今日要去兩個city，所以要早少少起身，七點九就起身喇！
喺 酒店食早餐時，隔離枱坐咗一對香港夫妻(﹖)，好耐冇同其他人用廣東話交談喇！佢哋原來之前去咗Germany，會stay喺Brussels兩日，再過 Amsterdam，之後再去英國。嘩！都玩幾多地方！原來大家都係幫襯歐陸呢。佢哋連Amsterdam嘅酒店都係thru歐陸book架！不過，唔近 市中心都要成千二蚊一晚……佢哋都覺得拾爺搵到間八十幾歐羅一晚嘅酒店好叻叻！
大家傾開偈，佢哋話英國有騷亂，都驚驚哋！原來佢哋去睇球賽開鑼呀！講開治安問題，我就同佢哋分享噚日嘅火車事件，佢哋話覺得呢到治安唔及Germany。
九點九出發！(Well, 食早餐食耐咗添……因為……酒店lobby有WiFi，忍唔住上facebook上耐咗……)十點三去到車站，先買兩張過兩日去Leiden嘅火車飛(€71.9)，之後再買飛去Ghent(€15)。
十點半上車，上咗車先知，呢架係慢車……(係一對老夫婦話我哋知架！)慢車，即係停細站！要成個鐘先去到Ghent……如果快車嘅話，第一個站就已經係，五個字就到！唉……唯有安慰自己當睇多啲風景啦！下次再上火車，一定要問清楚係快車定慢車至得！
十 一點四到達Gent-St. Pieters站，離開火車站，先去搭tram。去到架machine到，咁啱有個當地人教緊其他遊客買飛，佢見我哋又要買，就幫埋我哋。喺 machine買，只需€1.2一張，如果上咗車先買，要成€2一張架！有機又有人幫，我哋就買埋回程嗰張喇！
問到人喺邊到上車後，我哋就行去，點知……行行吓，見到有車，於是就改用跑嘅！追到索哂氣後，上到車，一班婆婆見到我哋跑到索哂氣都忍唔住笑我哋……不過，佢哋好nice，知道我哋唔識點用張飛，就教我哋點樣打卡按掣。
搭咗十分鐘後，到達市中心 — Korenmarkt。
先入Sint-Niklaaskerk參觀，唔駛錢！
離開Sint-Niklaaskerk，慢慢行去運河。今日天氣好好，有藍天白雲，加上運河景色，真係令人心情愉快！拾爺話呢到嘅運河夜景好出名架！可惜……我哋唔會睇到喇……呢到成九點幾十點先入夜，我哋冇理由等到咁夜先再搭火車番Brussels架嘛。
影完一輪相後，我哋就揀咗間喺運河邊嘅餐廳坐低食lunch。當時已經兩點鬆啲喇，食完都成三點，我哋仲打算坐吓bootrip，所以決定放棄去Bruggs。
坐低，要咗個lunch set同一個Waterzooi(共€27)，拾爺做咗資料搜集，知道Waterzooi係Ghent嘅名菜，不過，以前嘅人就用魚去整，而家就改為雞lu……
Lunch set有湯亦有steak，其實……聽到steak，我都有啲驚……因為之前喺Paris食到嘅，都係挑戰我牙骹嘅水準……
Waiter先上lunch set個tomato soup，外國人嘅口味就係咁重，碗湯好鹹……
Steak，如我所料，又一挑戰我牙骹嘅水準，肉汁全部流失哂……而且，呢到嘅份量細好多……
至於拾爺滿心期待嘅Waterzooi就令我倆大失所望，啲雞肉「嚡」到喊！究竟啲外國人係咪天生鍾意食「嚡」嘢架﹖！樣樣都「嚡烚烚」嘅！
食完飯，就去買飛，搭船喇！Boot trip歷時四十分鐘，負責開船嘅就係頭先賣飛俾我哋嘅人，佢亦係負責講解嘅。佢用幾種語言去介紹沿途嘅地方(真利害！)，要好留心佢幾時講番英文，不過……有時聽聽吓，我會魂遊……好彩有拾爺喺到，呢個英文人會翻譯番俾我聽，嘻！
呢到都幾多遊客，boot trip每廿分鐘一班，全都full哂！仲要唔止一間船公司喎！
落船後，我哋就向住頭先坐船時已經見到嘅Het Gravensteen (castle of the counts)進發。我哋又係冇入去參觀，只係影吓相啫。
之後行番去Korenmarkt，朝早嚟時，有兩檔賣緊一啲好得意嘅食物嘅攤檔，我問其中一個檔主伯 伯賣乜，佢答我﹕This is nose of Ghent.即係冇答過我嘢……咁即係糖﹖生果﹖佢一時又話糖，一時又話fruit……而家得番另一檔喺到(伯伯番咗屋企lu)，我又問另一個人，佢又係 咁答我……算！唔買喇！
搭番tram出火車站，拾爺去到電車車站時，問問企喺到嘅一個大男孩車站方向是否正確，個靚仔答完之後，向我單眼呀~~嘩！我即刻話俾拾爺知，有個靚仔電我！哈哈，要增加吓佢個危機感先！(拾爺睬我都傻，明知人哋只係禮貌上單吓眼！)
是日晚餐﹕車厘茄 + 薯片 + 噚日得到嘅贈品 (真係唔知叫乜，但又幾好食喎！)
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
