都真係好少女仔鍾意睇波好似我噉哪, 由8歲捧曼聯至今, 係86年開始睇世界杯. 上屆因為英格蘭入八強對巴西, 諗住世界杯喺噉近舉行都唔親身去睇嘅話, 真係會覺得遺憾. 結果自己一個人比萬二蚊買咗張波飛就飛過去...試過搵d姊妹陪我去睇, 但個個都話我傻噉貴買一張飛, 攞去shopping好過啦...但我又真係唔係好似一個正常女仔, 又唔鍾意shopping, 亦都真係覺得萬二蚊睇到英格蘭對巴西係值得嘅...
今屆, 一早就去撲飛哪. 最終以半價$240歐羅買到3張一等位嘅四強飛, 真係好開心. 可惜今次d機票同住宿就貴到嘔, 圍埋都係一條數. 但當知道我熱捧嘅英格蘭可以首名出線, 又殺入四強的話, 我就又有機會親身為佢哋打氣, 心裡就十分興奮. 若果佢哋又係對巴西, 真係我上屆睇嘅翻版. 當然我一d都唔希望翻番佢哋嘅賽果啦.
今晚開始八強大戰, 可以話係場場都係戲肉. 首先德國大戰阿根廷, 兩隊強隊對, 一定十分精彩. 德國今屆表現出色, 擺脫晒以前又悶又土嘅主守方式. 而且又有主場之利, 今屆可謂極具冠軍相. 阿根廷亦是狀態大勇, 相信一定有一場激戰. 另一場意大利對烏克蘭, 當然係意大利看高一線, 出線有望. 但要入決賽, 機會就渺茫d...
另外兩場大戰, 首先係英格蘭對葡萄牙. 作為英格蘭嘅die hard fans嘅我, 就梗係支持佢哋. 雖然今屆踢得真係麻麻地, 但對住殘陣嘅葡萄牙, 仍然有勝算. 只有英格蘭打番佢哋應有嘅水準, 希望朗尼同林柏特可以表現出色d啦.
最後一場巴西大戰法國, 巴西當然係大熱之選, 但對住上場表現超卓嘅法國, 相信亦唔一定嬴梗. 由其是經過98年嗰一戰後, 巴西係一個可謂嬴硬嘅情形下都可以輸, 真係唔敢講. 話晒係施丹告別球壇之作, 隊友都一定會同佢拚盡嘅...
我今晚夜機飛哪, 而家心情真係又緊張又興奮. 你哋大家好好保重啦, 我會現場影多d相比大家睇哪. 係餘下嘅最後8場賽事, 大家一齊好好享受, 一起為世界杯喝采!!!
============================================
感謝 玻璃朱Bonnie 提供以上資料
玻璃朱Bonnie的網誌: http://www.bonniechucity.com
============================================
