原來，有好多朋友都係煮野唔多掂既，包括我以前果兩位，除咗煲水就咩都唔識煮既菲傭（佢地跟咗我幾年之後，梗係可以下山啦）。好話唔好聽，大把人仲係五穀不分，連日常食既菜都可以搞錯晒既。係咪依家既新一代幸福得滯呢？憶或係佢地冇我地果代咁幸福至真呢？
我都覺得自己好好彩，叫做自我訓練有素，總算可以輕輕鬆鬆煮到幾味。本來今日呢個炒飯係應該由Bibi主理既，但佢呢輪比較忙，又要彩排會考放榜打氣大會既司儀，所以都係等我示範俾大家睇下，點樣係短時間做好二人份既足料炒飯啦。
欖菜肉碎炒飯
材料有：
主角冷飯，記住打鬆咗先呀
肉碎（約$10），即係百佳買既本地屠宰免治豬肉。先用豉油、糖、鹽、胡椒粉調味，再加半茶匙鷹粟粉搞勻。（記住調味少ｄ冇所謂既，過多反而難搞）
雞蛋兩只
薑蓉（約一湯匙，多少隨意，我就覺得多少少香ｄ）
欖菜（一至兩湯匙，其實冇乜所謂既，隨你喜歡啦，有時一樽入面會有一兩粒欖核既，千奇咪連埋粒核掉埋入去炒呀）
調味只係少少鹽同少少豉油
超級懶人大法：
用少少油爆肉碎，炒散佢得啦，唔駛熟晒既。話明係懶吖麻，咁梗係唔會兜起ｄ肉架啦，亦唔會中途走去洗鑊既。
跟住放薑蓉同埋欖菜，兜幾下，呢兩樣配料既香味就出黎啦。放心啦，兜到呢度，ｄ肉都有八成幾熟架啦．
加埋打鬆咗既冷飯入去，兜勻翻炒。炒到ｄ飯熱，ｄ肉都熟晒lu，可以加少少鹽啦。（又問少成點？唔好超過半茶匙先啦，唔夠可以再加架麻，多得滯就弊啦。）再兜炒幾下啦！
係鑊中間推開一個窿，打兩只蛋入去，快手兜勻，炒到ｄ飯粒會一粒粒跳起就為之Very Good啦。（我呢ｄ係新鮮有機蛋，可以好放心直接打入去，如果你地果ｄ係普通蛋，唔該搵只碗裝開，逐只打開，睇清楚冇變壞先好喎。）
係呢個時候，你地可以試下味。如果味道差唔多，就再係鑊中間推開個窿，做咩？記住，係呢個窿果一忽金屬面度，贊少少生抽（唔駛咁多架，我要ｄ香味既唧），快手兜勻，再炒幾下，咁就可以收火架啦。如果你曉呢下秘技，炒出黎既飯，就會香過人地果碟架啦！
呢碟就係足料欖菜肉碎炒飯啦（仲可以留埋我聽日既飯盒），全程炒作時間唔駛十分鐘（我計過時，只係用咗九分鐘唧），咁加埋我同ｄ肉調味同切薑蓉既時間，又當你手腳慢啦，再加多五分鐘好未吖？係咪好快呢？
睇下，易潔鑊即係易潔鑊，兜起晒ｄ飯之後，好似洗過咁乾淨！
============================================
感謝 May姨Blog 提供以上資料
May姨Blog的網誌: http://maylibibi.blogspot.hk/
============================================
