7 美食情緣@大坑

近年香港人越來越注重健康，而飲食方面也盡量以清淡為主，因此各色各樣的素食店亦應運而生。不過講真，其實想吃得健康，又唔一定要茹素的。筆者早前就看過飲食雜誌介紹，大坑有一間新開的西班牙餐館《Nocte》，據說餐廳是由註冊營養師主理，而且每款菜式都經過仔細設計，能做到色香味俱全，營養豐富，聽落吸引，所以這晚就特意來試試。



大家要細心留意睇吓這個易拉架上的地址，其實餐廳是位於大坑重士街 1-11 號，而非食評網上的華倫街，所以由就近天后站的銅鑼灣道入，到了華倫街後還要再向前多走一個街口，就會見到這間充滿地中海情調的《Nocte》，亦即拉丁文《夜晚》的意思。





甫踏進店已被七彩繽紛的天花吊燈吸引著，不過原來餐廳地方比想像中細得多，只有二十餘個座位，幸好裝潢帶點巴塞隆拿小店的氣氛，加上四周環境寧靜舒適，最啱傾偈談心。很喜歡店面這張以彩色碎磚鋪成的吧檯，相當矚目，所以特意揀了這裡坐下來，既可欣賞廚師烹調食物，又可一邊品嘗美食，一邊跟廚師交換飲食心得，相當不錯。





翻開餐牌，發現原來店裡的食物，選擇唔多，只有 Soups、Pastas、Tapas、Main 及 Desserts 幾項，其實這樣也好，不用太過三心兩意，心多多，唔知點揀好。咁就先來一客 Gambas ($158)，大虎蝦開邊後於明火上烤香，蝦身入口肉質嫩滑，咬下結實得來又帶有彈性，味道鮮甜，拆開蝦頭有一抹蝦膏，配面頭的番茄香草沙沙和惹味的蝦醬吃，食味倍添。





接著是 Razor Clams Linguine ($168)，用上蟶子而非常見的蜆肉來配扁意粉，大廚果然創意十足。蟶子一咬下已知是街市即日鮮，肉身肥美飽滿，每一口都帶海水的濃鮮；而扁麵條亦煮至僅熟，口感啱啱好，吃起來不會過腍，彈牙得來又有咬口，很美味。不過個人覺得這客意粉最特別的地方，就是伴吃的醬汁，原來是用咗檸檬皮及新鮮的檸檬汁調校而成，難怪咬下充滿清新氣息，而且亦可以去除蟶子的腥味，令麵條吃起來更開胃醒神。







主菜選了賣相精緻的 Stuffed Chicken Rolled in Parma Ham with Lentils & Cooked Vegetables ($228)，來自阿根廷的雞上脾肉，先釀入以橄欖油煮過的茄子蓉，捲起成雞肉卷後，外面再包一層薄切的風乾火腿煎香。雞肉咬下肉嫩多汁，而內裡的茄子蓉，食味清新，配上外層油潤鹹香的巴馬火腿，吃起來啖啖肉又不膩口，以煙韌有嚼勁的扁豆、翠綠的西蘭花及香甜的椰菜花伴吃，更添口感。

坐在吧檯位的好處就是可以近距離欣賞大廚細心地為每位客人炮製一道道色香味俱全的菜式。





又來到甜品時間，點了這客賣相吸睛的 Signature Dessert Apple Tart ($118)，自家製的蕉糖蘋果撻，端上來時香氣四溢，惹人唾涎。原來據說成品是選用了日本富士蘋果同美國青蘋果焗成，入口甜中又帶點兒酸，味道輕盈，配上以薄薄酥皮製作而成的撻底，吃起來既鬆脆又美味，做得果然出色，伴以頂頭甜香的雲尼拿雪糕，吃罷令人發出會心微笑。講真，如果閣下愛吃甜的話，單為這個蘋果撻而來，肯定你會不旺此行。

整體來說，店裡的食物質素頗有水準，而且由於老闆是營養師的關係，所以著重菜式健康之餘，亦會保持食材的美味，值得一試。也順帶一提，而家逢星期二至四來餐廳用膳，6:30pm 前入座，即可享九折優惠。

============================================

感謝 mjqueen7e 提供以上資料

mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong

============================================