2011 法比荷之旅 Day 10

七點半起身，喺酒店食完早餐，就搭火車出Rotterdam。今日試咗呢到嘅牛角包，發覺好好食！之前兩間都整得唔食……呢間整嘅，一啖咬落去，唔止feel到鬆軟，每一層都好分明添，讚！

去 到Rotterdam，有藍天呀！開心！例牌先去tourist information centre拎地圖，嗰度仲有幾部Mac機俾人用添呀！不過只限查詢旅遊資料！趁拾爺問緊人嘢時，我就search咗Miffy museum個地址。離開VVV(荷蘭嘅旅客中心標誌)，藍天冇咗……唔開心……

搭metro到Zuidplein站(€3.5euro per head)，個地鐵站好靚架！車廂都幾新淨！

再轉搭90號巴士。都係我大意，唔記查清楚巴士班次，結果走咗一班車，要等成粒鐘先有下一班……

見仲有時間，我哋上上面個商場去洗手間，呢間收好平，€0.2一個人，拾爺見咁平又去定先，因為一陣都要搭成四十分鐘車。喺商場行咗一陣，就番車站等車。

12：04巴士到站，上車買飛，每人€6。

45分鐘嘅車程，我雖然都想欣賞風景，但最終都係敵唔過睡魔，瞓咗一陣。差唔多到Kinderdijk時，個天又開始落雨……十萬個失落……

落車先check吓個schedule，再去睇吓搭船要幾多錢同埋個time schedule，原來搭船貴好多架，要成€14！

向小孩提防出發，門口有VVV，入去先發現原來只係商店一間，失望！

買飛入場，每人€6，天色仍然陰沉，就算對住十幾架風車都冇興奮感覺……之前上網，有人話八月嘅星期六嚟呢度，會睇到十幾架風車一齊轉嘅情景，呃人嘅！搞到我揀咗今日嚟，聽日先去古堡(去古堡嘅巴士，星期日疏好多架嘛)……

行行行，呢度都幾大架！又多草，我估陽光下嘅Kinderdijk一定好靚啫！可惜，我哋一路只見陰天，行到咁上下仲落埋雨添……

成個Kinderdijk只有一架風車開放俾人睇，但要額外收費，又係€6，我同拾爺梗係唔入啦！天氣又唔係好，如果唔係搭咗咁多錢車入嚟，我連呢個提防都唔入添呀！落大雨，睇乜都冇mood！

同拾爺商量好，向前行到兩點四就番轉頭離開搭巴士走。點知……就喺我哋轉身一刻，拾爺突然大叫一聲「呀！」仲未知發生咩事嘅我，第一時間係怪佢突然大嗌。原 來，拾爺隻右手尾指被蜜蜂針緊！係！係針緊，唔係針咗！佢拎起隻手睇吓發生咩事時，隻蜜蜂仲啄住佢死命唔放！我嘗試撥走佢，用手用衫都唔得，加上拾爺驚我 太大動作會做成反效果，我哋搞咗一陣，隻該死嘅蜜蜂先肯起針走人。拾爺隻手指即時又紅又腫，嚇到我即時眼紅紅，好驚佢會中毒身亡！我哋當時身處之地又遠離 人煙，好彩拾爺未有中毒跡象，如果唔係我真係驚我抬唔郁佢！

我哋行去最近嘅風車收費站求救，呢十五分鐘嘅路程，好似過咗一個世紀咁，我一路行就一路驚拾爺會出事。嗰兩個職員叫拾爺吮番啲嘢出嚟，但我哋根本就唔識……於是，佢叫我哋出番souvenir shop問人拎vinegar，話滴少少啲嘢會出嚟喎。

如是者，我哋又向前行，行到售票處隔離間小賣部求救，個女仔好無情咁話：I have nth for ya.衰得佢呀！我哋唯有過隔離售票處再問，嗰兩個人話隻蜜蜂應該冇毒，仲話好小事，俾番膠布我哋就算，個男人聽到我想捉拾爺去醫院，即刻話冇需要。

對於呢個咁唔helpful嘅遊客區，真係毫無好感可言！

同拾爺再向前行，嚟到車站附近間小賣部。嗰兩個職員都係俾唔到啲咩我哋，又係叫拾爺自己吮……有個女仔仲話佢自己都成日被針，兩個鐘後就會冇事喎。拾爺問佢哋借洗手間後，佢嘗試吮，但唔成功……佢叫我趁機去洗手間，因為我忍咗好耐，呢到去個廁所要成€0.5，搶錢咁搶呀！

出去搭巴士先發現之前睇錯咗時間，仲要喪等多幾個字……拾爺番入souvenir shop問嘢時，個staff好好，寫咗間醫院地址俾佢。

搭巴士出番去Zuidplein站時，拾爺隻手指冇咁紅喇，但仍然好腫，佢話仲係好刺痛……

呢程車我又瞓著咗……到站後，匆匆改搭Metro出Rotterdam，去VVV求助，但又一次得到不用擔心嘅答案，又係話呢度被蜜蜂針好小事。既然咁多當地人講到冇問題，我哋就信佢哋啦！

同 拾爺拎住Rotterdam張地圖向Cube Houses同Eramus Bridge出發。途經一間雜貨店，見到之前喺比利時買過嘅古古力，呢度竟然仲平啲，於是就買多少少做手信，埋單前，見到有種嘢食幾吸引，係兩片乾蕃茄夾 住芝士，價錢為€29.95per100gram。買咗3塊，盛惠€28，連埋其他手信，埋單 €16.45。

經過麥記，又去咗個免費廁所，見佢有wifi，於是買咗杯熱情果milkshake(€1.8)，坐咗一陣，繼續向Cube Houses前進。 

我哋冇入Cube Houses，因為去到已經閂門，不過有得都未必會入，太貴喇！嚟到呢個位，竟然有藍天同陽光！荷蘭呢個地方真奇怪，早晚唔落雨，剩係揀旅客最活躍嘅時候先嚟落……

睇埋條bridge，就走人喇。行經星光大道，發現咗佢﹕

離開Rotterdam，去咗超市買沙律、生果同埋yoghurt，仲有包蛋黃醬味嘅Lay’s薯片，共€13.61，佢收我€13.6。呢堆嘢加埋啲Wittamer同埋Dumon古古力，就係我哋嘅晚餐喇！今日兩餐貧！

(兜沙律好大兜，食完都飽哂喇！)

(呢隻係西班牙橙yoghurt，好好味架！)

(Dumon嘅古古力！唔夠Wittamer好食……)

(幫所有古古力嚟張大合照先！)

P.S. 夜晚瞓緊覺時，拾爺突然揭起我張被話自己少咗張，半夢半醒嘅我竟然可以清醒地同佢講佢自己「摘」住咗佢口中少咗嘅嗰張被。