日本菜一向好受香港人歡迎，無論壽司、刺身、放題、串燒、拉麵、鐵板燒、日式西餐廳，甚至高檔嘅懷石料理，若非質素有問題，依樣大有捧場客，皆因大家都認為日本菜製作向來認真。其實，睇師傅做菜都喺一種享受，尤其握壽司，切刺身，做鐵板燒，觀能享受特別多，個人覺得壽司、刺身做法講求柔和，鐵板燒成日叮叮噹噹，有股剛勁。今午跟朋友嚟到由濠江轉戰到香江嘅「江戶日本理料」試菜，一試多款懷石料理及特色菜，可謂剛柔並重。
作為澳門嘅過江龍，江戶原來已有廿多年歷史，並有多間分店，而香港店位處銅鑼灣J Plus酒店之內，有自己專用門口，晌對街都輕易望到。
餐廳佔地二樓全層，環境陳設沒有太過刻意，但仍有一股和風氣息，大堂設有壽司、刺身吧位，喺欣賞師傅心刀功嘅好地方；此外，入門口無遠有個廂房，可坐近12人，適合自成一角，唔怕被人騷擾嘅好選擇；餐廳尾有鐵板燒枱，又喺另一處欣賞師傅手藝之地，至於大廳其他位置，巧妙架設活動屏風，令人感覺更安舒。
食物選擇真多，可以講咩類型日菜都有，所以，喜歡唔同類型日菜嘅朋友都可以走嚟一齊。再者，日菜用料一向有質素，又應季節變化，選用時令食材，所以，吸引自有道理。
日本吟釀、清酒故然少不了，但由法蘭西入口嘅Alain Milliat鮮果汁就更啱我，雖然每樽唔平，但值得一試。
![bowl]()
White Peach $75
友人話白桃果汁滿有桃香，味道純鮮天然，飲落清新蜜甜。
![bowl]()
Apricot $65
小弟揀嘅杏脯汁，估唔到杏脯味咁濃郁，加點冰，入口涼快順溜。
![bowl]()
Summer Pear $65
友人嘅評價喺梨香細膩，仲帶有綿綿果蓉，清甜不造作。
![bowl]()
豆腐牛油果沙律配自家制醬
豆腐配牛油果，喺好少見嘅組合，賣相幾清新。冰凍嫩滑嘅豆腐，跟軟腍熟透嘅牛油果，配以自家制芝麻醬，鋪上木魚絲及紫菜，夾埋出嚟個效果又唔錯喎，香濃嘅芝麻香令豆腐及牛油果味道唔單調，木魚絲及紫菜又多添幾分口感。
![bowl]()
脆薯絲沙律配芝麻醬
以田園沙律為基礎，加入大量脆炸薯絲，齋食薯絲卜卜脆，入口又唔油膩；將所有材料混和，爽脆嘅沙律菜，夾雜埋薯絲，質感豐富，芝麻醬嘅香，令整個沙律更富香氣。
![bowl]()
宮崎牛刺身
牛刺身都喺第一次食，所以，特別慢慢細嚐。單講賣相，已感覺賞心悅目，宮崎和牛切得既薄又均一，色澤紅潤，油花又夠平均，睇見都有點興奮，配以薑蓉、山葵蓉及蒜蓉，鍾意嘅又可以加點洋蔥絲或芽蔥。不過，試咗第一片「有料」之後，覺得沾丁點醬油齋食就最能感受牛刺身嘅原味及油花嘅潤澤，滑溜無渣。
![bowl]()
木魚絲天婦羅蝦忌廉芝士卷
天婦羅蝦、忌廉芝士以外，仲有蟹籽，以反卷形式製作，再蘸上木魚絲，咬落飯粒黏糯，裡面炸蝦既香脆又爽口，柔滑濃郁嘅忌廉芝士令整件壽司卷提味不少，味道獨特。
![bowl]()
蟹肉釜飯
再嚟一道日式煲仔飯「釜飯」，上枱時滾熱辣，據介紹，個飯嘅賣點喺用咗「白雪皇后米」，喺出產自山形縣一種高質白米，質感煙韌有飯香。此外，採用北海道松葉蟹，亦喺另一亮點，配搭得宜，自不然味道鮮香，食到尾，飯粒都仲喺暖笠笠！
![bowl]()
福岡縣博多辣明太子炒飯
加入大量帶微辣嘅明太子嚟做炒飯，非常之惹味有微微脆卜卜嘅口感，之不過，稍嫌飯粒炒得唔夠分明乾爽。
![bowl]()
泥醉海老（鐵板）
嚟到鐵板燒，唔單只有得食，仲有得睇，由一位女師傅即場由浸醃、烤煎、上碟，成個過程都好有睇頭，去走蝦殼，起雙飛，留鳳尾，兼挑走蝦腸，睇住師傅熟練嘅手藝，值得鼓掌讚賞。
活蝦經陳年花雕浸醃，食起嚟有些微酒香，隱隱若若，故此，唔會蓋過啲蝦本身嘅鮮味；而最有心思喺，將蝦腳軋開再以半煎炸處理，成為少少脆口小食，再者，賣相做得細緻，實在無法唔再加點分。
以上都喺可以隨時晌餐牌上有供應嘅菜式，跟住，想分享幾款季節限定菜式，同樣，都喺做得有心思。
![bowl]()
勢子蟹
喺一道精緻嘅懷石料理菜式，勢子蟹就即喺雌性松葉蟹，拆肉、拆膏、起蟹籽後放回蟹殼內，加上以土佐醋做嘅啫喱提味，的確幾花功夫。啫喱晶瑩剔透帶點醋酸，配蟹肉確然味美，而拆出嚟嘅蟹棒一梳梳，食得貴氣。
![bowl]()
皮剝魚薄切配肝醬油
晶瑩薄透嘅皮剝魚刺身，盡顯師傅嘅刀功，加上漂亮鮮明嘅擺盤，立體夠美感。薄薄嘅皮剝魚，唧啲青檸汁，再沾點以皮剝魚魚肝所做嘅醬油，甘甜鮮味，肉質清甜。
![bowl]()
山瑞配玉子豆腐
清湯主要以山瑞燉製，山瑞當然唔會出現晌個碗中，碗內只有玉子豆腐、年糕、本菇及點點蔥絲。湯底清澈，味道平和，豆腐滑溜，年糕煙韌，一切夾起嚟都讓人食後有份平靜祥和嘅心境。
![bowl]()
龍蝦配黑松露、白菌、青露筍、細葉芹、切粒野菜
龍蝦以鐵板燒嚟做菜，令龍蝦香氣撲鼻，最窩心喺起晒肉，一啖一小件方便食用。淋上自家調忌廉白汁，灑上黑松露粒，蝦肉鮮美彈牙，味道芳香，做得出色。而青露筍、切粒野菜……等等，增添賣相色彩，以及多添一份清爽。
最後一口氣送嚟4款甜品，實在喜出望外，滿足而回！
![bowl]()
北海道牛奶布甸
有別我哋常食到一般西式嘅布甸咁挺身，依道牛奶布甸質感較綿滑，極富奶香，店員介紹喺用咗日本鮮牛奶嚟做，怪不得有如此質素，而食到尾見不少雲呢拿籽沉底，就知用料無欺場。
![bowl]()
抹茶雪糕配夾餅、白玉丸子配紅豆夾餅
前者抹茶雪糕嘅茶味實在濃郁，又帶回甘，咪以為底下喺塊「求求其其」嘅夾餅，事後再睇其真身，菊花造型，又見證做日菜嘅一絲不苟。而後者白玉丸子，小巧的骰，入口軟綿煙韌，配以清甜紅豆蓉，再以桃型夾餅襯托，滿有被祝福嘅感覺。
![bowl]()
自家製蕨餅
蕨餅確實好少接觸，一嚿一嚿軟軟腍腍嘅蕨餅，包裹薄薄一層黃豆粉，充滿豆香，感覺就好似我哋嘅糯米糍。
綜合整餐飯嘅觀感，感受到用料講究，製作有心思，而且，盛菜嘅器皿亦都有思量過，各有特色，甚少用嚟用去都喺一式一樣。雖然價位自是不菲，但有時想享受一下高質素嘅食物，付點代價都喺值得。聖誕、新年，可會考慮吓食日菜嚟慶祝嗎？
個人評分
味道：9/10
環境：8/10
服務：9/10
抵食：8/10
平均每人消費：HK$0（試食活動）
餐廳資料：
江戶日本料理 Edo Japanese Restaurant
銅鑼灣伊榮街1-5號 J Plus Hotel by Yoo 1樓
2643 3033
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
9
江戶日本料理 Edo Japanese Restaurant：江柔並重
江戶日本料理 Edo Japanese Restaurant (銅鑼灣店)
割烹 櫓杏 Kappo Ro Ann
鮨千寿(尖沙咀店)
木戶 KIDO
Shibui 洋食屋
風雲丸
源峰 Mizutani
鶴亀