打，但係……原來蠔嘅供應有限，食哂就冇……餐廳跟住係供應魚生片囉……)
(每樣試咗一塊就算，唔好食……)
(同爭鮮一樣嘅水準……)
(冇掂過……)
行出swimming pool，我哋可以揀seafood俾chef幫我哋grill！
由 於lobster太好味，我哋第二、三、四轉嘅order都有佢份，哈哈！第二轉我哋仍然主攻King prawn同lobster，第三轉拾爺試咗snapper，最後一轉只係叫lobster，因為都好飽喇……唔知點解，拾爺出去嗰次嘅order，佢哋 只係俾咗半隻lobster我哋啫，所以我哋一共只係食咗3隻半lobster，6隻king prawn，2塊tuna steak同一塊snapper。冇試到squid。拾爺笑我飽飽都要食lobster，我話要食回本！之後，佢就陪我癲，一齊計吓回唔回到本，哈哈！我 哋自己喺到計，呢樣值幾多嗰樣值幾多，然後就當自己回咗本喇，跟住就喺到大笑，好傻哦！
真 係食夠喇，我哋就order dessert。因為佢哋收走咗個menu，所以只能靠waiter口述有咩揀，佢只係講咗fruit同ice cream，其實仲有第三樣架嘛……算啦，幾多樣我都係揀ice cream架啦！餐廳只係送上一份dessert，我哋想知dessert係咪任食(我個胃仲可以任食到dessert架！哈！)，捉個waiter嚟 問，但佢誤會咗我哋意思，走咗去幫我哋check單，發現欠我哋一份甜品(兩個人兩份嘛！)，於是就再送上一份ice cream。
(House made ice-cream & sorbets: mango carpaccio ginger syrup﹕個雪糕好軟綿好滑，我鍾意呢種texture！Sorbet嘛……唔係我杯茶……)
餐 廳喺八點到，開始多番啲人氣，不過，原來嗰一大堆嚟食嘢嘅人，都係酒店嘅staff……當然，全部都係外國人，而冇馬代人份啦！其實，我覺得馬代人都幾 慘，呢個咁靚嘅地方，呢到咁優質嘅資源，明明係屬於當地人嘅，但最後得到最大利益嘅，卻係外國人……當地人只可以做低下工作，賺取微薄嘅收入……
食飽飽，離開餐廳後，同拾爺去咗賞月。坐喺木橋嘅長凳上，伏喺拾爺嘅膊頭上，望住又圓又大嘅月亮，同拾爺談談情，感覺幸福！(嚟到馬代，你係會不期然做好多好多好爛漫嘅嘢架！)
聽 日就要走喇，好唔捨得！呢種強烈嘅不捨，前所未有！以前去旅行，都會唔捨得，唔想番香港，但今次個感覺嚟得強烈！我真係好有再嚟嘅衝動！但係……我仲有好 多地方想去喎……希臘啦、西班牙啦、葡萄牙啦、冰島啦、德國啦、東歐啦、北歐啦、長灘島啦、越南啦、北海道啦、京阪神啦……數唔哂呀！如果中到六合彩，你 話幾好呢﹖！
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
