一早同校長請一個鐘頭假，飛的去法國醫院接媽媽出院。醫院又話要十二點前出院，但會計部卻遲遲唔出單，我一去到已經要求要單，但姑娘話未有，叫我等，一等等成半個鐘，我再去催，有姑娘仲串嘴話未夠十二點，我火火哋，想鬧佢當時已經差唔多十二點，同埋係佢哋要求人哋十二點出院，而唔係十二點找數，好彩有其他姑娘喺我正想出聲之際表現友善，話即刻幫我跟進，如果唔係，我應該會大鬧法國醫院！我唔係想搵人發洩，而係當時我自問好有禮貌咁問佢哋有單未，我唔明點解要被人串，而家我係客，呢到係私家醫院，又唔係公立醫院受政府津貼，我點解要貼錢受閒氣﹖！
等多陣，終於收到張單，即刻落去俾錢，再上樓等媽媽執好嘢，換埋鞋，就帶媽媽出去俾單、交鎖匙，拎好藥後，俾埋姑娘剪牌就走得。出去前，我叫媽媽除番人家件外套出嚟，媽媽就話件外套係哥哥番屋企拎俾佢嘅，我奇怪點解件外套同隔離床嘅一樣，仲有醫院名，但竟然係哥哥於家中拎過嚟，點知……媽媽一行出去姑娘做嘢處，人家就叫佢除番件外套出嚟，話係醫院之物……真係瘀爆！
離開醫院前，姑娘再三叮囑媽媽唔好拎重嘢，於是，我一邊膊頭孭起媽媽個背囊，再手執自己個袋，另一邊就手扶媽媽，再拎袋藥護送佢到樓下大堂。然後，發覺一雙手唔夠用，放好袋藥，再拎把遮出嚟，將手袋放上膊，一手扶住媽媽，一手撐傘咁同佢行出去坐的士番娘家。繼早前幫拾爺著褲、著鞋後，再次變身成為妹仔！
送媽媽番娘家後，再提佢食止痛藥，make sure佢分清啲眼藥水同眼膏幾時滴同幾時揸後，就趁佢滴咗眼藥水休息緊時，詢問爸爸情況。爸爸話醫生叫佢做化療，做咗，仲有一年可以玩吓，唔做，就只得七、八個月命……爸爸下星期一四點覆診，我已放學，可以去陪佢，到時再問清楚爸爸而家個情況。爸爸再三吩咐我唔好同媽媽講，但是晚，佢whatsapp我哋話媽媽已經知道咗……
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
