馬航啲位真係坐得人好唔舒服，雖然係夜機，雖然好眼瞓，但都係瞓唔到……四個幾鐘嘅機，只可以話係閉目養神……飛機餐嘛……又係叫人倒胃……
六點幾landing，吉隆坡竟然落雨﹖！仲以為呢到長時期都會好好太陽嘅添！老公話馬來西亞多雨，先會多水果喎！
落機後，我哋快快過關拎行李，馬來西亞嘅入境手續幾得意架，要人提供兩隻食指嘅指模！搞掂後，拾爺就去information centre問人邊到搭車去馬六甲。佢之前send過email問酒店嗰邊點樣由機場去，酒店話會有大巴到，仲係加開咗一架七點幾嘅添，我同拾爺都好想 趕上！可惜……information centre啲人話呢到冇車去到馬六甲……拾爺唔甘心，再去另一個information centre問，答案都係一樣……我哋唯有死心，先搭車去舊機場，再喺舊機場搭去馬六甲啦！
跟住information centre嘅指示，行到去platform 10，拾爺去買飛，每人RM2.5。每半個鐘一班車，我哋去到時，啱啱過咗七點，要等到七點半先有車喇……
我同拾爺都有心理準備，去到舊機場搭唔到七點車去馬六甲，可能要等九點半車。半個鐘唔到嘅時間，我哋已經到達舊機場。之後，又係去搵information centre問點搭車。搵咗好耐，終於搵到，但個counter唔開……又要再搵另一個……問到去邊到買飛，我同拾爺就匆匆去買飛(每人RM22.1)， 買到九點嘅車飛。望吓錶，而家先八點……要喺到等一個鐘，我哋都有啲肚餓，於是就開喺馬代食剩嘅芝士餅醫肚。
(吉隆坡舊機場)
八點半過後，拾爺行去睇吓上車位有車嚟未，之後就番嚟話車到，同我一齊推行李上車。
(放低行李後補影嘅街道照)
(呢到expect啲人喺黃線以外嘅地方行，真係唔知可以點行……肥啲都會踩落坑渠囉！)
行咗幾條街後，終於到酒店喇！今晚住邊間酒店其實我一直都唔知，呢間酒店係拾爺搵嘅， 佢唔講個名俾我知，唔准我睇hotel voucher，佢話唔想我上網查，要到時俾個驚喜我。(其實住過Cocoa Island，呢到唔會超越得到佢，會有驚喜咩﹖)拾爺話呢間酒店冇星架，喺呢到好難講幾多星，但一定唔會差得過第一晚喺馬累市住嗰間，但又好唔過聽晚吉隆坡嗰間喎。酒店叫Courtyard，係一間中國風酒店，無論裝潢定係傢俱，都充滿著傳統中式味道。
(Check in時冇手影，之後又趕住去醫肚，夜晚番嚟先補影番個外look！)
(酒店lobby)
入去搞check in手續，見到各類房價，大概估到老公訂咗邊種房，想打開相簿睇吓，拾爺又唔俾……不過，原來呢到星期五、六晚房間會貴啲，但要就行程，我哋唯有捱貴房啦！時為十二點，但酒店未俾到房我哋……佢哋話兩點先得……唯有放低行李，輕裝出去醫肚先啦！頭先嚟時見到中華茶室排長龍，據旅遊書所講，呢間茶室賣嘅海南雞飯粒最受本地人追捧，冇特定閂門時間，賣哂就收檔，周末同假日通常兩點就賣哂架喇！所以，我哋第一站就係去排隊食雞飯粒。排排吓又落雨……
排咗半個鐘，終於入到去喇。話說排排吓，前面嗰四男一女竟然俾咗佢哋四個friend插隊，真係好想鬧爆佢哋！然後，當佢哋成班衰人入咗去後，我同拾爺等咗 好耐先有人理我哋，幫我哋安排入座。呢到點菜好得意，入座前有個亞姐會問我哋有幾多人，我哋話兩個之後，佢就幫我哋決定埋食乜。可能因為呢到只賣雞飯粒啦，亞姐好快咁話兩個人就要個二人餐，RM18，我哋話好，佢就帶我哋入去坐。
坐低冇耐，又有一對香港couple問我哋可唔可以搭枱，反正張枱咁大，我哋又唔會食得耐，所以都冇所謂。之後，有個亞叔問我哋飲唔飲嘢，我冇要到，但老公就要咗杯barley。餐廳先上barley，之後好快就嚟埋其他嘢喇！
(價值RM1嘅barley，淡如水……)
(雞飯粒，其實即係將啲飯搓成粒狀。要令飯成粒狀，飯本身少不免會較為濕，所以對於偏愛食較為乾硬嘅飯嘅我嚟講，唔會太欣賞呢道馬六甲名菜。飯濕都算喇，冇雞油香嗰到唔掂嘛！)
埋單RM19，試過就算，唔駛排隊都唔會再幫襯！
食完飯，未夠兩點，唯有喺雞場街盪吓。我哋過咗對面好多人入去嘅「三叔公」，原來係間大型食物手信店，好多人喺到掃貨，不過，我同拾爺都冇買嘢。
(另一間排長龍嘅雞飯粒舖頭)
喺雞場街盪到差唔多兩點，就番酒店喇。早上嘅雞場街只有兩邊商店開門，舖頭唔係賣衫就係手信精品，都會有啲小販檔賣嘢飲同水果，拾爺話一到五、六、日，呢到夜晚就會變食街，今晚可以嚟掃街。
拎咗房鎖，就番房沖涼。我哋個房號係G4，型嗎﹖哈哈！
沖完涼，又再出發！頭先個雞飯粒份量太少，我想再食嘢，我要食沙嗲串燒！出去時，又影吓間酒店，以下個area係要住客啪咗卡先入到架！我哋拎鎖匙前都入唔到。
出到去，一路努力搵旅遊書介紹嘅沙嗲串燒舖，一路四圍影吓相。
(好多人嚟拜神！)
(拾爺話喺呢間cafe食嘢都唔錯，望住條運河，幾好feel喎！但嚟到呢到，我想食地道嘢多啲囉。)
跟住拾爺去搵沙嗲，遠離充斥人群嘅地方，到達較幽靜嘅大馬路處，拾爺雖然搵到旅遊書上所講嘅嗰條街，但點睇條街都唔似有食肆……最慘係，呢到冇標街號，我哋企喺中間位置，都唔知向左走定向右走好……本來想話放棄書中介紹連名都冇嘅小店，改為食另一間又係喺當地受歡迎嘅食肆，但係……間舖搬咗……雖然間舖嘅搬 遷啟示有埋地圖，但對我哋啲不熟路嘅遊客嚟講，要搵佢出嚟，又係花時間……
(搬遷啟示係banner嚟架！)
為咗唔令自己有遺憾，我決定同拾爺搏一搏，沿住條唔似有食肆嘅路行，搵吓間舖！行行 吓，開始見到有街號表示，行啱咗喇！不過，沿路竟然係有博物館，我哋住嘅酒店分店(裝潢冇我哋間咁好！)，同埋好多工地，仲有……拾爺叫我千祈唔好望嘅死老鼠！其實嚟到馬六甲，真係覺得呢到好污糟，成日都有flies飛嚟飛 去……食嘢時要分外留神，撥走佢哋，以免未食就得報銷。
(燕子生態館)
向前行至盡頭，再有分叉路……轉入去會有啲舖頭仔，仲有好多人開始喺馬路兩旁set嘢，夜晚應該又會係一條食街，但街號唔啱……向前行嗎﹖冇街號之餘，前面更加唔似有舖頭……被迫放棄食串燒……
(好多人揸哂van仔嚟開檔！)
(好多攤檔，有賣雞飯粒嘅，賣嘢飲嘅，賣水果嘅，喺到行一轉，dinner一定有著落！)
食唔到沙嗲串燒，行到身水身汗，我哋改為去「地理學家」飲嘢。根據旅遊書所講，呢間cafe係當年「夏日麼麼茶」嘅取景地點之一，我估就係鄭秀文呃任賢齊自己男友同好友夾埋背叛自己，然後發現真有其事嗰場。
行番入雞場街搵食，又乜都影一餐。
(燒魷魚，勁香！)
(香港都有嘅嘢，我唔會山長水遠嚟到馬六甲試囉！)
終於搵到「地理學家」，入去飲嘢囉！
(有live band嘅setting，但冇人唱歌……可能要夜晚至有。)
我同拾爺各點咗一杯嘢飲，再加一個叫Tempeh嘅小食，根據menu所講，呢個小食源自Indoesnia，有成幾百年歷史架喇，係用豆造嘅。
(食店開始set嘢，準備晚市！)
(真係咩地方嘅嘢食都有架！)
(呢到好多舖頭都以鄭和為名稱，據旅遊書所講，咁係因為當年鄭和七下西洋，促進咗呢到嘅貿易，改善居民生活，所以呢到嘅人對佢好敬重。)
(元寶蠟燭都有得賣呀！)
同拾爺行吓行吓，就離開咗雞場街，去咗運河一帶，運河兩旁有好多cafe，拾爺問我有 冇興趣喺到飲番杯嘢，答曰﹕冇！拾爺問為何，答曰﹕一. 條運河一啲都唔靚！二. 飲完嘢搵唔到乾淨嘅洗手間解決！三. 呢到咁多貓，嚇都嚇死咗！拾爺又問我有冇興趣坐船遊運河，唔好玩啦，嘥啲咁嘅錢嚟做乜﹖！拾爺話呢條運河同荷蘭嗰條差唔多，唔係嘛﹖！差得遠！呢到污污糟糟咁，兩岸景色又唔靚……拾爺則覺得荷蘭嗰邊嘅運河，兩岸啲屋建築風格如倒模式的一樣，無甚特別，呢到嘅cafe，間間建築風格唔同，有趣！荷蘭嗰邊運河兩岸嘅屋建築風格雖一樣，但佢哋佈置不一，而且乾淨企理，睇得人好舒服！呢到嘛，啲屋係就係有不同風格，但好多都甩皮甩骨，睇落去係破舊唔係特別……
(好多cafe！都有唔少外國人喺到飲嘢，我哋仲見到有人坐喺cafe寫生添！)
(運河遊船)
(聖芳濟教堂，冇入到去睇，斷估佢都唔會靚得過歐洲嗰啲架啦！)
(原來馬六甲都被列入UNESCO架！失敬失敬失敬！)
沿住運河行咗一陣，就番轉頭，過橋去番今朝落車個廣場，影吓啲紅屋。
(拾爺話馬六甲曾受葡萄牙統治，所以不少街道都有葡式味道，連條橋都要鋪磚呢！)
(旅遊警察﹖)
(街道都鋪磚架！)
(呢個就係好多遊客都會與之合照，但睇唔出佢有咩特別嘅噴水池！)
(呢啲就係我話好似殯儀車嘅人力單車喇！)
離開廣場，我哋入番雞場街，再番酒店稍事休息。
(當條馬路兩旁泊滿車輛，我哋就要被迫行馬路，黃線以外都行唔到，好鬼危險呢！)
番到酒店，同拾爺講起我哋間房叫G4，於是兩個白痴喺到扮特警，就係呢條走廊(我哋間房出面！)扮要衡入敵軍陣營，拎住條鎖匙扮鎗！玩得好開心，但係……我哋休息完，決定夜晚去邊到食飯後，再出發先發現，原來呢條走廊有閉路電視，頭先啲白痴嘢，被職員睇到哂……行出去搵食時，我哋總覺得個職員笑緊我哋……
同拾爺決定今晚去食娘惹菜，旅遊書介紹咗兩間，我哋都有啲興趣，反正兩間都近酒店，於是決定去睇一睇。一出去，就發現成條雞場街無論係大街定小巷都開始熱鬧起嚟！
第一間係叫「僑生餐館」嘅餐廳。餐廳裝修豪華，就連餐牌都精緻過人，好明顯專攻遊客！
之後，我哋再行去Nancy’s Kitchen，呢間就街坊好多！我哋喺出面裝裝吓時，有一班人啱啱食完出嚟，其中有個女人同我講話嘢食好nice，叫我哋去試吓。於是，我唔想食啲專攻遊客嘅餐廳，好似入去被掠咁，所以決定試吓呢間！
一入去，就有張四人枱，即時坐低！好彩我哋入得嚟快，因為坐低冇耐，越嚟越多人嚟幫襯，全部要等！呢到唔興搭枱嘅，所以就算出面企滿人，我哋兩個人坐四人枱，餐廳都冇再安排人同我哋同枱。
睇完menu後，我哋叫咗四個小菜，一杯嘢飲(本來係叫兩杯嘅，其中一種賣哂……)同埋一個白飯。
(Deep Fried Squid﹕唔好食！睇相就知，粉多squid少，仲要炸到硬「掘掘」，虧佢個menu仲要寫到食客會taste到unbelievably delicious，我只係覺得碟嘢係unbelivably難食！食佢，只為解另外兩道菜嘅辣！因為只要唔點醬，佢係唯有唔辣嘅小菜！)
(嘢食大合照！)
原本我哋仲叫咗Top Hat嘅，但食哂啲嘢後，仲未上菜……問一問，原來漏咗單……鑑於三碟小菜唔係難食就係一般，加上碟通菜辣到我哋嘴都腫埋，我哋唔想再食辣嘢，於是就話唔 要Top Hat喇，快快埋單(RM36.75，漏單冇服務可言，都仲收人RM1.75 service charge……佢都得架喇！)，番酒店飲水！
拾爺食得比我多，杯嘢飲又飲得比我少，所以佢辣到癲咗！好彩酒店有冰水，飲完，舒服哂！再出去掃吓街。
(RM0.6一包，見其他人都係幾包咁買，但我只買一包，order完，感覺老闆同老闆娘黑我臉……味道嘛……其實都食唔出啲魚滲咗蕉葉味……)
(擺檔個肥仔好努力咁chok個盆，其實我唔知呢檔嘢係咩葫蘆賣咩藥……)
(都話今晚有表演睇架啦！)
(有我至愛嘅烤鳥蛋！去親台灣都會食架！但韓式即係點呢﹖)
(估唔到條街行行吓，可以轉入公園！不過我哋冇入到去。)
行完成條雞場街，去影埋運河夜景就番酒店休息喇。番到酒店門口時，拾爺突然叫停我，著我唔好再行，之後入咗酒店佢先話我知頭先有隻老鼠經過，好嘔心呀！
(一班馬拉少女危坐運河邊，睇到人都驚！)
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
