![]()
好似冇幾耐之前先炒過飯
早幾日又炒飯黎食添
其實我唔係特別鍾意食炒飯架咋
老實講,炒飯要炒得靚都真係要落多d油既
但太多油唔健康嘛
所以炒飯少食為妙喔~~
又話唔健康,咁我又整?
係咁既.....我呢好鍾意上網買野既
更加鍾意上網買日本野
因為呢,用円結算既transactions當overseas spending嘛
咁碌卡俾錢可以有double mileage啊
嘻嘻,double mileage可以快d換多張機票呢~
就係呢個c9心態上身
我久唔久都會喺Oisix訂d野食返黎囉
蛋糕呀,生果呀,薯餅呀......
咁啱之前買開野時見到有原條鰻魚喎
我家主人好鍾意食鰻魚架嘛
咁咪買咗兩條返黎試吓囉
本黎諗住用d最簡單既方法食咗佢既
即係整返熱條魚放上飯面
再淋d鰻魚汁加少少蔥花就食得嗰隻呢
我真係有咁食過
但只係用咗一條鰻魚
咁原來用一條魚分成二人份既話
每人其實得好少囉
我唔想老公食唔飽
但又唔捨得一次過煮晒兩條魚
咁剩返嗰條唯有用其他方法整啦
唔洗煩既就梗係整炒飯啦嘛
所以炒飯咪又再出現喺餐枱上囉
炒飯大大碟唔會食唔飽喇呱
材料:
白飯 2碗
蒲燒鰻魚 1條
甘荀 半條
粟米粒 3湯匙
調味料:
鰻魚汁 3湯匙
廚具:
Le Creuset Barbecue Pan
做法:
1. 鰻魚切粒,甘荀去皮切粒起鑊
2. 2湯匙油中火起鑊,分別加入甘荀,鰻魚及粟米爆一爆
3. 加入白飯炒勻
4. 分數次加入鰻魚汁(邊加邊炒)
5. 一直炒至米飯乾身即可上碟
6. 愛蔥花朋友可自己於飯面灑上蔥花
感謝 雪雪 提供以上資料
雪雪的網誌: http://kitchenofsnow.blogspot.hk/
