8 吃得愜意的一晚

這天因工作關係，要去快將搬遷的旺角寫字樓點算及接收公司家當，所以下班後，決定約埋老公到附近找個地方吃完晚飯才回家。從網站找到一家位於洗衣街、設計帶點意式風情的新餐廳。印象中對上一次來旺角洗衣街是去《OPPA》食韓燒，店子水準不俗，教人吃得滋味；不過近排天口㷫，熱辣辣，胃口一般，無打算再吃烤物，就一於試試這家環境看起來頗溫馨愜意的餐廳《Amico 1890》。















其實來這裡交通也挺方便，由旺角港鐵站 E2 出口步行過去，也不足 10 分鐘路程。餐廳原來分為上下兩層，地下一入門口，右手邊先是一列吧檯位，再往內進，餐桌旁的白色牆身，掛滿復古車牌和掛畫，再加上天花的暗黃鎢絲燈，裝潢充滿懷舊 feel。好奇心驅使，決定再往上一層走，原來這樓上除了用餐區中央設有一張可以坐超過 10 人的 communal table 外，更設有投射大電視，人多包場聚餐甚至睇波都一流。



揀了樓下一張靠牆的餐桌坐下，先點飲品，其實餐廳的 Drink Menu 選擇都唔少，除了最基本的冷熱飲品、咖啡、朱古力同汽水之外，仲有沙冰和梳打。分別點了蜜桃梳打 ($38) 和凍鮮奶咖啡 ($38)，前者蜜桃味雖然未至於馥郁芬芳，但入口帶清新的蜜桃甜香，水準唔錯；而後者咖啡喝起來亦頗幼滑，只是略嫌咖啡味不太濃香。



先來一客前菜醒醒胃，點了一道日本帶子刺身沙律 ($68)，這碟前菜用料其實好簡單，除了碟面的一隻原粒帶子外，就只有沙律菜、車厘茄同青瓜片，並以意大利醋作調味。講真，這味菜最大的亮點，當然是在帶子身上，原粒日本帶子肉質又厚又嫩，經輕煎後外層好像披上一身金衣，吃起來既香口又爽滑，超讚，如果伴吃的沙律菜，油醋汁下得輕手一點，應該會更滋味。



由於兩口子食量不大，所以決定只點一客主菜，另加幾款香口的小食。先端上來的水牛城雞翼 ($62)，雖然 size 唔算好大隻，不過由於雞翼外層炸至微脆帶焦，所以咬下皮香肉滑，而且內裡的雞肉仲好多汁，掛在雞翼外層的辣汁，辣中又帶點兒甜酸，惹味度滿分。

至於另一客法式蒜蓉包 ($38)，味道亦同樣出色，蒜蓉包焗至金黃色，面頭鋪滿蒜蓉，端上桌時仲熱辣辣，入口蒜蓉同牛油味都好香濃，而且包身亦烘得十分鬆脆，水準極佳。



反而覺得全晚最失色的就是這客牛油炒什菌 ($48)，記得之前在另一間餐廳吃過一客香草忌廉汁炒什菌，成品以人造牛油加入香草醬及忌廉不停攪拌，慢火煮滾後做成濃味醬汁，再用來炒什菌，忌廉汁入口帶濃烈香草及蒜味，什菌又軟又滑，口感唔錯；可惜這裡的炒什菌，吃起來不但菌香不足，而且牛油味亦欠奉。



由於之前吃的沙律，當中的日本帶子刺身，水準著實出色，味道令人一試難忘，所以主菜決定點一客南瓜帶子意大利飯 ($128)。以南瓜蓉和南瓜汁煮成的意大利飯，色澤金黃，入口比一般的意大利飯清甜，而且飯粒又唔會煮得過腍，粒粒分明又有咬口；加上鮮味滿瀉、肉厚得來又夠柔嫩香滑的北海道帶子、鹹香的煙三文魚、爽口的翠肉瓜和菇粒等，又 Light 又有睇頭。



見用餐後在 Facebook 即時打卡，便可免費獲贈乳酪雪糕窩芙一客 (原價 $48)，所以兩口子亦即場試試。端上來的格仔窩夫，小巧的骰，入口外脆內軟，口感鬆化，而且更帶濃濃的蛋香，加上面頭的雲尼拿乳酪雪糕，一凍一熱，層次豐富，實在令人吃得十分滿足。據說店名《Amico》是意大利文「朋友」的意思，不過其實這裡唔單止適合朋友聚會，就算是情侶、甚至一家大細嚟開餐，一樣無問題。

============================================

感謝 mjqueen7e 提供以上資料

mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong

============================================