終於等到呢個旅程嘅重頭戲，向Giethoorn出發！
Giethoorn位於荷蘭西北方Overijssel省，De Wieden自然保護區內。De Wieden喺冰河時期位處兩個冰磧帶之間，所以地勢相較於周邊嚟得低，造成土壤貧瘠且泥炭沼澤遍佈，除咗蘆葦同薹屬植物之外，其他植物都唔易生長，唯一嘅資源就只有地底下嘅泥煤。當時Giethoorn嘅居民為了挖掘出更多的泥煤塊以外賣賺錢，而不斷開鑿土地，形成一道道狹窄的溝渠。因為當時嘅Giethoorn並冇道路(就算係而家，最古老嘅一段村落都只有單車徑。)，居民為咗令船隻能夠通過、運送物資，後來就將溝渠拓寬，形成今日運河湖泊交織嘅美景。所以，Giethoorn亦有北方威尼斯之稱。
其實Giethoorn又有「綠色威尼斯」之稱，因為水面映射嘅都是一幢幢綠色小屋嘅倒影。呢到啲屋嘅屋頂都係由蘆葦編成，蘆葦嘅耐用性強，可以用上至少40年以上，而且冬暖夏涼、防雨耐曬。以前係窮苦人家買唔起磚瓦而用嚟嘅替代 品，而家則只有有錢人先買得起！價格係磚瓦嘅幾十倍！呢到嘅地價亦因為Giethoorn嘅名氣而水漲船高，所以住喺到嘅人全部非富則貴。
嚟到荷蘭，基本上係一日雨一日晴嘅，但今日，都放晴！哈哈，可能係跟咗另一個定律 — 離開某個地方(今次係Leiden)時，一定晴！是日一大早就放晴！都唔知上天係眷顧我哋推行李時冇咁辛苦，定係有心玩我哋，唔俾我哋全日去景點時同陽光玩遊戲……
噚晚決定放棄跟車厘子大人嘅搭車路線去Giethoorn，改為用拾爺查番嚟嘅路線圖搭車。拾爺嘅資料有哂班次時間，就連邊個月台轉車都有講，好方便！
Check out後，去火車站唱錢買飛，今日勁多人，早知噚唱定啲散紙先啦……唱完錢，即買飛，再去追火車。我哋先搭十幾分鐘車去機場站，再喺嗰到轉車去 Steenwijk，呢程要搭成兩個幾鐘！轉車後，拾爺見到職員一問先知，呢班車會甩卡去唔同地方，而我哋咁啱上錯卡……好彩下個站有得轉，雖然嗰一刻架 車未開，但個職員都叫我哋唔駛急住呢個站轉，佢話下個站有成五分鐘時間俾我哋慢慢轉車。
到下個站時，個職員原來都要轉車，所以佢就帶我哋去啱嗰卡，仲一齊上埋車添。
兩個鐘嘅車程就係咁寫吓日記、睇吓相、瞓吓覺渡過。
落車後，仲有足夠時間俾我哋搵車站。確定70號巴士嘅開車時間就係資料顯示嘅12：46班次，我哋襯住有藍天白雲，就喺呢段等車嘅時間大影特影。
夠鐘，車到，上車，俾錢，每人€4。搭咗十五分鐘，到站。間酒店就喺車站隔離，非常方便！
(我同拾爺一大一小喼咁嚟架！係咪好誇張呢﹖袋one two free載有所有手信！古古力是也！)
經餐廳入口進入酒店，都未行到reception，就有個肥女人叫我哋放低行李，揀過位坐底，再揀coffee or tea作為我哋嘅welcome drink。
坐咗喺餐廳嘅室外露天位，喺陽光照耀下，嘆住杯tea同件homemade cake，好舒服！(不過代價會好大，我啲斑又出嚟同人say hi喇……)
嘆飽嘆夠，個女人仲未出番嚟……等緊佢帶我哋去farm house呀！我想快啲放低嘢，出去影相呀！難得今日咁好天！
終 於，一個鐘後，個女人車我哋去farm house喇。今次嘅住宿我係睇咗車厘子大人個blog所決定架！雖然間farm house唔係黐住酒店，但可以住喺一間過百年歷史嘅屋到，絕對係一個寶貴經歷！而且間厔嘅屋頂就係用蘆葦搭嘅，間屋又喺正條村嘅中心，真係名符其實嘅住 鄉村！
到達farm house，心情好興奮！我一直以為間屋係細細哋，我哋住哂！原來，我係住劏房……入屋後，只見所有擺設都好歐陸懷舊feel。
我哋被帶到第一間房，房間細細，但佈置得好骨緻！
肥 女人打開其中一道門俾我睇，內裏有張好細嘅床，佢話以前真係有人瞓入去架！另一道門就係浴室，不過好細……咁洗手間呢﹖原來係喺房出面……如果成間屋我哋 玩哂，我都唔介意個洗手間喺房出面，但而家仲有其他人喎……我唔想同人share洗手間用囉！肥女人話其他人應該唔會用呢個洗手間，因為佢哋間房有，咁點 解我哋間房冇嘅？！算！我哋間房對正條河，好view啲！
Settle down哂啲嘢之後，就亂行，村入面啲屋真係好靚，差唔多每家每戶都喺花園種咗唔同種類嘅花，加埋一條條嘅運河同藍天白雲，呢到真係靚到震！上天真係聽到我嘅訴求，俾咗個陽光下嘅Giethoorn我！
一直向前行，期間誤闖他人嘅私家路，好彩對方只係同我哋講該處為私人地方，冇喊打喊殺咋！
經過一大片草地，本來搵到位走入去影相架，點知拾爺行多幾步，就話對新鞋污糟咗，扁哂嘴咁走番出去清潔對鞋，唔肯再入番去影相……
拾爺本來想帶我去個湖到，但仲有好遠一段路先到，就到酒店嘅晚飯時間(package包咗！)我又因為親戚到訪，唔多舒服，所以番轉頭。
是晚晚餐冇得揀，先嚟籃麵包，配個蛋黃醬，麵包又係硬到刮損人上顎……
之後到雞湯，味道淡淡，唔係有雞肉喺入面同有waitress介紹都唔知係雞湯囉。
主菜係三文魚，好嚡……
配菜另上，有好多兜，有薯條、薯仔、西蘭花、紅蘿蔔同生菜沙律。全部都唔好食……
最後有雪糕做甜品。
食飽行番farm house，景色依然好靚！
拾爺又要動手消毒房間，之後，就出去消毒埋個洗手間。為免他人行過會污染咗拾爺嘅努力，我哋消毒完即用！
拾爺入去浴室沖涼，隔咗一陣，突然大叫一句：「大鑊！」問佢咩事，佢話冇熱水！我入埋去試水，真係冇……點會咁架？！今日一攞到房，我明明就沖咗個熱水涼！估唔到嚟到歐洲，我哋竟然要醃鹹蛋！
因為天氣太凍，我哋冇可能沖凍水，房間又冇電話，行出去又黑又凍，是晚，我同拾爺都冇洗頭，只係沖吓下身，大脾都唔敢掂水(太多神經線喇！)，就瞓覺喇……
P.S. 是晚serve我哋嘅waitress係中國人嚟架！佢係溫州人，移民咗嚟呢到好耐喇。所以，我哋係以普通話溝通架！佢仲讚拾爺嘅普通話講得準呀！(即係 我唔得囉……)佢話我哋個樣好後生添呀，哈哈！聽佢講，呢到嘅樓比以前貴咗成倍！佢因為好早就住喺到，所以當時買得比較平。佢間屋仲好鬼大間添架！
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
