近排惠顧日本放題的次數幾近上年全年的總和，是晚又約了一位喜愛日菜的友人在尖沙咀飽吃放題。今回到訪的餐廳金田日式放題，店內擺位寬敞，近兩邊牆位置各有一排四人檯，中間以木板間場分隔，私隱度更佳。



放題供應分兩時段，價錢有少許差異，大概人均消費都是二百餘元左右。食物方面，相較其他放題店不算特別多，但也算足夠合理。

先吃刺身，前後點選了兩次，兩次的賣相鋪排差異比較大，建議統一化為佳。刺身試了油甘魚、三文魚、吞拿魚、象拔蚌、海螺、素鮑片、北寄貝、馬刀貝及甜蝦。油甘魚及三文魚食味合預期，鮮度對辦。吞拿魚色澤味道皆淡不太吸引。象拔蚌爽脆帶甜，幾好食。海螺及北寄貝很淡口。馬刀貝和象拔蚌食感差不多，只是鮮甜度不及後者。素鮑片鮑香足。甜蝦甜度稍弱。

壽司卷物只淺嚐了軟殼蟹牛油果反卷及火焰三文魚壽司兩款，水準普普通通。

至於手卷，則吃了海膽手卷及香蔥吞拿魚腩手卷兩款。海膽色澤一般，香氣足，甜美度普通。香蔥吞拿魚腩都是比較味淡。手卷用上的紫菜半脆半腍，OK喇！

串燒燒物時間，雞軟骨串恰如其分夠脆口。豬頸肉串肉厚，略油膩。牛肋肉串肉香甜美不俗。翠玉瓜串爽口，簡單靠面上的甜醬油調味。冬菇串無乜特別。蒜香一口腸面脆香口。燒多春魚無乜特別。燒菠蘿酸甜度適中，多汁。忌廉粟米焗蠔醬汁調味不俗，蠔肉夠瘦小。香草燒羊架肉質略粗鞋，味帶少許羶，OK喇！薄燒牛肉蒜片香蔥夠搶口，成品味道不俗。牛油野菌帆立貝牛油力度不強，反而黑椒味濃，帆立貝細細粒，鮮甜度普通。

炸物天婦羅較熱氣，只宜淺嚐。芝麻雞翼夠香口。一口芝士魚餅既彈牙，又有流心芝士，好吃。甘蝦腐皮卷皮脆可口。吉列廣島蠔吉列外皮甚香脆，但同時蓋過蠔香。炸釀蟹鉗味假口感散，不太好。海老天婦羅脆香熱辣，炸漿外層略厚。松葉蟹棒天婦羅食味一般。

最後是鍋物及一品料理。泡菜豆腐海鮮鍋泡菜湯底帶微辣惹味，豆腐稍實身味淡。海鮮食材有青口、帆立貝及蟹棒，用料一般無乜驚喜。清酒煮青口青口味淡。湯烏冬滑度韌度普通。醬汁豬軟骨夠入味，腍脆口感交雜幾好食。粟米粒粒燒甜美油潤同樣不錯。

整體來說，各款放題食物水準合理，加上環境服務不錯，可以一試。

[29/1/2015; Thu]

============================================

感謝 VCY 提供以上資料

VCY的網誌: http://www.openrice.com/zh/gourmet/reviews.htm?userid=92753&city=hongkong

============================================