話說我1月嘅時候，through Expedia訂咗間首爾嘅酒店，但後嚟發覺間酒店唔太ok，於是打電話去取消個booking。我打電話去customer service做取消時，問過個staff係咪唔會有任何charges，佢答我係！我再confirm一次唔會有任何charges後，先同意取消。點知……當我2月收statement時，發現佢退唔足錢俾我！雖然差額只係廿零蚊，但我唔忿氣！於是，我再打上去質問佢哋點解退唔足錢俾我！對方話呢個係國際手續費。我同佢講之前打嚟時，佢哋個staff同我講話唔會收任何費用，佢就叫我attach埋張statement，再send email去佢哋公司。咁我就即刻send email啦，之後，即時收到佢哋confirm收到我email嘅email，仲承諾48小時內覆我。結果，72小時後，我都仲未收到email……我再send個email去催佢哋，佢哋先覆我，但係叫我打電話去customer service……我再打電話，講番發生咩事，對方先幫我即時處理退款事宜。
事隔成個多月，收到之後兩個月嘅statements，都冇退款金額。頭先再打上去，個staff又講一大堆國際手續費嘅廢話，我忍住唔爆咁同佢講佢間公司一早應承幫我退款，亦表示做咗有關手續，但我仲未收到錢。佢就話我冇send statement俾佢哋，我即刻串佢頭先check番record時，先話公司有收到我send過去嘅email，亦見到公司係有收多我錢。之後，佢就話會幫我做處理，我質問佢點解上次打嚟佢公司個staff明明話幫我做咗退款，但最後又冇錢退，佢竟然話冇記錄公司有處理過我個refund case！呢部人肉錄音機不停重覆話見到公司收多我錢，筆錢係咩用途，然後話可以人手退俾我云云，基本上問佢咩，佢都係答呢堆嘢……我都費時嘥gas同佢講。
最後，佢仲唔知係咪玩嘢哋hold咗我超過15分鐘，過要搞人手退款，上次秒殺咁搞掂 (不過，最後原來冇做……)，今次就搞咁耐……收線前，我問佢叫咩名，話收唔到錢再搵佢，佢就驚死咁問我點解要問佢個名，又話內線transfer唔到俾指定staff云云。
今次再收唔到錢，我都唔知自己仲有冇耐性去嘈佢，畢竟銀碼太細，我個time cost仲高！但呢間嘢我呢世都唔會再幫襯！
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
