同事好有心，去旅行又帶咗咖哩返黎俾我。
咁好啦，你出豉油我出雞，就整返D野回饋下大家啦。
去元朗買餸，順手買肥肥大大既蘿蔔。洗淨，去皮，切滾刀塊。
係豆腐檔買大大塊發好既豬皮
出出水，切塊備用。
香港仔魚蛋
又係拖拖水，備用。
少少油，爆香乾蔥同蒜片。
爆咖哩醬
放蘿蔔爆炒
加滾水煮十分鐘，再加豬皮，再煮到蘿蔔腍。
加少少鹽調味，如果你喜歡，都可以加少少雞粉既。最後加埋D魚蛋煮多陣，就成功架啦。
分成三盒，兩盒拎返公司，一盒係屋企食。
題外話，網上咪流傳話點樣用牙籤去蘿蔔皮既。
咁我就趁有新鮮蘿蔔係度，拎黎玩下。
先切一截蘿蔔
畫出一條痕
原則上揭開層皮，就可以去到架啦。但我唔太成功，塊皮會斷既。唔通個蘿蔔太嫰?
唔信邪，再試多次。都係唔掂，激鬼氣，都係用返刨啦。
如果順利既話，理應好似呢件咁，剥得出一大塊皮架麻。
呢個方法原則上係可行既，但實在冇我地就咁削皮咁快，所以我唔會再咁做啦。
============================================
感謝 May姨Blog 提供以上資料
May姨Blog的網誌: http://maylibibi.blogspot.hk/
============================================
