想黎呢間試下好耐架啦，一路都未能成行。咁啱我放半日假，去到都應該過咗飯市，尤其呢間位處佐敦，就更易搵位，所以就安排黎食下點心。
$3位既茶錢，其實唔應該收既，一人倒你半杯茶，期間你唔問係冇人會主動同你添茶既，你去茶記都有杯免費茶水俾你啦。
點心款式唔算多，但呢度只適合人少少，三幾個人咁黎食下野，所以都夠你選架啦。
我坐落，見到隔離檯叫咗籠金沙肥豬仔包，一d都唔吸引，所以冇叫。見佢地都有叫糯米飯，食咗幾啖，剩低晒。除咗因為叫得太多野食唔晒外，都應該唔多啱食。事關我見佢地最後問人攞咗個盒，打包三粒燒賣，大把位都唔裝埋d糯米飯就知啦。
呢度推介牛肝菌花菇包，我都幾想試下。
一碟兩個，賣相果然100分。
包既質感似方包，唔多似係蒸包。但餡就認真少，食唔出牛肝菌味，反而染花菇色既朱古力粉味就好出。$9一個既話，其實係唔值既，叫做見識過，以後都唔係再叫佢。
燒汁茄子，果然出眾，但無可否認，炸既火候做得剛剛好。
茄子熟到入心，全件熱辣辣，蝦膠亦唔錯，點上微甜燒汁，算係呢度既A級點心。但食完呢件東東，碗底都幾油，要用紙巾抹走先繼續進食。
脆皮鮮蝦腸，有D後悔點咗呢樣。唔係佢唔好食，只係兩個人，一人要啪四舊，份量太多。我帶咗食物盒，預咗點多幾樣點心，食唔晒就打包。但呢款點心係唔適合帶走既，唯有即場啪晒佢。
蝦餃，係唔錯既，但都要打包兩粒走。
賽螃蟹鮮蝦菜苗餃，係咪蒸過火呢? D皮爆晒既，一夾就散。
蟲草花棉花雞，入面既魚肚算係幾高水準，好食!
呢籠黑松露小籠包，認真麻麻，皮唔靚、冇湯汁，大可不點。
後尾我地仲叫咗杯冰鎮奶茶，埋單都係一百八十幾蚊，都唔算貴既。
原來一至五兩點半至四點半有七折，咁就比較值得黎多次啦。
============================================
感謝 May姨Blog 提供以上資料
May姨Blog的網誌: http://maylibibi.blogspot.hk/
============================================
點點心點心專門店 (佐敦店)
Italian Tomato Café (馬鞍山店)
嘉美軒精細潮州菜
彩晶軒 V Cuisine (荃灣分店)
Fish & Chick (西環店)
欣圖軒 Yan Toh Heen
恆河咖喱屋 Hin Ho Curry Restaurant
大戶屋 Ootoya (太古店)