2012 多倫多之旅 Day 8

(早餐仍然係捱麵包，不過，有最後一罐罐頭送麵包食。)

集合前，匆匆影吓酒店啲lift，但影唔切個lobby……

今日我又坐番前排，同一個強國男人一齊坐……好彩，佢唔係暴發戶型，亦唔係老粗，佢係上海人，都算斯文嘅。但佢間唔中會問吓我嘢，我其實唔想講嘢……叫我講國語仲慘過叫我講英文(我英文都已經唔係好架啦！)……

導遊話今日冇咩行程，主要係搭番車番去，途中只有一個景點，就係遊千島湖。所以，今日真係名符其實嘅全日坐……

我哋會先坐兩個幾鐘車去食lunch先，join咗伙食嘅團友慘喇，呢頭食完早餐，十一點鬆啲就叫佢哋食自助午餐……食lunch前，途經一個地方，司機見有時間，就轉車入去停低俾我哋去影相。

(我唔記得呢個建築物有咩來頭喇，但就覺得佢好得意，好似話好難起到架喎。)

喺到影咗一陣相，就真係上車坐坐坐，坐到食lunch時間。我冇join到呢個lunch，但今次個地點四周都冇咩嘢俾我影相，所以我都係stay喺個商場入面，行吓啲舖頭。好彩，個商場都有洗手間俾我去啫。

(喺商場無無聊聊，咩都影一餐。)

團友食完lunch，我哋又要坐成三個鐘頭車去遊湖。期間導遊都有播吓片，我就……瞓覺囉。哈哈。今日天氣唔多好，時而落毛毛細雨，時而傾盤大雨。同一條公路上，呢一截落大雨，到下一截又會突然陽光普照。我心中只希望去到遊湖時唔好落雨，如果唔係，靚景都變頹嘢……

三點多，終於到遊湖景點！

(我問導遊可唔可以去洗手間，佢叫我上船先去。後來上到船，發現個洗手間又細又污糟又臭，我冇去到！落船第一個跑去洗手間，之後……最後一個上車……但呢個洗手間好好多！格數多，又乾淨！)

落車後，天色好暗……我哋每人獲派一張藍色飛，然後自己行去碼頭，上船前，船公司嘅人會撕去其中一截。

開船喇！個天亦開始落雨……船上有廣播，有人會介紹吓呢個地方。不過，佢會用好多語言去介紹，聽到人好混亂……唔 想留喺下層，我同對香港母子一齊上咗上層影相。初時都有毛毛細雨，加上天氣好凍……我即時拎出亞頭媽媽俾我嘅手襪用嚟，香港母子見到都讚我醒，早有預備！ 其實，我係有一寶照住啫！但架船開出去後，漸漸見到藍天，太陽都出埋嚟喇！之前導遊講過，千島湖其實就係有好多好多島喺到，呢到對島嘅定義，就係要至少有 棵樹！所以，就算個島細到只有一棵樹，都叫一個島！如果成個島都冇樹，就唔叫島喇。佢話啲人一種會種至少兩棵，咁一棵倒下，仲會有另一棵喎。呢到有啲島上 嘅屋係會出租出去俾人作渡假之用架！不過，雖然呢到風景好靚，但要喺到住，或擁有一個島都好煩，因為你要有自己嘅船先可以上到島，而且每年都要花唔少錢去 維修島上嘅一切。所以，有錢嚟租吓地方渡假就算喇，哈哈！

(開船初期，天色仍然昏暗……)

(開始有藍天喇！)

(我哋架船嘅船上國旗！)

(呢 個就係最大嘅島喇！好似係屬美國擁有嘅。聽導遊講，千島湖有一部份係喺加拿大國境之內，一部份就係喺美國國境之內。但遊湖時，可以整個湖咁遊。只係，如果 想上呢個小島，就要辦理入境手續……佢話遊湖可以分一小時同三小時嘅船程。後者就包埋上呢個小島，因為要搞入境同出境手續，所以需時處理。但我哋呢個係一 小時船程，所以就冇得上去喇。不過，就算俾我上去，我都入唔到境啦，我都冇美國簽證……)

遊 完湖，旅程真係到尾聲喇。我哋驅車前進，番去Toronto喇！因為downtown距離遠，所以係第三站先到，導遊仲要喺我早一站落車……到 downtown喇，香港母子同我一齊落車。佢哋之前話佢個朋友未必得閒嚟接佢，仲問我一唔一齊食dinner，但我已經好攰，想早啲番上去。一落車，佢 個friend就已經喺到等佢哋喇，同佢哋say完goodbye後，我就自己上樓。

上 到去，亞頭開門俾我。佢好驚訝我自己上咗嚟，原來佢諗住一陣落去接我架，佢冇諗過我會早咗番。其實當時都唔早喇，差唔多八點……我見間屋冇咩人氣，就問亞 頭uncle同auntie喺邊，原來auntie早兩日個心唔舒服，入咗醫院……呢一、兩日做咗body check，等緊報告，可能要做手術。聽到之後，我個心都好唔舒服，希望auntie冇事啦。

亞頭問我去唔去食dinner，其實我都冇咩胃口，所以就唔去喇。佢晏晝買咗越南包未食哂，所以就食埋佢當dinner。

是晚，快快沖完涼就上床瞓喇。