2011 法比荷之旅 Day 16

七點半起身，如我所料，天氣晴朗！今日要走啦嘛，根據經驗，拖喼走嘅一日，一定係sunny day嘅。

八點八check out，store咗啲行李喺酒店，就搭tram出去Singel Canal Flower Market。香港嘅花墟好早就好熱鬧架！但呢到……九點都仲係好冷清……好彩都有舖頭係開咗架！喺flower market附近有間舖頭以Christmas為主題，一入去就見到有塊indicator寫住仲有幾多日就到Christmas！入面賣嘅係同 Christmas有關嘅嘢，播嘅歌亦然。

雖然個flower market冇乜嘢睇，花唔多，反而種子多，但最多竟然係啲無無謂謂嘅紀念品……但嚟咗呢到我真係好開心，因為……竟然俾我買到Lily of the Valley嘅種子呀！我知道，種子係唔可以出口架！但……我決定用€3.5嚟搏一搏！(拾爺不但冇阻止，仲鼓勵我咁做添呀！)

見今日天氣咁好，我哋當然唔會行完flower market就番酒店咁掃興啦！沿住運河影吓相，再去搵搵酒店leaflet介紹嘅一間cafe。

搵嘅過程中，我哋見到有唔少裝修得唔錯嘅cafe，其中有一間放咗張床褥出嚟，俾人當床咁坐或瞓上去嘆咖啡，一對佔據其中一張床褥嘅情侶見我望多兩眼，個男嘅就叫我哋join埋佢哋呢！不過，我哋冇動搖，因為拾爺要去試leaflet介紹嘅「最正apple pie」！

終於搵到間cafe，本來想坐出面，但太多人，冇位……拾爺本來想要 個apple pie set，但因為我個Breakfast special(€6)有橙汁又有coffee，而我又唔飲coffee嘅，所以就俾咗拾爺，慳番杯coffee錢喇！落完單後，拾爺再出去睇吓，有位！ 即搬！

曬住太陽食早餐都幾寫意架！尤其拾爺個apple pie真係幾好食！我係一個唔鍾意食apple pie嘅人！喺香港唔食！噚日朝早被拾爺迫都只係食咗一、兩啖，晏晝嗰餐，掂都冇掂！但今次呢個，我真係食到唔想停，如果唔係個apple pie係拾爺叫嘅，我想吞哂成個添呀！我鍾意佢唔怕好甜，個pie真係做到外脆內軟！Pie嘅外層好脆口，切開入面有一嚿嚿(個size真係唔可以叫 粒……)嘅蘋果粒，我buy佢係粒而唔係蘋果蓉，通常果蓉都好甜嘅……拾爺見我不停食，都知我鍾意食，於是……我哋索性再叫一個！個waitress幫我 哋落單時，都忍唔住問我哋係咪好鍾意食，仲多謝我哋咁支持添呀！

喺cafe到食住pie影吓相，之後，就帶住萬般嘅不捨搭tram番酒店喇……番酒店，代表我哋嘅旅程要終結喇……

為咗慳一程車錢，我同拾爺一番到酒 店，將袋Lily of the Valley嘅種子放入喼(拾爺初初打算hand carry，但我覺得將佢放入喼，用衫卷埋會冇咁易俾人發現！)，去埋個洗手間就走喇。急急行去車站，一上車，第一時間用番頭先番嚟時買嘅車飛「嘟」一 「嘟」，只要半個鐘內到達總站，我哋就唔駛再俾錢喇！不過……架車好慢……最後都超過半個鐘……好彩因為係尾站，我哋又拖住行李，可以扮冇手再拍卡。其實 都真係有驚無險，有個旅遊大使咁啱同我哋同車，因為架車多人，我哋個喼又大，佢叫拾爺企樓梯位，將個喼放一、二邊，會冇咁阻住人。但其實後面有好多位，拾 爺根本可以走過去陪埋我之餘，又有位坐，但個女人就唔俾……都唔明佢諗乜架！因為佢好似啄住拾爺咁，我哋幾驚落車時，佢會要我哋「嘟」多次張卡呀！(因為 啱啱過咗幾分鐘……)

喺火車站買飛去機場，去到機場，先去搞退稅。搵咗一陣，先搵到間銀行，之前Lafayette個staff又叫我哋要check in前去搞退稅，我仲以為人哋要睇行李添，點知都唔駛嘅……拎到錢後，就去check in。

Check in後，拾爺就帶我坐埋一、二邊，再去洗吓噚晚買嘅車厘茄，作為我哋嘅lunch喇。食完呢個’lunch’，要入閘喇，真係要同歐洲講拜拜喇……