細妹約咗佢一個喺善終治療做咗半年義工嘅教會姊妹同我哋傾吓喺爸爸尚在生時我哋幾兄弟姊妹要注意嘅事項，大家準時齊集餐廳。
細妹個教會姊妹本身係護士，得知爸爸嘅癌細胞已擴散至肝、肺同骨之後，佢話爸爸好tough，因為癌細胞去到骨，一般都會好痛，但爸爸好少喺我哋面前表現到好痛好辛苦，雖然我哋知佢有食止痛藥，但我冇諗過其實佢原來係痛到咁……聽到呢到，我已經唔爭氣咁喊……細妹個教會姊妹表示癌細胞擴散到肺，我哋就要注意爸爸日常飲食，因為一不小心食到唔乾淨嘅嘢，個肺會好易出事，但由於爸爸呢排都冇胃口，好少食嘢，所以會受感染嘅機會暫時唔高。至於個肝……爸爸臉色已經越嚟越黃……
因為我喊，搞到肥仔又忍唔住流淚，然後，提到媽媽壓力大一事，因為細妹對爸爸緊張，有時會唔為意地俾咗壓力媽媽，肥仔提佢要小心，我幫細妹講番句公道說話，就係佢自己都好大壓力，細妹聽到呢到，忍唔住喊，其實，佢同爸爸媽媽一齊住，要同時照顧兩老，壓力好大……之後，我喊住問細妹個教會姊妹有冇咩人可以介紹俾媽媽去傾訴吓，呢個時候，連大妹都喊埋一份……唉……我覺得自己好冇用，每次都係咁，一提到爸爸個病，就會忍唔住喊，然後，就搞到大家都陪我一齊喊……我好想自己可以堅強啲！
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
