食到谷鬼氣, 把幾火既一餐好友生日飯
從未試過用足三個多小時黎等上菜
依家去飲都可以九點入席十一時走得人啦
呢間嘢都唔知攪咩鬼
每一度菜都要用成半個鐘至上到枱
食到我地無晒癮
眼見餐廳內只得六圍枱
枱枱都要等
都唔知入面係咪只得一個爐煮嘢
既然煮唔切咁多枱客既
咁就好似私房菜做2圍就算啦
真係試過一次都唔夠胆再黎喇
[渣華軒]
[古法滋補桑拿蝦]
無咩蝦味
只係食到龍眼杞子同酒味
[碧綠蝦子鮮菇鮑汁螺片]
冬菇好厚身
有冬菇味
其餘只熟一般
清菜一碟
[回疆熱石火焰羊鞍]
上枱時仲點著中間火盤
暖著D羊鞍
呢個食落幾有驚喜
而且仲係最好食既一碟添
羊鞍燒到表面好脆
但入面又唔乾喎
有好香羊味但無羶
回疆........唔知係咩
不過好野味
[薑蔥麻香貴妃雞]
好鹹
似鹽水雞多D
只係好重薑味
[磯燒元貝釀蟹蓋芝士燴伊麵]
睇上圖都見到D蟹蓋超細隻
用左D無味豬肉釀左入個蟹蓋度
個餡就無咩味
但勝到炸得好香脆
至於芝士燴伊麵就差喇
唔知係我食得太重味定真係全部嘢都無味呢
D伊麵重淡又無芝士味
真係麻麻地
[海底椰杏汁白肺湯]
睇件豬肺好似幾OK咁
但放左落口連自己食緊咩都唔知
好淋又無豬肺味
呢個唔應該叫湯
叫白肺水就啱
[清蒸台灣青斑]
條魚係我面前開左後
順時針由右手面先夾
來到我時已經七七八八只有背部少許碎肉
先夾的前半人都話條魚蒸得好鞋
但後半人(包括我)就覺得OK喎
咁可能係前半人夾的一面時間蒸得太耐
另一面就剛好所至啦
不過大家就一至咁覺得個蒸魚豉油就煮得麻麻地
我媽仲煮得好食過佢
一D都唔似廚房師父作品既
[黃金裹蒸粽] (家傳菜冠軍)
呢個一上枱時就覺得有點怪
大家都以為蒸番薯添
之前大家都估緊係一人一粽
定一大隻粽SHARE
定係.........
點知攞到黎原來係咁
食落口同端午節食既粽無分別
只係將隻粽橫切左之後煎一煎佢咁啫
咁就話攞獎
係咪得佢一個參加架
[椰汁官燕大團圓湯圓]
又係椰汁
見個樣同之前個湯咁似既
不過味道就唔一樣
感覺就有少少似用椰漿開水咁囉
飲落去係水
但聞到有椰香味咁
個粒所謂大團圓真係好大粒
同埋個湯圓皮好厚好硬
買包四川都好食過佢
最後當然來個合時美果啦
雪到好凍
所以唔啱我食
但聽其他朋友講都覺得麻麻地
生果一D都唔甜
佢地仲話樓下就係街市
好心買D甜少少比得人食既生果人啦
食到最後
個廚師仲自動走左出黎同咁多枱人影相
都唔理人地鐘唔鐘意佢
只係覺得佢出黎好hard sale自己咁
如果D嘢整得好食既
你唔出黎都有人搵你影相啦
駛唔駛搞到咁呀
地址: 北角渣華道99號渣華道體育館5樓
感謝 飲食二打六 提供以上資料
個人日誌: http://eaternote.blogspot.hk/
