爸爸係荃灣開工，佢話大霸街好多食店，叫我出去同佢一齊食飯喎。
咁我就梗係會事先上下網，睇下有咩好食先。小紅館係新開既，食台灣野，我都想試下。
馬來咖哩既聚樂居亦都好大眾化
而美倫餐廳其實係茶記黎，主打住家風味小菜。
我預咗少少時間去一田濕平，原來出咗門口已經係大霸街啦。
因為唔熟路，所以我專登係對面馬路行下，遙望下D食店，先決定食邊間。老實講，荃灣廣場呢邊既大霸街，好多停車場出入口，可能剛倒完垃圾，地下都幾污穢，幾恐怖下。
行到一半，見到有間泰國人海南雞飯，我想試下，就冇再睇其他食店啦，即刻過馬路入去。
二話不説，我同爸爸都係點海南雞飯。雖然呢度仲有好多泰國菜可以點，但一場黎到都係食招牌野啦。
$55個餐，一小碟無骨海南雞、油飯、冬瓜湯、泰式酸辣汁。湯就好夠熱，都幾咸同重味精，雞既肉質麻麻，冇乜味道。全靠點個汁先好食返少少，但我都有食晒D野。
食套餐，可加$10點飲品，泰式既什麼什麼冰都可以點，爸爸就要咗杯椰汁冰。杯野係正常既，甜咗少少咁啦。
朋友問我呢間野掂唔掂? 老實講，巷仔見既海南雞飯正過佢。講到D雞，其實屋企樓下嚐味D雞仲好食D，人地無骨海南雞飯都只係$45之麻，咁我邊駛坐車出去食呢?所以，呢間野我唔會再幫襯架啦。
============================================
感謝 May姨Blog 提供以上資料
May姨Blog的網誌: http://maylibibi.blogspot.hk/
============================================
