韓國之旅即將行起，我呢兩個禮拜努力煲哂「來自星星的你」！其實一直想睇呢套劇，但又唔想花時間追字幕咁睇，咁啱上個禮拜發燒，唔番得學，但手上嘅嘢又改哂，備課材料又喺學校，喺屋企瞓到悶時，就決定睇吓套劇，為嘅係唔想自己之後睇完，發覺好鍾意，然後後悔喺呢個trip冇去某啲景點。
我一向對韓劇印象麻麻，最怕嗰啲全套劇嘅人冇一個唔係生cancer，集集都喊到就連眼都要生cancer嘅劇情。咁耐以嚟，我只睇過「宮」，但老實講，我都嫌「宮」嘅劇情拖得太慢，開始時都幾悶……但係……「星星」頭5集俾我嘅感覺已經好唔同，劇集節奏明快，而且人物角色生動，尤其女主角惹笑得來又帶點傻氣，雖未至於有讓我有一口氣看哂咁多集嘅衝動，但仍能令我堅持追落去。
劇集去到中段時，我開始沉迷，每睇完一集，都想要再追。未睇呢套劇前，我唔明點解啲人咁鍾意金秀賢，但睇完後，我自己都不能自拔地愛上佢！一個討好嘅角色，真係會令觀眾連個演員都鍾意埋，對上一個令我有呢個感覺嘅係吳尊。我想都敏俊嘅吸引，唔止係因為佢會默默咁保護女主角，仲因為佢學識淵博，佢嘅知性美，最吸引我。最初那個cool爆嘅都敏俊，因為女主角而流露嘅孩子氣，又或時而散發嘅醋意，亦非常可愛。
不過，套劇去到最後兩、三集，劇情有啲拖拉，女主角同男主角又成日喊苦喊忽咁，令我覺得套劇有少少爛尾。而且，我唔明點解男主角入咗蟲洞都可以換到衫…… 因為套劇有交代過佢最初只可以停留幾秒，但每次都唔同衫，去到同女主角kiss嗰場，佢仲有件大褸俾到女主角，成件事真係好玄！算啦，人家係外星人，本身 已經好玄，男主角點解會嚟咗地球，又只得佢一個嚟，佢個星球嘅人互相冇特別關係，啲外星BB點出世，全部我都想知，但套劇都冇講啦，我都無謂研究佢點換衫呢點喇。
「來自星星的你」嘅成功，除咗係因為男主角對女主角嘅的愛護 (真係又愛又保護呢！)同深情，令女觀眾不其然陶醉其中，我個人覺得此劇豐富嘅劇情亦係成功嘅要素之一。劇集講嘅唔止係男女主角置身現代嘅愛情故事，仲有佢哋四百年前嘅相遇，其實最初吸引我嘅，反而係佢哋四百年前嘅相遇，編劇並無一次過交代兩人嘅故事，而係透過都敏俊間中嘅回憶去交待，呢個敍述方法，反倒令我有追看嘅意欲。除咗呢條線之外，女主角身陷險境呢條線又係好好睇，單純睇男女主角談情，點都唔及殺人、追殺呢啲戲碼緊張刺激。
最後，我發覺自己而家好鍾意金秀賢，我決定要睇番「擁抱太陽的月亮」同埋「Dream High」，哈哈哈！喺youtube睇埋「星星」嘅製作特輯，更加鍾意金秀賢，因為我睇到佢嘅專業同humble。韓國男演員，繼曹承佑之後，又多一個俾我鍾意。
P.S. 全智賢喺戲入面好多衫、頭飾等等被人搶購，其實大部份都唔係我杯茶，反而冰湖嗰場戲著嘅軍褸我覺得好靚，尤其褸上嘅白色毛毛圍成一圈後！不過，件褸好貴囉！而冰湖呢場戲，亦拍得好靚，女主角件褸就有白毛，男主角就係黑色毛，好襯！
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
