同家人去咗城軒飲茶,小王子今日好活潑,表情多多,時而手指指,時而企起身大笑,時而小鳥依媽,呢個小子開始坐唔定啦!哥哥同嫂嫂話佢而家聽到笑嘻嘻,只會用手指篤臉,要講「開心」,佢先會笑。不過,佢聽到舉手,仍然會即刻做,good呀!但問佢邊個係爸爸,邊個係媽媽,仍然係一嚿飯咁一動不動……小王子恐怕冇書讀了……
飲完茶,喺CityU行咗陣,小王子唔俾人拖,要自己行,點知又行得急,結果一跌,成個趴咗喺地下……小子當然即時喊啦,我哋要佢自己爬起身後,哥哥先抱起佢呵番,點知行咗兩步,哥哥同嫂嫂又突然放佢落地,原來小王子呢排學咗佢表姐仔,跌親後就怪塊地,要落地打地下一吓洩憤,哈哈,拾爺覺得佢好搞笑。小王子打完地下後,我就幫佢抹抹手,點知個衰豬嫌打一下唔夠,仲想再打……我唯有教佢用腳大力踩地下,小子當然照做啦。呢個小子都好記仇呀!
離開CityU,一家人去咗Toy “R " Us到行,小王子見到咁多玩具,樣樣都要摸,不過,最吸引佢嘅唔係玩具,係棟喺到嘅價錢牌……佢見到一定要去chok支牌,都唔知點解……
家人行完Toy “R " Us就走喇,我同拾爺就繼續喺又一城行吓,仲去咗Izzue每人買咗一件衫,之後就番屋企喇。本來今日有agent打嚟叫我哋去睇樓,但覆佢電話,佢又唔聽,結果,我哋就直接番咗屋企喇。回家前,去Taste行一轉,又買咗5盒減價嘅車厘茄番歸,旁人見到我哋架手推車咁多車厘茄都嚇一嚇呢!
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================