噚晚不斷發惡夢，半夜起身發覺自己瞓黎頸……
酒店早餐原來好豐富架！由於我哋同4星嗰邊share同一間restaurant，所以可以食到一樣嘅buffet breakfast呀！呢間酒店provide嘅breakfast仲要係最好嘅一間呢！比之前嘅更好！仲以為嚟到荷蘭要捱餓，原來唔係呀！
是日天氣依然陰陰沉沉，食完早餐，就向Alkmaar出發，不過架火車遲咗5分鐘先到站。單程每人€10.3，好貴！
一個鐘頭嘅車程，行到一半我已經昏昏欲睡。可惜同卡有兩個女人不停地大聲講大聲笑，就嚟瞓着都會俾佢哋啲笑聲嚇醒……
到達Alkmaar Central Station後，又去攞地圖，然後向cheese market出發。沿途天陰陰，之後仲開始落雨，雖然出發前已經知道荷蘭係多雨之地，但喺比利時望慣咗藍天，嚟到呢樹又要對住個灰濛濛嘅天空，心情難免唔多盞……
終於行到拍賣場地，好多人！多人都唔係大問題，多高人先濕滯！同拾爺左搵右搵，終於搵到個冇高人遮擋嘅位睇拍賣，過咗一陣，襯其他人睇完離開，我就盡量向前攝，皇天不負有心人，終於俾我攝到個有利位置，可以慢慢影餐飽！
呢個廣場曾經係荷蘭人拍賣芝士嘅場地，但而家已經唔再做拍賣lu……逢星期五嘅cheese market其實只係做show俾遊客睇。影夠影飽，就同拾爺行吓外圍嘅攤檔仔，行行吓見到有處可以企上樓梯上睇，於是又上去搵有利位置，咁啱個拍賣開始用英文做介紹，正！
睇完呢場英語show後，我哋又再喺附近行逛。咁啱見到有遊客捉住個 cheese carrier同荷蘭村姑look嘅女仔影相，我當然唔執輸又影埋一份啦！仲叫拾爺都去影添呀！
之後向前行，同一個cheese carrier拎住舊重12kg嘅芝士俾人捧住同佢合照。是日瞓嚟頸嘅我捧住舊芝士時，條頸後面某個筋位被扯到赤赤痛呢！但死唔輸蝕嘅我，痛都要影！哈哈！
我影完後，第一時間叫拾爺影，點知佢話﹕唔影……但我講多兩句話難得，佢又影喇。可惜……到佢想影時，個cheese carrier已經俾人圍住……等等等，等到輪到拾爺時，個cheese carrier又話要番去做嘢唔肯影喇……
好彩，隔咗一陣，我又見佢喺對面馬路同人合照。於是，就同拾爺快步行去搵佢影相，亦終於影到喇。拾爺捧完舊芝士後，個cheese carrier叫佢聞吓隻手，拾爺一聞，就話頂唔順陣味。係咩？我ok喎！
用€3(per head)參觀芝士博物館，冇乜嘢睇……當拾爺仲仔細端詳館內對芝士描述嘅文章時，我一早已經開始百無聊賴。
離 開博物館，個藍天出咗嚟喇！開心！走出市集搵食，想食嘅Harring bread一早售罄……喺唔知食乜好嘅情況之下，我哋先買咗杯2球雪球(creamy macadamia同choco mint，€2.95)，再買咗盒薯條(€2.7)食。之後，去咗買花(€2)！難得天氣咁好，當然要買嚟影吓相啦！
拎住支花，跟拾爺展開長征！But之前要先去一去洗手間，其實我早餐後都冇飲過嘢，但唔知點解又急……頭先喺cheese museum去咗兩次架喇，係咪越唔想去，就會搞到自己越要去呢？Anyway，我哋非常好彩地搵到一間廁所唔收錢嘅麥記。
拾爺心中有想去嘅地方，但又唔話我知去邊，跟住佢不斷行。行入景點前，先要離開市中心，途經運河，呢到都幾靚架！有對夫婦仲喺自己隻遊艇上曬太陽添呀，幾寫意呀！
逐漸遠離市中心，行過一段沿途為住宅嘅路，嗰到好寧靜，雖然啲屋全部對住馬路，但條路冇乜車行，四圍又多草又多樹，睇得出成個地區嘅規劃做得唔錯架！好鍾意呢到呀！
跟 住拾爺行去嗰個暫時仲係不知名嘅景點時，喺中途遇到兩婆孫，老婆婆同我哋say hi，我見佢哋喺堆泥到挖吓挖吓咁，問佢哋做緊乜，佢話捉緊嘢用嚟吊魚用，要教個孫去愛護大自然喎！聽到真係好羨慕！我哋香港人，有幾多可以喺屋企附近捉 蟲，再行去釣魚﹖講緊嘅係，去到河邊釣，唔係去啲被pollute到不堪嘅碼頭喎！
繼續向前行多三、四個字到，終於到達第一個景點，原來又係睇風車！呢處有四架風車，每架都有風車人住喺入面架！雖然冇得爬上去，但呢處環境清幽，有水有草，附近又有人放羊，感覺好舒服！可惜嘅係，個藍天喺遠處，又冇陽光，影出嚟嘅相暗咗少少……
之後拾爺又帶我去另一景點，呢個時候我又想去洗手間喇。可惜我哋身處之地實在非常大自然，肯俾錢都冇得去……
行多幾個字，到咗Oudrop，見有間舖有嘢食賣，於是入去買咗條Harring(€2)食。原來鯡魚係生食架！之前以為係煮熟咗嘅添……真係失禮哂呀！拾爺始終接受唔到食生嘢，只係淺嚐一口，就被迫放棄……而我呢﹖除咗可以大飽口褔之外，仲借到廁所用添呀，爽呀！
講番條魚先，佢切走咗個魚頭同魚尾，再喺中間片開兩層，面頭放上洋蔥，側邊仲有酸到癲嘅酸瓜伴住，將酸瓜放入魚中一齊食，魚本身嘅味道中和番個酸瓜嘅酸，酸瓜又僻去魚嘅生味(唔係腥，因為我唔覺得佢腥，哈哈！But我對腥嘅接受能力都ok架！)，好味到暈呀！
食飽飽繼續行，但拾爺搵極都搵唔到個地方……之後佢問咗個伯伯，個伯伯竟然答佢成個小鎮都係……原來拾爺要搵嘅係polder (According to Wikipedia: A polder is a low-lying tract of land enclosed by embankments (barriers) known as dikes, that forms an artificial hydrological entity, meaning it has no connection with outside water other than through manually-operated devices.)，又係unesco嘅世界遺產所列之一。
搭 六點三嘅火車番 Leiden食晚飯，喺Leiden嘅市中心搵餐廳。以為拾爺唔想又食意菜，放棄咗間平價餐廳，入咗一間冇pasta食嘅餐廳，結果局食一個main dish同一個dinner set(分別為€12.5同17.5)，拾爺嫌呢餐太貴……我其實都唔想食咁貴架，佢之前又講到要感受吓當地人生活，又話歐洲係咁嘅，我以為佢唔鍾意又番 酒店食頹嘢，點知佢原來又ok喎！
呢餐係就係貴咗啲，但樂觀啲諗，今餐食咗花生醬烤豬同芝士醬嘅雞，都幾特別呀！
我個set嘅前菜 — Salade met tomaat en mozzerella份量都唔少架！不過啲mozzerella cheese就麻麻哋……
Fillet of pork with peanut sauce and fries都幾野味架！豬肉辣辣哋，花生醬就嫌「傑」咗啲……
芝士醬嘅雞就又係嚡到死……不過佢個配菜有豆角同荷蘭豆，係煮咗嘅菜呀！
最後個甜品我要咗 waffle，其實食完主菜後都好飽喇，歐洲嘅嘢食係貴，但份量真係好足，我哋食薯條都食飽喇！好彩個 waffle同比利時嘅唔同，上下一塊餅，中間勁多cream之餘，仲有三球vanilla ice cream，我哋片走大部份cream，主力食雪糕。
餐飯食咗一個鐘，之後行番酒店。
是晚我發現我個肚腩已經不知不覺地漲到XL size。My god！番到香港又要減肥喇！
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
