呢D係乜東東?
![]()
其實佢係日本蕃薯仔，即係大家去食放題串燒蕃薯仔果種黎。我冰格有包急凍貨，可以隨時取用。
![]()
一粒大概可以分成三份，充當湯丸既餡。至於湯丸皮，就只係糯米粉加水，搓勻就得啦。
![]()
其實餡既大細同皮既厚薄，可以隨個人喜好調較既，我就鍾意皮薄D。建議大家用個磅來量重，咁就可以粒粒都咁上下大小了。今次我只用咗一小滴食用色(其實可以再淡色D，下次都係求其用牙籤沾小小就算)，測試一下用蕃薯餡做湯丸好唔好味，於是就做簡簡單單既豬仔就算啦。
![]()
白色皮加餡搓圓，在碟上墊上保鮮紙，就可以放湯丸上去。跟住取用一小糰湯丸皮，加少少食用色，用一小粒做成橢圓，略按扁，在底部抹點清水，貼在湯丸上。再拎一小粒切半，搓成三角形兩粒，按扁，又用清水貼在頭頂就掂啦。
汲取了上回的教訓，煮湯丸時粘在湯丸上的配件脫落問題嚴重。所以在此奉勸各位，水應該塗在配件的底部，貼上湯丸面，再輕按定位，煮時就不會掉落了。
![]()
跟住用食用筆畫上眼睛及鼻孔就完成了。
![]()
水滾放湯丸
![]()
大滾再放點冷水，等佢略降溫，再由得佢再煮滾，此舉可以令湯丸皮更煙韌。
![]()
撈起湯丸，放入另一煱薑片糖水內繼續煮，看到湯丸粒粒浮起，明顯漲大了點，就應該熟了。
![]()
13粒豬頭順利誕生，而且一粒都沒有毀容。
![]()
小豬湯丸可以上檯，而且冇人柴我台。
![]()
真係要俾個咕自己呀!
![]()
最重要既係: 我選用了蕃薯仔做餡，做時唔會搞到一手都係，煮完出黎一滴油都冇，比較健康，可以放心俾屋企人食，又唔會太甜膩。
============================================
感謝 May姨Blog 提供以上資料
May姨Blog的網誌: http://maylibibi.blogspot.hk/
============================================
