N 班的迷思

19.04.2019

每次聚會 , 總會有一堆成為媽媽的朋友討論 N 班是否必需.

某些朋友 , 相處耐了 , 你會知道她的性格 , 重視學歷 , 總愛說 "大學生就是比較不同 " . 90% 這重性格既朋友都會游說我 N 班必須 , 唔讀 N 班無幼稚園收 , 會入唔到名校 , Bala bala ...

另外 10% , 其實也是認為 N 班必要 , 只係要面對現實 , 自己無錢比小朋友去讀.

某些教書既朋友 , 卻大部份認為 N 班是沒必要的 , 只是父母想有自己空間及時間 , 可以甩開孩子 1 , 2 個小時放空一下的藉口. 心態係人有我有, 或比人知道我比得起錢以及想偷懶.

小地勤是放牛媽媽. 我沒有讀過 N 班, 也沒有讀過大學.

我父母無讀過書, 他們是勞動人口, 別人眼中的低下階層. 他們遇到不合理事情, 會講粗口.

他們教我, 對人要有禮貌, 見面要打招呼, 得到別人幫助要記住, 要感激. 面對不合理既事, 忍一時風平浪靜 , 但遇上太過份也要作出反擊, 最低限度, 要保護到自己.

玩具, 夠玩就可以了, 家境唔好 , 要學懂珍惜及分享. 兄弟姐妹要同心, 相互忍讓, 打完交, 明天就要做返好朋友. 朋友不用多, 最重要真心.

想睇書, 去圖書館 , 想玩耍 , 就去公園 , 想要零用錢 , 幫手做家務.

N 班, 真的是必要嗎? 我每次都問自己 , 我唔識教佢要有禮貌, 要尊重人嗎? 我做唔到身教, 所以要比錢人教? 我自問係一個脾氣好好, 好識體諒同感恩既人. 我出身於 CS 依行, 禮貌, 我絕對做得到. 我有自信教好孩子有禮貌.

我忍心每日返工 9 小時加埋車程, 每天相處得 2 小時唔夠, 仲要掉佢去學校嗎? 有時間, 我只想抱住佢, 錫下佢, 拖住佢隻小手, 放佢係公園行黎行去. 每次, 佢玩玩下, 都會回頭望住我笑. 好似同我講 " 媽媽我自己玩, 好叻叻 ". 我每次都會笑住回應佢一下, 令佢更安心去放手玩, 因為媽媽總會在你身邊. 父母既陪伴, 相信是無可取代.

上堂好好玩? 我唔覺得, 有邊個覺得困係課室係開心得過通街跑? 小朋友, 最堅要係身心健康, 玩能夠放電, 令睡眠更加優質, 良好既睡眠, 先有健康既身體.

N 班, 我拒絕了. 放假, 我寧願帶佢去公園, 去海灘, 去旅行 ... 咁樣既洗費其實不比 N 班平. 一家三口旅行預平平地 8000 蚊, 一年去 6 次, 都用左我 4 萬幾蚊 ... 錢 , 好多香港人都大把.

每個人價值觀唔同 , 這是我個人諗法 . 或許下次再有人同我講 N 班要幾多幾多錢 , 你無 , 所以先唔讀時 , 我都可以計返條數比佢睇 . 我只係將舊錢花左去買一家三口的共同回憶 !

唔知大家總記唔記得, 咩叫揠苗助長. 我小時候真的很喜歡睇成語書 , 因為喜歡 , 所以學習 , 這才有動力 .