由 漂泊中的魚 於 2008-02-05 00:00:00 發表 | 累積瀏覽 692
今日係年廿九, 難得細佬放假又得閒, 捉埋阿媽老表一行四人, 去左紅磡海逸酒店的爐端燒日本餐廳 (Robatayaki) 食 Dinner !
環境唔錯, 我地入到餐廳最裡面, 大廳中有一張 20 人座的大枱, 雖然滿坐但都唔會覺擠迫, 亦唔算嘈吵 (反而有時係我地笑得太大聲!), 我地的大前方, 就放滿食材同望到師傅係度燒食物, 師傅身後仲收埋個啤酒雪櫃添架 ~
服務質素係HK 黎講算唔錯, 個個侍應都文文靜靜咁, 唔會太大聲講野, 態度都幾好, 過黎倒茶換碟的次數算適中, 唔算太頻繁, 不過佢地就唔係太留意客人動態, 次次想叫野食, 都要左望右望, 等一輪先搵到人埋黎serve. 至於師傅呢, 非常有禮貌, 手勢梗係一流, 只係睇佢串食物 (特別係串全條魚同油甘魚頭) 同埋落調味料的手勢, 好似個Show 咁, 真係非常 Enjoy 架 (特別我好喜愛睇煮食節目) ! 不過略嫌佢燒物的速度略快, 冇幫我地就時間, 我地只係分 2 round 黎叫 18 道菜, 所以有時會 2-3 道菜同時上枱, 平時的天氣都冇問題的, 但今日天氣凍, 食物比較快涼, 要趕住食咁就唔係太好啦 ~
好啦, 到正題啦 : 食物!! 頭盤先黎個 Assorted Sashimi Deluxe 同 2 客海膽 Sushi, 魚生係算新鮮, 但 Quality 未到頂級, 海膽食唔到佢的鮮甜味, 略微失色, 不過呢間餐廳唔係主食魚生, 我可以放過佢, 不過作為一間酒店的日本餐廳, 呢點仍雖改善啦 ~
輪到主菜燒物, 真係冇得彈呀 ! 由食物的質素, 賣相, 色香味都係一流, 令到我地睇同食都好開心 !! 一共 18 道菜, 依相的排列 : 牛脷, 雞腎, 露筍(冇相), 茄子, 本菇, 蒜頭, 菠菜(冇相), 黑豚肉, 豆腐, 甜蕃薯(冇相), 油甘魚頭, 大蝦 (我最愛呢個 !!), 鴨胸, 松板牛, 帆立貝, 三文魚飯團, 完條魚(名要問番阿媽先知 !!) 同鵝肝 (非常甘香, 我唔愛吃都食左2 小件!).
食到甜品, 我地叫左 3 樣 : Apple sorbet, Tangarine sorbet 同 Citron ice-cream, 我地一致認為 sorbet 真係非常出色, 特別係 Apple 個非常清香, 至於 Tangarine, 有少少柑的苦澀味, 但同樣出色, 真係食到差d 連皮都刮走埋呀 !!
最後講到又最唔應該提的"價錢". 平均每樣燒物係$100 左右, 海鮮又貴多少少, 只係個松板牛特別貴, 要 $1300, 連埋酒水(我要開車, 所以冇叫我最想飲的sake 啦!!!) 同服務費, 我諗你地都估到要幾多啦. 我就唔開估囉, 呵呵 !!
哈哈, 最好笑係我食完飯同阿媽去花墟搵朋友買年花, 結果我反而要做義工係o個度賣埋花喎 !! 嘩, 真係手忙腳亂呀, 又要剪頭, 又要包花, 又要收錢, 仲要應酬埋客人, 睇黎我都係唔適合做賣野架啦 ….
炉端燒日本餐廳 (九龍海逸君綽酒店)
割烹 櫓杏 Kappo Ro Ann
鮨千寿(尖沙咀店)
木戶 KIDO
Shibui 洋食屋
風雲丸
源峰 Mizutani
鶴亀